سەنبى, 11 ءساۋىر 2020
COVID-19 قازاقستاندا. جۇقتىرعاندار — 812. جازىلعاندار — 64. قايتىس بولعاندار — 10
3698 3 پىكىر 1 قازان, 2018 ساعات 11:03

ەلىمىزدە زەينەتاقى 2019 جىلدىڭ قاڭتارىنان باستاپ كوبەيەدى

قر ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا 2019 جىلدىڭ قاڭتار ايىندا ىنتىماقتى زەينەتاقىنىڭ يندەكستەلەتىنىن ايتتى، دەپ حابارلايدى اباي-اقپارات قازاقپاراتقا سىلتەمە جاساپ.

«قازاقستاندا زەينەتاقىنى يندەكستەۋ مەملەكەت باسشىسىنىڭ تاپسىرماسى بويىنشا جىل سايىن جانە جىلدىڭ باسىندا جۇزەگە اسىرىلادى. ول ينفلياتسيادان 2 پروتسەنتكە الدىدا جۇرەدى، بيىلعى جىلى ءبىز بۇل كورسەتكىشتى 9 پروتسەنتكە جەتكىزدىك. 2019 جىلدىڭ 1 قاڭتارىنان باستاپ، يندەكستەۋ ينفلياتسيانىڭ 2 پروتسەنتىمەن قوسا جۇرگىزىلەدى»،-دەدى مينيستر پارلامەنت ماجىلىسىندە وتكەن جيىننان سوڭ.

ونىڭ سوزىنشە، بازالىق زەينەتاقىنىڭ جاڭا فورماتى ونى 67 پروتسەنتكە كوتەرۋ دەگەندى بىلدىرەدى.

«1 ملن-عا جۋىق زەينەتكەر بازالىق زەينەتاقىنى ەڭ تومەنگى ءومىر ءسۇرۋ كورسەتكىشىنەن 100 پروتسەنت كولەمىندە الا باستادى. ياعني، بازالىق زەينەتاقى ولار ءۇشىن ەكى ەسەگە ارتتى. جالپى، زەينەتاقى بازالىق، ىنتىماقتى جانە جيناقتاۋشى بولىپ ۇشكە بولىنەدى. ىنتىماقتى زەينەتاقىنى ءبىز ينفلياتسيانى نەگىزگە الا وتىرىپ، 2 پروتسەنتكە ارتىعىمەن يندەكستەيمىز. ال بازالىق زەينەتاقىنى مەملەكەت باسشىسىنىڭ تاپسىرماسى بويىنشا ورتاشا العاندا 67 پروتسەنتكە ارتتىردىق»،-دەپ ءتۇسىندىردى مينيستر.

سونداي-اق ول قازىرگى تاڭدا قازاقستانداعى زەينەتاقىنىڭ دەڭگەيى كورشىلەس مەملەكەتتەر مەن تمد-عا مۇشە ەلدەردىڭ قاي-قايسىسىنان دا جوعارى ەكەندىگىن اتاپ ءوتتى.

«زەينەتاقىنىڭ ورتاشا مولشەرى 3 كومپونەنتتى قوسا العاندا 101 مىڭ تەڭگەنى قۇرايدى»،-دەپ تۇيىندەدى ۆەدومستۆو باسشىسى.

Abai.kz

3 پىكىر