جۇمىس ساپارى كەزىندە الماتى اكىمى باۋىرجان بايبەك «سايران» وزەنىنىڭ اينالاسىن ارالاپ كوردى جانە كەلەر جىلى دا اباتتاندىرۋ جۇمىستارىن ودان ءارى جالعاستىرۋدى تاپسىردى، دەپ حابارلايدى اباي-اقپارات الماتى اكىمىنىڭ رەسمي سايتىنا سىلتەمە جاساپ.

بيىلعى جىلى سۋ قويماسىنىڭ باتىس بولىگىنىڭ بەتكەيلەرى رەتتەلدى، ساتىلى ءتۇسۋ جولى جوندەلدى، 7 گا جەر گازوندالدى. بۇلاردان وزگە، جارىق كوزدەرى ورناتىلدى، اسفالت توسەلىپ، بالالار جانە سپورت الاڭدارى كورىكتەندىرىلدى.

وسىعان ۇقساس جۇمىستار شىعىس بولىكتە دە اتقارىلدى، كوشە جيھازى قويىلىپ، جاڭادان 130 جارىق باعانالارى ورناتىلدى، ۆوركاۋت-الاڭى مەن جاعالاۋ ۆولەيبولىنىڭ الاڭى كورىكتەندىرىلدى. جۇگىرۋ مەن ۆەلوسيپەد تەبۋگە ارنالعان 5 كم جول جاسالدى.

ءوز كەزەگىندە مەگاپوليس اكىمى كەلەر جىلى دا وزەن ماڭىن اباتتاندىرۋ جۇمىستارىن جالعاستىرۋدى، ال اۋدان اكىمدىكتەرىنە وزەنگە جاقىن اۋماقتاردى كورىكتەندىرۋ، سپورت جانە بالالار الاڭدارىنىڭ سانىن كوبەيتۋدى تاپسىردى.

ايتا كەتەرلىگى، جالپى الماتىدا بيىلعى جىلى 524 كوشە جوندەلدى، 1400 ەسكى اۋلا جاڭاردى. 300 كم ارىق سالىندى جانە جوندەلدى، 800 كم ينجەنەرلىك جەلى تارتىلدى. قالانىڭ بارلىق جەر استى وتپەلى جولدارى جاڭاردى. جىل اياعىنا دەيىن بارلىق كوشە جارىقتارىنىڭ ۇشتەن ءبىرى جارىق ديودتى جانە ەنەرگيا جيناقتاۋشى شامدارعا اۋىستىرىلادى.

Abai.kz