سانكت-پەتەربۋرگ ورمان تەحنولوگيالىق ۋنيۆەرسيتەتىنىڭ رەكتورىنا وسى وقۋ ورنىنىڭ تۇلەگى ءاليحان بوكەيحاننىڭ مەموريالدى تاقتاسىن ورناتۋ تۋرالى ۇسىنىسىن جولداندى. ۇسىنىستى ءماجىلىس دەپۋتاتى ازات پەرۋاشەۆ جولدادى.

حاتتا ەسىمدەرى تاريحقا ەنگەن جانە الەمگە تانىمال كورنەكتى تۇلعالار اتالمىش جوعارعى وقۋ ورنىنىڭ قابىرعاسىندا وقىپ، جوعارى ءبىلىم العانى جونىندە ايتىلعان. ۋنيۆەرسيتەت تۇلەكتەرىنىڭ ءبىرى –  XX عاسىردىڭ باسىنداعى رەسەي مەن قازاقستاننىڭ ءىرى قوعام ءارى مەملەكەتتىك قايراتكەرى ءاليحان بوكەيحان.

ول I مەملەكەتتىك دۋمانىڭ دەپۋتاتى، ۋاقىتشا ۇكىمەتتىڭ كوميسسارى بولعان.
1917 جىلدىڭ قاراشا ايىندا بۇكىلرەسەيلىك قۇرىلتاي جينالىسىندا دەپۋتات بولىپ سايلاندى. حح عاسىردىڭ باسىنداعى قازاق ۇلتتىق قوزعالىسىنىڭ كوشباسشىسى، «الاش-وردا» قازاق اۆتونومياسىنىڭ نەگىزىن قالاۋشى جانە جەتەكشىسى بولعاندىقتان ول شىن مانىندە قازاقستاننىڭ مەملەكەتتىلىگىن قالىپتاستىرۋداعى ءبىرتۋار تۇلعا بولىپ سانالادى.

«عالىم جانە مەملەكەت قايراتكەرى رەتىندە ونىڭ وراسان زور ەڭبەگىن مويىنداپ، ا.بوكەيحانعا قۇرمەت بىلدىرە وتىرىپ، «اق جول» فراكتسياسىنىڭ دەپۋتاتتارى سىزدەن ۋنيۆەرسيتەتتىڭ باس وقۋ كورپۋسىنىڭ عيماراتىنا كەلەسىدەي جازبامەن مەموريالدى تاقتانى ورناتۋ مۇمكىندىگىن قاراستىرۋىڭىزدى سۇرايدى:

«بۇل جەردە 1890-1894 جىلدارى I مەملەكەتتىك دۋمانىڭ دەپۋتاتى، قازاقستان بويىنشا ۋاقىتشا ۇكىمەتتىڭ كوميسسسارى، «الاش-وردا» قازاق اۆتونومياسىنىڭ جەتەكشىسى، پۋبليتسيست، عالىم-ەنتسيكلوپەديست – ءاليحان نۇرمۇحامەدۇلى بوكەيحان (بوكەيحانوۆ) ءبىلىم العان».

بۇل جوبانى قارجىلاندىرۋعا قاتىستى بارلىق ماسەلەلەردى «اق جول» پارتياسى جۇزەگە اسىرادى »، - دەپ ايتىلعان ازات پەرۋاشەۆ قول قويعان ءوتىنىش حاتتا.

Abai.kz