«نۇرلى جول» ينفراقۇرىلىمدى دامىتۋ باعدارلاماسى ىسكە اسىرىلا باستاعان ۋاقىتتان بەرى مەملەكەتتىك باعدارلامانىڭ ەلىمىزدىڭ ءجىو وسۋىنە، جاڭا جۇمىس ورىندارىن اشىپ، الەۋمەتتىك ينفراقۇرىلىمدى جاقسارتۋعا ەلەۋلى اسەر ەتىپ جاتقانى بايقالۋدا. وعان قوسا زاماناۋي ءارى ساپالى اۆتوماگيسترالداردى سالۋعا باسىمدىق بەرىلگەن، - دەپ حابارلايدى اباي-اقپارات قر پرەمەر-ءمينيسترىنىڭ رەسمي سايتىنا سىلتەمە جاساپ.

«نۇرلى جول» باعدارلاماسىن ىسكە اسىرۋ قورىتىندىلارى قر ينۆەستيتسيالار جانە دامۋ مينيسترلىگى بەرگەن مالىمەتتەرگە سايكەس ازىرلەنگەن ينفوگرافيكالاردا ۇسىنىلعان.

مەملەكەت باسشىسى 2017 جىلعى قاڭتارداعى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىندا «نۇرلى جول» باعدارلاماسى ەكى جىل ىشىندە ءوزىن تولىق اقتاعانىن اتاپ ءوتىپ، ونى ەكونوميكانىڭ تولىققاندى درايۆەرى رەتىندە ودان ءارى دامىتۋ مىندەتىن قويعان بولاتىن.

«بيىل رەسپۋبليكالىق ماڭىزى بار 4,6 مىڭ شاقىرىم اۆتوجول قۇرىلىسى مەن قايتا جاڭعىرتۋ جۇمىستارى بويىنشا 23 جوبانى ىسكە اسىرۋ كوزدەلگەن. جىل سوڭىنا دەيىن ونىڭ 528 شاقىرىمى پايدالانۋعا بەرىلەدى. ەلىمىزدىڭ كولىك جانە ترانزيت الەۋەتىن تولىق اشۋ ءۇشىن كورشى ەلدەرمەن ۇيلەسىمدى ءىس-قيمىل قاجەت. جۇكتەردىڭ ەركىن ءترانزيتىن، كولىك دالىزدەرىن قۇرۋ مەن ولاردى جاڭعىرتۋ ءىسىن قامتاماسىز ەتۋ كەرەك. كولىك ينفراقۇرىلىمىن باسقارۋعا، قىزمەت كورسەتۋ دەڭگەيىن ارتتىرۋعا جانە اكىمشىلىك كەدەرگىلەردى جويۋعا ەرەكشە كوڭىل اۋدارۋ قاجەت. ترانسكاسپي ءدالىزى بويىنشا تاسىمالداۋ كولەمىنىڭ ۇلعايۋىنا بايلانىستى قۇرىق پورتىن سالۋدىڭ ەكىنشى كەزەڭى – اۆتوموبيل وتكەلى قۇرىلىسىن ىسكە اسىرۋعا كىرىسۋ قاجەت»، — دەلىنگەن جولداۋدا.

2018 جىلى باعدارلاما اياسىندا اۆتوجولداردى سالۋ كەزىندە كوپتەگەن جۇمىس ورىندارى اشىلدى. ماسەلەن، ەگەر 2017 جىلى قۇرىلعان 100 مىڭ جۇمىس ورنىنىڭ 70% اۆتوجولدار قۇرىلىسىنا باعىتتالعان بولسا، 2018 جىلى رەسپۋبليكالىق جولداردى سالۋ سالاسىنىڭ وزىندە 75 مىڭعا جۋىق جۇمىس ورنى قۇرىلدى.

«نۇرلى جول» اياسىندا 2020 جىلعا دەيىن 6,5 مىڭ شاقىرىم اقىلى جولدى پايدالانۋعا بەرۋ جوسپارلانعان. ونىڭ ىشىندە وسى جىلى — 471 شاقىرىم. بۇل — «استانا – تەمىرتاۋ»، «الماتى – قاپشاعاي»، «الماتى – قورعاس».

جالپى 2020 جىلعا قاراي 7 مىڭ شاقىرىمعا جۋىق جولدى رەكونسترۋكتسيالاپ، سالۋ كوزدەلگەن. سونىمەن قاتار، ترانزيتتىك كونتەينەرلىك تاسىمالدار سانى 10 ەسەگە — 2 ملن كونتەينەرگە دەيىن ۇلعايتىلادى. ترانزيتتىك اۆيا جولاۋشىلار اعىنىن 4 ەسەگە — 1,6 ملن-عا دەيىن ءوسىرۋ جوسپاردا بار.  

Abai.kz