تۇركىمەنستان پرەزيدەنتى گۋربانگۋلى بەردىمۇحامەدوۆ "تۇركىمەنستان حالقىن ەلەكتر قۋاتى، گاز، اۋىزسۋ جانە اس تۇزىمەن قامتاماسىز ەتۋدى رەتكە كەلتىرۋ تۋرالى" قاۋلى قابىلدادى. قۇجاتتا 2019 جىلدىڭ 1 قاڭتارىنان باستاپ "تۇركىمەنستان تۇرعىندارى ەلەكتر قۋاتى، گاز، اۋىزسۋ جانە اس تۇزىمەن جەڭىلدەتىلگەن باعامەن اقىلى تۇردە قامتمامسىز ەتىلەتىنى" ايتىلعان.
تۇركىمەنستاندا حالىق ءماسليحاتىنىڭ 25 قىركۇيەكتە وتكەن جينالىسىندا ەل پرەزيدەنتى گۋربانگۋلى بەردىمۇحامەدوۆ "قيىن كەزەڭدە گازعا، ەلەكتر قۋاتىنا، اۋىزسۋ مەن تۇز جەڭىلدىكپەن بەرىلگەنىن" ەسكە سالعان.
"بىراق زامان وزگەرىپ جاتىر. ءبىز قازىر جاڭا ەكونوميكالىق جاعدايدا ءومىر ءسۇرىپ جاتىرمىز. قازىرگى كۇننىڭ تالابى - تابيعي رەسۋرستاردى ءتيىمدى پايدالانۋ، قوعام، مەملەكەت جانە ءاربىر ادامنىڭ نارىقتىق قاتىناستارعا بەيىمدەلۋدى اقىلعا سالىپ شەشۋ. قازىر حالىقتىڭ تابىسى الدەقايدا ءوستى. سول سەبەپتى كوممۋنالدىق قىزمەتكە جەڭىلدىكتەر الىپ تاستالادى" دەگەن پرەزيدەنت.
ەلەكر قۋاتى، گاز، اۋىزسۋ تولەمى العاشقى پرەزيدەنت ساپارمۇرات نيازوۆتىڭ تۇسىندا - 1992 جىلى جويىلعان ەدى. اۋەلدە تۇركىمەنستان ۇكىمەتى اتالعان كوممۋنالدىق قىزمەتتەردى 10 جىل مەرزىمگە تەگىن تۇتىنۋدى ەنگىزىپ، كەيىن ونى 2030 جىلعا دەيىن ۇزارتقان.
سوڭعى جىلدارى ەلدە استىق پەن ۇن تاپشىلىعى تۋىنداي باستاعان. تۇركىمەن تەلەارنالارى دۇكەن سورەلەرىندە ازىق-تۇلىك تولىپ تۇرعانى تۋرالى حابارلاردى اۋىق-اۋىق كورسەتىپ، پرەزيدەنت "مەملەكەت ازىق-تۇلىكپەن ءوزىن-ءوزى تولىق قامتيتىن جاعدايعا جەتكەنى" تۋرالى مالىمدەيتىنىنە قاراماستان، دۇكەندەردە ازىق-تۇلىك تاپشىلىعى ءجيى تۋىندايدى.
Abai.kz
