1973 جىلدىڭ 4-9 قىركۇيەك كۇندەرى ازيا جانە افريكا جازۋشىلارىنىڭ V كونفەرەنتسياسى وتكەن بولاتىن. ءالى كۇنگە دەيىن اعا بۋىن قالامگەرلەرى اڭىز قىپ ايتاتىن ول شارانى قازاقستان جازۋشىلار وداعى وتكىزگەن ەدى.

كۇللى كەڭەستىك ادەبي كەڭىستىگىنىڭ نازارىن اۋدارتقان ول كونفەرەنتسينىڭ وتكەنىنە بيىل تۋرا 45 جىل تولىپ وتىر.

ارينە، بۇرىنعى زامانعا قاراعاندا، قازىر كونفەرەنتسيا، فورۋم، سيمپوزيۋم سياقتى حالىقارالىق شارالار ەشكىمگە تاڭسىق ەمەس.

قازاق ەلى تاۋەلسىزدىك جىلدارىندا ءار ءتۇرلى سالادا، ءار ءتۇرلى تاقىرىپتارعا ارنالعان جۇزدەگەن ەلارالىق باسقوسۋلار ۇيىمداستىردى.

قازاقستان جازۋشىلار وداعى دا وسى جىلدار اراسىندا كوپتەگەن حالىقارالىق ادەبي جيىندارعا مۇرىندىق بولىپ كەلدى.

ەندى بيىل اراعا 45 جىل سالا وتىرىپ، 20-21 قىركۇيەك ارالىعىندا قازاقستان جازۋشىلار وداعى «قازىرگى زامانعى ءسوز ەنەرگياسى» اتتى ۇلكەن ەۋرازيالىق ادەبي فورۋم وتكىزگەلى وتىر.

قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ تىكەلەي قولداۋىمەن ۇيىمداستىرىلىپ جاتقان بۇل فورۋم ەلوردامىز – استانا شاھارىنىڭ 20 جىلدىعىنا ارنالادى.

فورۋمعا ەۋرازيا قۇرلىعىنىڭ تۇكپىر-تۇكپىرىنەن الەمگە بەلگىلى قالامگەرلەر (ۇلىبريتانيا، گەرمانيا، قىتاي، رەسەي، تۇركيا، لاتۆيا، ۆەنگريا، پولشا، مولدوۆا، ارمەنيا، ۋكراينا، بولگاريا، موڭعوليا، ازەربايجان جانە ت.ب.), سول ەلدەردەگى جازۋشىلار ۇيىمدارىنىڭ باسشىلارى جانە ەلىمىزدىڭ بارلىق ايماقتارىنان قازاقتىڭ بەلدى اقىن-جازۋشىلارى قاتىسپاق.

فورۋمدا بۇگىنگى زامانداعى الەم ادەبيەتىنىڭ دامۋ بارىسى، ادەبيەتتەگى جاڭا وبرازدار مەن كوتەرەتىن سونى تاقىرىپتار، قالامگەر تاعدىرى مەن ونىڭ قوعامداعى ورنى، ادەبيەتتىڭ جاھاندىق پروبلەمالاردى شەشۋدەگى قۋاتى مەن ءرولى، اۋدارمانىڭ حال-احۋالى، سىننىڭ دامۋى، دراماتۋرگيانىڭ جاعدايى سياقتى ۇلكەن ءھام ماڭىزدى ماسەلەلەر تالقىلانادى.

بۇل فورۋم جاڭا زامان ادەبيەتىنىڭ ينتەللەكتۋالدىق رەسۋرستارىن جيناقتايتىن جانە حالىقارالىق ىنتىماقتاستىق پەن مادەني سۇحباتتاردى دامىتۋعا ارنالعان بيىلعى جىلدىڭ ەڭ ءىرى ادەبي جوباسى بولماق.

ادەبيەت تىنىسىن زەردەلەۋگە ارنالعان فورۋمدى وتكىزۋ ۇلتىمىز ءۇشىن ۇلكەن ابىروي جانە سونىمەن قاتار زور جاۋاپكەرشىلىك!

بارشاڭىزدى وسى فورۋمعا شاقىرا وتىرىپ، تومەندە اتالىپ وتىرعان شارانىڭ باعدارلاماسىن سالىپ وتىرمىن.

20 قىركۇيەك
ساع.10.00 دە فورۋمنىڭ سالتاناتتى اشىلۋ ءراسىمى.
«ادەبيەت جانە جاھاندىق ماسەلەلەر» جانە «ايماقتىق ادەبيەتتەردىڭ دامۋى» تاقىرىپتارى بويىنشا پلەنارلىق وتىرىس.
«زاماناۋي ەۋرازيالىق ادەبيەت» اتتى كىتاپ كورمەسى.
وتەتىن ورىنى: تاۋەلسىزدىك سارايى. (تاۋەلسىزدىك داڭعىلى، 52.).

21 قىركۇيەك
ساع.10.00 مەن 13.00 ارالىعىندا 4 سەكتسيا بويىنشا:
1.«جاڭا زامان پوەزياسى: كوتەرەتىن نەگىزگى تاقىرىپتار مەن ماسەلەلەر»،
2.«جاڭا زامان پروزاسى: كوتەرەتىن نەگىزگى تاقىرىپتار مەن ماسەلەلەر»،
3.«دراماتۋرگيانىڭ وزەكتى ماسەلەلەرى»،
4.«قازىرگى اۋدارما ءىسىنىڭ حال-احۋالى» تاقىرىپتارىندا باسقوسۋلار.

قوسىمشا:
فورۋم اياسىندا قازاقستان جازۋشىلار وداعى مەن يران جازۋشىلارىنىڭ قاۋىمداستىعى اراسىنداعى ىنتىماقتاستىق مەموراندۋمعا قول قويىلادى.

وتەتىن ورىنى: «Hilton Garden Inn Astana» قوناق ءۇيى، قابانباي باتىر داڭع. 15.

قازاقستان-رەسەي قالامگەرلەرىنىڭ كەزدەسۋى وتەدى.
(قر ۇلتتىق اكادەميالىق كىتاپحانا، دوستىق كوشەسى 11).

قر جازۋشىلار وداعى

Abai.kz