بەيسەنبى, 29 شىلدە 2021
ءدىن مەن ءتىن 2608 26 پىكىر 26 قىركۇيەك, 2018 ساعات 10:11

حيدجاب كيگەن وقۋشىلاردىڭ اتا-انالارىنا ايىپپۇل سالىنىپ جاتىر

قر قوعامدىق دامۋ ۆيتسە-ءمينيسترى بەرىك ارىن مەكتەپتە حيدجاب كيگەن وقۋشى قىزداردىڭ اتا-اناسىنا ايىپپۇل سالىنىپ جاتقانىن ايتتى، - دەپ حابارلايدى اباي-اقپارات Baq.kz باسىلىمىنا سىلتەمە جاساپ.

سەنات وتىرىسىندا جوعارعى پالاتا دەپۋتاتى ناريمان تورەعاليەۆ قازىر كەيبىر وبلىستاردا مەكتەپ فورماسىن كيمەيتىن وقۋشىلار كەزدەسەتىنىن ايتتى. سەناتور بۇنداي بالالاردىڭ سانى توقتاماي تۇرعانىنا الاڭداۋشىلىق ءبىلدىردى.

«بۇگىنگى كۇنى قانشا بالا فورما كيمەي، مەكتەپكە بارا الماي وتىر؟ سونىڭ سانى بار ما؟ بۇل ماسەلەنى قالاي شەشىپ جاتىرسىزدار؟ بالاباقشالاردا وسىنداي جاعدايلار كەزدەستى مە؟», - دەپ سۇرادى ناريمان تورەعاليەۆ.

«بىلتىر جىل بىتكەن كەزدە، وسى جىلدىڭ باسىندا رەسپۋبليكا بويىنشا 2,5 مىڭعا جۋىق قىز مەكتەپكە حيدجاب كيىپ كەلگەن. ءتۇسىندىرۋ جۇمىستارىنىڭ ناتيجەسىندە بۇگىنگى كۇنى ولاردىڭ سانى 815-كە ازايدى. جالپى، جىلدان جىلعا بۇل ماسەلەنى شەشىپ جاتىرمىز. بۇنىڭ ءبىر جولى «ءبىلىم تۋرالى» زاڭدا جازىلعان. وندا «اتا-انالار بالالارىن مەكتەپكە اپارۋعا جانە مەكتەپتىڭ فورماسىن ساقتاۋعا مىندەتتى. ونى ىستەمەسە، جاۋاپكەرشىلىككە تارتىلادى» دەلىنگەن. ءبىلىم ءمينيسترىنىڭ بۇيرىعى بار. ول جەردە مەكتەپ فورماسى تۋرالى جازىلعان. كەيىنگى كەزدە تاعى دا ءبىر داۋ تۋىپ، بىزگە كوپ سىن ايتىلاتىن بولدى. مىسالى، كەيبىرەۋلەر بىزگە «ميني يۋبكا، جابىسقان كيىمدەرگە قارامايسىڭدار، نەگە مىنا (حيدجاب – اۆت.ەسكەرتۋى) جاعىنا عانا قارايسىڭدار» دەيدى. ءبىز بۇل تۋرالى دا ءوز ۇسىنىستارىمىزدى ءبىلىم مينيسترلىگىنە جىبەردىك. ولار وزدەرىنىڭ بۇيرىعىنا وزگەرىستەر ەنگىزىپ جاتىر. بۇل جەردە مەملەكەتتىكڭ تۇعىرى انىق: مەكتەپ دىننەن الشاق بولۋى كەرەك. وسى تۇعىردى ۇستانۋىمىز كەرەك»، - دەدى بەرىك ارىن سەنات وتىرىسىندا.

ۆيتسە-مينيستر بىلتىر بۇكىل بالاباقشادا تەكسەرۋ جۇرگىزىلگەنىن دە ايتتى. ولاردىڭ اراسىنان ءدىني باعىتتاعى بالاباقشالار انىقتالعان. ولار الماتى قالاسى مەن باسقا بىرنەشە قالادا تىركەلگەن. بۇل بالاباقشالاردىڭ ءبارىنىڭ جۇمىسى جەرگىلىكتى اتقارۋشى ورگانداردىڭ كۇشىمەن توقتاتىلعان.

«بۇنداي مونيتورينگ ۇدايى جۇرگىزىلىپ تۇرادى. وسىلايشا، تەك قانا وزدەرىنىڭ ءدىني سەكتالارى، توپتارىنىڭ بالالارى باراتىن بالاباقشالار، ورىندار، فاكتىلەر كەزدەسكەن», - دەپ تولىقتىردى ب.ارىن.

ۆيتسە-مينيستر سەنات كۋلۋارىندا بەرگەن سۇحباتىندا قوعامدىق دامۋ مينيسترلىگى بعم-عا ميني يۋبكامەن قاتار، دەكولتە، باعالى اشەكەيلەر تاعۋعا تىيىم سالۋ تۋرالى ۇسىنىستار جاساعانىن ايتتى. قازىر بعم وسى بويىنشا جۇمىس ىستەپ جاتىر ەكەن. سونداي-اق، ول قازىر حيدجابپەن جۇرگەن قالعان 815 قىزبەن ءتۇسىندىرۋ جۇمىستارى جۇرگىزىلىپ جاتقانىن ايتتى.

«جالپى، كورسەتكىش بىرتىندەپ ازايىپ جاتىر. وقۋ جىلى باستالعالى ءبىر اي بولماي جاتىپ، ادامدار ءتۇسىندى، كوبى اداسىپ جۇرگەنىن ءبىلدى، كەيبىرى بۇنى ءالى دۇرىس دەپ قابىلدايدى. وسى بويىنشا جۇمىس ءارى قاراي جۇرگىزىلەدى. قازىر دە شارالار قابىلدانىپ، ايىپپۇل سالىنىپ جاتىر. كەشە ءبىزدىڭ مۋفتي ءسوز سويلەپ، «كامەلەت جاسقا تولماعان بالالاردى ورامال تاققىزىپ، ماجبۇرلەۋگە بولمايدى. بۇل دىنگە قاراما-قايشى، بۇنداي يسلام شاريعاتىندا جوق» دەدى. حيدجاب كيگەن قىزدار كوپتەگەن وڭىردە، نەگىزىنەن قازاقستاننىڭ وڭتۇستىگى مەن باتىسىندا كەزدەسەدى», - دەدى بەرىك ارىن.

اتاپ وتسەك، بۇگىن پارلامەنت سەناتى الەۋمەتتىك - مادەني دامۋ جانە عىلىم كوميتەتىنىڭ كەڭەيتىلگەن وتىرىسى ءوتتى. جيىندا «قر كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قر زاڭ جوباسى قارالدى.

Abai.kz

26 پىكىر