جاڭا جولداۋدا الەۋمەتتىك سالاداعى ماسەلەلەرگە ايرىقشا ءمان بەرىلىپ وتىر. بۇل تۋرالى بۇگىن استانادا ەلباسى جولداۋىنداعى مىندەتتەردى ىسكە اسىرۋعا ارنالعان قحا كەڭەسىنىڭ كەڭەيتىلگەن وتىرىسىندا قازاقستان حالقى اسسامبلەياسى توراعاسىنىڭ ورىنباسارى - حاتشىلىق مەڭگەرۋشىسى لەونيد پروكوپەنكو ءمالىم ەتتى

«جاڭا جولداۋدىڭ مازمۇنى قازاقستان حالقىنىڭ ءومىر ءسۇرۋ ساپاسىن كوتەرۋگە نەگىزدەلگەن. وسى ورايدا ونىڭ باستى باسىمدىعى ەل تۇرعىندارىنىڭ ءال-اۋقاتىن ارتتىرۋ بولعاندىقتان، جولداۋ الەۋمەتتىك مانگە يە بولىپ وتىر. اتاپ ايتقاندا، جاھاندىق قارجىلىق-ەكونوميكالىق تۇراقسىزدىققا قاراماستان، ەلباسى الەۋمەتتىك جاۋاپتى مەملەكەتتىڭ ساياساتىن دايەكتى تۇردە جۇرگىزىپ كەلەدى»، - دەدى لەونيد پروكوپەنكو.

وسى ورايدا ول 2019 جىلدىڭ 1 قاڭتارىنان باستاپ ەڭ تومەنگى جالاقىنى 1,5 ەسە، ياعني 28 مىڭنان 42 مىڭعا دەيىن ءوسىرۋدى ماڭىزدى الەۋمەتتىك باستاما دەپ باعالادى. بۇل ءوز كەزەگىندە بارلىق سالا بويىنشا ءتۇرلى مەنشىك نىساندارىنداعى كاسىپورىنداردا جۇمىس ىستەيتىن 1 ميلليون 300 مىڭ ادامنىڭ ەڭبەكاقىسىنا قاتىستى بولادى.

قحا توراعاسىنىڭ ورىنباسارى جولداۋ اياسىندا بيۋدجەتتىك مەكەمەلەردە جۇمىس ىستەيتىن 275 مىڭ قىزمەتكەردىڭ ەڭبەكاقىسى كوبەيىپ، ورتا ەسەپپەن 35 پايىزعا وسەتىنىن ەسكە سالىپ ءوتتى.

«بۇل ەڭبەكاقىنى ءوسىرۋ عانا ەمەس، سونىمەن قاتار ءبىزدىڭ ازاماتتارعا ارنالعان ينۆەستيتسيا. وسى تۇرعىدا ءبىزدىڭ ەكونوميكاعا وڭتايلى ىقپالىن تيگىزەدى»، - دەدى لەونيد پروكوپەنكو.

ەستەرىڭىزگە سالا كەتەيىك، جولداۋ بارىسىندا ۇكىمەتكە وڭدەۋ ونەركاسىبى مەن شيكىزاتتىق ەمەس ەكسپورتتى قولداۋ ماقساتىمەن الداعى 3 جىلدا قوسىمشا 500 ميلليارد تەڭگە ءبولۋ تاپسىرىلدى. مۇنىمەن قوسا، باسىمدىعى بار جوبالارعا قولجەتىمدى نەسيە بەرۋ مىندەتىن شەشۋ ءۇشىن ۇلتتىق بانككە كەمىندە 600 ميلليارد تەڭگە كولەمىندە ۇزاق مەرزىمگە قارجى ءبولۋ جۇكتەلدى.

«وسى قادامداردىڭ بارلىعى كاسىپكەرلەر ءۇشىن جاڭا مۇمكىندىكتەر بەرەدى. اسىرەسە، شەتەلدەردەن يننوۆاتسيالار مەن ينۆەستيتسيالار تارتاتىن كاسىپكەرلەر نازاردان تىس قالمايدى»، - دەدى ول.

Abai.kz