مال ۇرلىعى جانە ادام ولىمىنە اكەلىپ سوعاتىن جول قوزعالىسى ەرەجەلەرىن ساقتاماۋ سالاسىنداعى قۇقىق بۇزۋشىلىقتارعا جازانى قاتاڭداتۋ تالاپ ەتىلەدى. بۇل تۋرالى بۇگىن قر پارلامەنتى سەناتىنداعى زاڭ شىعارۋ پروتسەسىن جەتىلدىرۋ ماسەلەلەرى جونىندەگى ۇكىمەت ساعاتىندا جوعارى پالاتا سپيكەرى قاسىم-جومارت توقاەۆ ايتتى. بۇل تۋرالى Abai.kz اقپاراتتىق پورتالى حابارلايدى. 

«زاڭ شىعارۋ پروتسەسىنىڭ جەتكىلىكتى تۇردە ۇيىمداستىرىلماۋى مەن جوسپارلانباۋىنىڭ سالدارى زاڭ جوبالارىنىڭ رەتسىز، ادەتتە، كۇنتىزبەلىك جىلدىڭ سوڭعى ايلارىندا نەمەسە سەسسيا اياقتالاتىن كەزدە ۇسىنىلۋى بولىپ تابىلادى. مۇنداي تاجىريبە زاڭ جوبالارىمەن جۇرگىزىلەتىن جۇمىستىڭ ساپاسىنا اسەر ەتپەي قويمايدى»، — دەدى ول.

سەنات توراعاسى زاڭ جوبالارىنىڭ تۇجىرىمدامالىق نەگىزىنىڭ ساپاسىنا دا توقتالىپ، كەيبىر جاعدايلاردا زاڭ جوباسىن رەتتەۋگە ءتيىس نەگىزگى ماسەلەلەر تۇجىرىمدامالاردا قامتىلماي جاتاتىندىعىن باسا ايتتى.

«اتالعان جاعداي ازىرلەۋشىلەردىڭ تاراپىنان زاڭ جوبالارىنىڭ مازمۇنىنا بايلانىستى، پارلامەنت قابىلداعان جاعدايدا ولاردى ىسكە اسىرۋ تاسىلدەرىنە قاتىستى ايقىن كوزقاراستىڭ جوق ەكەندىگىن كورسەتەدى»، — دەدى سەنات سپيكەرى.

قاسىم-جومارت توقاەۆ زاڭ شىعارۋ جۇيەسىنىڭ نەگىزىنە قاتىستى تەڭگەرىمدى ۇستانىمنىڭ بولماۋى — ەرەكشە تالقىلاۋ مەن قاراستىرۋدى قاجەت ەتەتىن بولەك تاقىرىپ ەكەندىگىن دە اتاپ ءوتتى.

«ماسەلەن، كەيبىر باعىتتار بويىنشا ءبىز قاتاڭداتۋ ۇستانىمدارىن باسشىلىققا الساق، باسقا سالالاردا بوساڭدىق پەن ەركىندىككە جول بەرەمىز.

وسىلايشا، تۇتاستاي قازاقستاننىڭ زاڭدارى ءوزارا ىشكى قيسىننان اجىراپ، سايكەسىنشە ونىڭ قۇقىقتىق باعدارى زاڭعا باعىنۋ، زاڭدى قۇرمەتتەۋ، قۇقىق بۇزۋشىلىقتاردى ازايتۋ سياقتى باستى مۇددەلەردەن الشاقتاي تۇسەدى. ونىڭ ۇستىنە، جىنىستىق قول سۇقپاۋشىلىققا قارسى، ەسىرتكى قۇرالدارىنىڭ اينالىمى مەن مال ۇرلىعى جانە ادام ولىمىنە اكەلىپ سوعاتىن جول قوزعالىسى ەرەجەلەرىن ساقتاماۋ سالاسىنداعى قۇقىق بۇزۋشىلىقتاردىڭ كوبەيۋى ولارعا سالىناتىن جازانى قاتاڭداتۋدى تالاپ ەتەدى»،- دەدى سەنات توراعاسى.

ونىڭ ايتۋىنشا، وسىنداي سيپاتتاعى قىلمىستار قوعام ىشىندە وتكىر پىكىرتالاستار تۋدىرۋدا، سوندىقتان دا جەڭىل جازا قولدانۋ نەمەسە، تىپتەن، ءوزارا كەلىسىم جولىمەن (مەدياتسيا) قىلمىستىق جاۋاپكەرشىلىكتەن قۇتىلۋ جاعدايلارىنا ازاماتتار تاراپىنان كەلىسپەۋشىلىك ءبىلدىرۋ — زاڭدى قۇبىلىس.

«ۇكىمەتتىڭ وسى ماسەلەگە ايرىقشا ءمان بەرىپ، باسا نازار اۋدارۋىن سۇرايمىز»،- دەدى قاسىم-جومارت توقاەۆ.

Abai.kz