قر يدم تەحنيكالىق رەتتەۋ جانە مەترولوگيا كوميتەتى باسشىسى ارمان شاققاليەۆتىڭ توراعالىعىمەن وتكەن عىلىمي-تەحنيكالىق كوميسسيانىڭ وتىرىسىندا قر مەملەكەتتىك ەلتاڭباعا ەنگىزىلەتىن وزگەرىستەر ماقۇلداندى.

بۇل تۋرالى اتالعان كوميتەتتىڭ Facebook جەلىسىندەگى رەسمي پاراقشاسى حابارلادى.

2018 جىلعى 12 قىركۇيەكتە ەتالون ورتالىعىندا وتكەن جينالىسقا مەملەكەتتىك ەلتاڭبانىڭ اۆتورى جانداربەك مالىبەكوۆ، «قازاقستان ستاندارتتاۋ جانە سەرتيفيكاتتاۋ ينستيتۋتى» رمك باسشىلىعى قاتىستى. وتىرىستا «قازاقستان رەسپۋبليكاسىنىڭ مەملەكەتتىك ەلتاڭباسى. تەحنيكالىق شارتتار» قر ست 989-2014 ستاندارتىنا ەنگىزىلەتىن №1 وزگەرىستەردى ماقۇلداۋ تۋرالى شەشىم قابىلداندى.

وعان سايكەس، ۇلتتىق ستاندارتتىڭ بۇكىل ماتىنىندە «قازاقستان» ءسوزىن لاتىن گرافيكاسىمەن «QAZAQSTAN» ەتىپ وزگەرتۋ، سونداي-اق ΔE تۇستەر دياپازونىن قولدانۋ تۋرالى وزگەرىستەر قابىلداندى.

بۇدان تىس، مەملەكەتتىك ەلتاڭبانىڭ ەلەمەنتتەرى مەن تاريحىن سيپاتتاۋعا ادىستەمەلىك قۇرالدارعا سىلتەمە، قازاقستان رەسپۋبليكاسى مەملەكەتتىك ەلتاڭباسىنىڭ اۆتورى جانداربەك مالىبەكوۆ جاساعان كونسترۋكتورلىق قۇجاتتاما قوسىلدى. وزگەرىستەردى ەنگىزۋ ءۇشىن قازاقستان رەسپۋبليكاسى مەملەكەتتىك ەلتاڭباسىنىڭ اۆتورى جانە وندىرۋشىلەردىڭ قاتىسۋىمەن بىرقاتار وتىرىستار وتكىزىلدى.

ەسكە سالا كەتەيىك، وزگەرىستەردى پرەزيدەنت نۇرسۇلتان نازارباەۆتىڭ «قازاق ءالىپبيىن كيريلليتسادان لاتىن گرافيكاسىنا كوشىرۋ تۋرالى» جارلىعىنا سايكەس، ارنايى جاساقتالعان جۇمىس توبى ازىرلەگەن.

Abai.kz