قازاقستان رەسپۋبليكاسىنىڭ ۇكىمەتى مەن ۇلتتىق بانكى اگرارلىق سەكتوردى قوسىمشا قولداۋدىڭ جاڭا ءىس-شارالارى تۋرالى بىرلەسكەن مالىمدەمە جاسادى.

ۇكىمەت جاقىن ارادا ۇلتتىق ەكونوميكانىڭ اگرارلىق سەكتورىن قولداۋ ءۇشىن جاڭا ءىس-شارالاردى ىسكە قوساتىن بولادى.

ەكونوميكانى جاڭعىرتۋدىڭ ءۇشىنشى تولقىنى مەن ءوسىمنىڭ جاڭا مودەلىن قۇرۋدىڭ قازىرگى جاعدايىندا اگروونەركاسىپتىك كەشەننىڭ ماڭىزى ارتا تۇسۋدە. بۇل – ستراتەگيالىق سالا. الەۋەتتى لوكوماتيۆ. ءبىزدىڭ ماقساتىمىز – الداعى 5 جىلدىڭ ىشىندە اگروونەركاسىپتىك كەشەندەگى ەڭبەك ونىمدىلىگى مەن قايتا وڭدەلگەن ونىمدەر ەكسپورتىن 2,5 ەسەگە ۇلعايتۋ. بۇل ورايدا ءبىز اۋىل شارۋاشىلىعى تاۋارىن وندىرۋشىلەر ءۇشىن قارجىلاندىرۋ مەن ءونىم وتكىزۋ رىنوكتارىنىڭ قولجەتىمدى بولۋىنا جانە ەكسپورتتى دامىتۋعا جۇمىس ىستەۋدەمىز.

سونىمەن بىرگە الەمدىك رىنوكتاعى احۋال تۇراقسىز، جىلدام وزگەرۋدە. ۆاليۋتالىق نەسيە تۇرىندە جۇكتەمەسى بار اگرارلىق سالا سىرتقى سەبەپتەردىڭ اۋىرتپالىعى جاعدايىندا دامۋدا. سوندىقتان ۇكىمەت پەن ۇلتتىق بانك اۋىل شارۋاشىلىعى تاۋارىن وندىرۋشىلەردى جانە بۇكىل اگرارلىق سەكتوردى قولداۋدىڭ قوسىمشا ءىس-شارالار پاكەتىن دايىندادى.

باستى ماقسات – سالانىڭ سەرپىندى وسۋىنە قاجەتتى جاعداي جاساۋ، جاڭعىرتۋدىڭ قارقىنىن تومەندەتپەۋ، كۇرمەۋى كۇردەلى ماسەلەلەردى شەشۋ.

ءىس-شارالاردىڭ ىشىندە اوك كاسىپورىندارىنا تۇسەتىن بورىشتىق جۇكتەمەلەردى ازايتۋعا جانە ولاردىڭ بورىشتىق اۋىرتپالىقتارىن ازايتۋعا ەرەكشە كوڭىل ءبولىنىپ وتىر.

ىسكە اسىرۋ تەتىكتەرى - قازاگرو حولدينگىنىڭ تالاپتارىن قايتا قۇرىلىمداۋ جانە دوللارسىزداندىرۋ, اوك دامىتۋدىڭ مەملەكەتتىك باعدارلاماسىنىڭ جاڭا قۇرالدارىن پايدالانۋ.

ءىس-شارالار پاكەتىندە قارجىلىق ينستيتۋتتاردىڭ، ونىڭ ىشىندە اوك دامىتۋدىڭ باعدارلاماسىن ىسكە اسىرۋ بويىنشا سەرىكتەس-بانكتەردىڭ جۇمىسىنا سەرپىن بەرەتىن بىرقاتار قارجىلىق تەتىكتەر بار.

«تسەسنابانك» «اگروبيزنەس 2020» باعدارلاماسى مەن كاسىپكەرلىكتى قولداۋعا ارنالعان مەملەكەتتىك باعدارلامالاردىڭ جوبالارىن ىسكە اسىرۋعا بەلسەندى اتسالىسىپ كەلەدى. ونىڭ ۇلەسىنە سالانى نەسيەلەندىرۋدىڭ 65% استامى تيەسىلى. سول سەبەپتەن، «تسەسنابانك» «قازاگرو» حولدينگىمەن بىرلەسە وتىرىپ، بەرىلگەن ۆاليۋتالىق نەسيەلەر مەن قارىزداردى قايتا قارجىلاندىرۋدى جانە ولاردىڭ مەرزىمدەرىن ۇزارتۋ ماسەلەسىن قولعا الدى.

بۇل جۇمىستار اياسىندا ۇكىمەت پەن ۇلتتىق بانك «تسەسنابانكتەن» 450 ملرد. تەڭگەگە اۋىل شارۋاشىلىعى نەسيەلەر پورتفەلىن ساتىپ الۋ تەتىكتەرىن پىسىقتاۋدا. بۇل بانكتەن قارىز الۋشى اگروونەركاسىپتىك سەكتور كاسىپورىندارىن قارجىلىق ساۋىقتىرۋدى قامتاماسىز ەتۋگە مۇمكىندىك بەرەدى، سونداي-اق «تسەسنابانكتىڭ» قارجىلىق تۇراقتالىعىن نىعايتادى. «تسەسنابانكتىڭ» اكتسيونەرلەرى بانكتى كاپيتالداندىرۋ ارقىلى جەكە قاراجاتتارى ەسەبىنەن قارىز الۋشىلاردى ساۋىقتىرۋعا قاتىسادى.

بۇل شارالاردى ىسكە اسىرۋ وتاندىق اۋىل شارۋاشىلىعى ونىمدەرىن وندىرۋشىلەردىڭ مۇددەسىن قورعايدى، نەسيەلەندىرۋدىڭ كولەمىن ارتتىرادى جانە اگرارلىق سەكتوردى جاڭعىرتۋ ساياساتىنا قولداۋ جاسايدى.

Abai.kz