مەملەكەت باسشىسى نۇرسۇلتان نازارباەۆتىڭ قازاقستان حالقىنا جولداۋىن نەگىزگە الا وتىرىپ، بۇقارالىق تۇتىنۋ تاۋارلارى بويىنشا ىشكى نارىقتى قولداۋ تەتىكتەرىن ازىرلەۋ كەرەك.

بۇل تۋرالى استانادا ءوتىپ جاتقان «دەموكراتيالىق كۇشتەردىڭ «قازاقستان-2050» جالپىۇلتتىق كوالتسياسىنىڭ وتىرىسىندا «اق جول» دەموكراتيالىق پارتياسىنىڭ توراعاسى، پارلامەنت ءماجىلىسىنىڭ دەپۋتاتى ازات پەرۋاشەۆ اتاپ ءوتتى.

«اق جول» پارتياسىنا البەتتە، كاسىپكەرلىكتىڭ دامۋىنا نەگىزدەلگەن بلوك وتە ماڭىزدى بولىپ وتىر. سالىقتىق امنيستيا تۋرالى ايتا كەتەيىن. سالىقتىق امنيستيا تۋرالى جولداۋ بارىسىندا پرەزيدەنت «بىرىڭعاي سىزىپ تاستاۋ ەمەس، ايىپپۇلدار مەن ءوسىمپۇلداردىڭ امنيستيالاۋ» تۋرالى ايتىپ ءوتتى. بۇل وتە كەرەمەت باستاما. نەلىكتەن ەكەنىن ايتىپ بەرەيىن. بۇگىنگى تاڭدا ءىرى جانە ورتا بيزنەسكە قاتىستى سالىقتىق تەكسەرىس سالىقتىق ەسەپ الۋ كەزىندە ايىپپۇلعا اكەلىپ سوعاتىن قاتەلىكتىڭ بارىن انىقتاپ، سوڭعى بەس جىل مەرزىمىمەن بىرگە ايىپپۇلدىڭ مولشەرىنەن ءتورت ەسە كوپ الاشاقتى تولەۋگە مىندەتتەۋى مۇمكىن. وسىلايشا، كاسىپكەر بانكروتقا ۇشىراۋ جاعدايىنا جەتەدى»، - دەدى «اق جول» دەموكراتيالىق پارتياسىنىڭ توراعاسى.

ازات پەرۋاشەۆ وسى ماسەلەنى شەشۋ ءۇشىن «اق جول» پارتياسى ۇكىمەتكە بىرنەشە رەت شىققانىن اتاپ ءوتتى.

«مەملەكەت باسشىسىنىڭ ساياسي جىگەرىنىڭ ارقاسىندا بۇل ماسەلەنى جاڭاشا تارتىپتە قاراۋ مۇمكىندىگى تۋىپ وتىر. ارىپتەستەرىمە ۇندەي وتىرىپ، كاسىپكەرلەردىڭ قۇقىعى ءۇشىن ماڭىزدى قادامدار جاساۋعا شاقىرامىن. ەكىنشى ماڭىزدى ماسەلە - ەكونوميكالىق ساياساتتىڭ باعىتى. بىزدە ىشكى نارىقتىڭ مۇمكىندىكتەرى باعالانا بەرمەيدى. كەز كەلگەن دۇكەنگە كىرسەڭىز، يمپورتقا تاۋەلدىلىك 60-تان 80 پايىزعا كورسەتكىشكە يە ەكەنىن بايقاۋعا بولادى. نەلىكتەن پلاستيك قالامدى قىتايدان الىپ كەلۋىمىز كەرەك؟ ءتىس ششەتكاسىن دا شىعارا المايمىز با؟ مىنە، سوندىقتان پرەزيدەنتتىڭ جولداۋىندا كورسەتىلگەن تاپسىرمالار بۇل ماسەلەگە ءمان بەرۋگە شاقىرادى. ۇكىمەت وسى ماسەلەنى نازارعا السا، ءبىزدىڭ فراكتسيا دا جۇمىلا كىرىسەدى. ۇكىمەتكە بۇقارالىق تۇتىنۋ وندىرىسىنە نەگىزدەلگەن ىشكى نارىقتى قولداۋعا ارنالعان تەتىكتەردى تابۋعا كومەكتەسۋ كەرەك»، - دەدى ازات پەرۋاشەۆ.

Abai.kz