نۇرسۇلتان نازارباەۆ پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى عابيت بايجانوۆتى قابىلدادى، دەپ حابارلايدى اباي-اقپارات اقوردانىڭ سايتىنا سىلتەمە جاساپ.

كەزدەسۋ بارىسىندا مەملەكەت باسشىسى قاۋىپسىزدىك كەڭەسىنىڭ ۇلتتىق قاۋىپسىزدىكتى، زاڭدىلىق پەن قۇقىقتىق ءتارتىپتى قامتاماسىز ەتۋ، سونداي-اق ەلىمىزدىڭ قورعانىس قابىلەتىن نىعايتۋ سالاسىنداعى مەملەكەتتىك ساياساتتى ۇيلەستىرۋدى جۇزەگە اسىراتىن ارنايى ورگان ەكەنىن اتاپ ءوتتى.

– قاۋىپسىزدىك كەڭەسى تۋرالى جاڭا زاڭ كەڭەستىڭ وكىلەتتىگىن مەيلىنشە كەڭەيتەدى. وسىعان بايلانىستى نورماتيۆتىك قۇقىقتىق بازانى، سونىڭ ىشىندە قۇقىق قورعاۋ جانە ارنايى قىزمەت ورگاندارىنىڭ جۇمىسىن رەتتەيتىن قۇجاتتاردى ەگجەي-تەگجەيلى زەرتتەۋ قاجەت، – دەدى قازاقستان پرەزيدەنتى.

ع.بايجانوۆ نۇرسۇلتان نازارباەۆقا قاۋىپسىزدىك كەڭەسىنىڭ كەزەكتى وتىرىسىن وتكىزۋگە دايىندىق بارىسى جونىندە مالىمدەدى.

كەزدەسۋ سوڭىندا مەملەكەت باسشىسى قاۋىپسىزدىك كەڭەسىنىڭ الداعى جۇمىستارى جونىندە بىرقاتار ناقتى تاپسىرما بەردى.

Abai.kz