سەناتور م.قۇل-مۇحاممەد ازيا جانە ەۋروپا پارلامەنتشىلەرىنە ارال ماسەلەسى تۋرالى ايتىپ بەردى، - دەپ حابارلايدى اباي-اقپارات قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتىنە سىلتەمە جاساپ.

پارلامەنت سەناتىنىڭ دەپۋتتاتتارى مۇحتار قۇل-مۇحاممەد جانە مۇرات باقتيارۇلى بريۋسسەلدە وتكەن «ازيا – ەۋروپا» فورۋمى اياسىندا پارلامەنتتىك ارىپتەستىكتىڭ 10-شى كەزدەسۋىنە قاتىستى.

ساپار بارىسىندا قازاقستاندىق پارلامەنتشىلەر «كليماتتىڭ وزگەرۋى جانە قورشاعان ورتا: قاۋىپسىزدىككە اسەر ەتۋ» تاقىرىبىنداعى 3-ءشى پىكىرسايىسقا قاتىستى. شارا تاقىرىبى كليماتتىق وزگەرىستەر مەن ازيا جانە ەۋروپاداعى بەلەڭ العان ەكولوگيالىق ماسەلەلەرگە ارنالدى. اتاپ ايتقاندا، تۇراقتى دامۋ جانە قالدىقسىز ەكونوميكا، قالالىق اۋدانداردى باسقارۋ، سۋ رەسۋرستارى سالاسىنداعى ىنتىماقتاستىق، قالدىقتار مەن تازا تەحنولوگيالار جانە ازىق-تۇلىك قاۋىپسىزدىگى ماسەلەلەرى تالقىلاندى.

سەناتور مۇحتار قۇل-مۇحاممەد ءوز بايانداماسىندا قازاقستان مەن حالىقارالىق قاۋىمداستىقتار تاراپىنان ارال تەڭىزى ماسەلەلەرىن شەشۋدە قابىلدانىپ جاتقان شارالار تۋرالى اڭگىمەلەدى. دەپۋتات جەرگىلىكتى جانە جاھاندىق ەكوجۇيەدە الەمدەگى ءىرى سۋ قويمالارىنىڭ ءبىرى – ارال تەڭىزىنىڭ تارتىلۋىنىڭ سالدارى تۋرالى حابارلادى. م.قۇل-مۇحاممەد ۇلكەن ارال ماسەلەسى ءالى دە تولىق شەشىمىن تاپپاعان كۇيىندە قالىپ وتىر، دەگەن پىكىر ءبىلدىردى. «سوڭعى جىلدارى ايماقتاعى كەيبىر مەملەكەتتەر كورشى ەلدەرمەن كەلىسىمگە كەلمەستەن، سۋ اعاتىن تابيعي ارنالاردى بوگەي وتىرىپ، قوسىمشا سۋ ەلەكتر ستانتسيالارىنىڭ قۇرىلىسى بويىنشا جوبالاردى قولعا الۋدا. ايماقتا ساپالى اۋىز سۋ تاپشى. ايماقتاعى ميلليونداعان ادامداردىڭ دەنساۋلىعى مەن الەۋمەتتىك احۋال سۋدى دۇرىس پايدالانۋعا تىكەلەي بايلانىستى بولىپ وتىر»، - دەپ اتاپ ءوتتى سەناتور.

بايانداما بارىسىندا ارال باسسەينىنىڭ ەكوجۇيەسىن قۇتقارۋ بويىنشا حالىقارالىق كۇش-جىگەردى كۇشەيتۋگە باعىتتالعان بىرقاتار ۇسىنىستار ايتىلدى. «ءبىز – پارلامەنتشىلەر «ازيا-ەۋروپا» فورۋمىنداعى پارلامەنتارالىق ىنتىماقتاستىق جانە ىقپالداستىق اياسىندا ورتالىق ازياداعى سۋ رەسۋرستارىن باسقارۋ جونىندە تۋىنداۋى مۇمكىن جانجالداردى ەسكەرە وتىرىپ، «سۋ ديپلوماتياسىن» ىلگەرىلەتۋىمىز قاجەت. ايماقتىق جانە ترانسشەكارالىق ىنتىماقتاستىق بويىنشا جاڭا، اۋقىمدى ءارى وڭتايلى باعدارلامالار كەرەك»، - دەپ ەسەپتەيدى م.قۇل-مۇحاممەد. سونداي-اق، سەناتور سۋ رەسۋرستارىن باسقارۋ ماسەلەلەرى بويىنشا ۇلتتىق زاڭنامالاردى جەتىلدىرۋ، كليماتتىڭ وزگەرۋى مەن قورشاعان ورتانى ساۋىقتىرۋ بويىنشا بىرلەسكەن كۇرەستە حالىقارالىق ۇيىمداردىڭ قىزمەتىنە قارقىن قوسۋ قاجەتتىگىن اتاپ ءوتتى.

Abai.kz