بۇل كۇندەرى ۇلتتىق بانكتىڭ قور نارىعىندا ساتىلعان ۆاليۋتاداعى ۇلەسى شامامەن 80 پايىزدى قۇراعان. بىراق قور نارىعىندا ءبىر ايدا ۆاليۋتامەن جاسالعان ساۋدانىڭ 13,6 پايىزى عانا ۇلتتىق بانككە تيەسىلى بولعان.

ۇلتتىق بانك مالىمەتىنشە، ىشكى قور نارىعىنىڭ قاتىسۋشىلارى الەمدىك قور نارىقتارىنداعى جاعدايعا "ەرەكشە نازار اۋدارىپ", سالدارىنان ەلدە شەتەل ۆاليۋتاسىنا سۇرانىس ارتىپ، ۇسىنىس ازايعانىن ايتادى.

بۇعان قوسا اقش-تىڭ سانكتسيا ساياساتى مەن اقش فەدەرالدىق قور جۇيەسىنىڭ مولشەرلەمەنى ۇلعايتۋىنان قىركۇيەكتىڭ باسىندا رەسەي ۆاليۋتاسى قۇلدىراپ، ول تەڭگەنىڭ قۇنسىزدانۋىنا ىقپال ەتكەن.

رەسەيدە دوللار باعامى تامىز ايىنىڭ وزىندە رۋبلگە شاققاندا بەس رۋبلدەن استام ءوستى. تامىزدىڭ 1-ءى كۇنى رەسەيدىڭ ورتالىق بانكى بەكىتكەن رەسمي باعام بويىنشا، 1 دوللار 62,3 رۋبلگە تەڭ بولسا، تامىزدىڭ 31-ءى كۇنى بۇل شاما 68,28 ءرۋبلدى قۇراعان.

ىزىنشە قازاقستاندىق تەڭگە دە دەرەۋ ارزاندادى. قازاقستان قور بيرجاسىنىڭ كۇن سايىنعى ساۋدا-ساتتىعىندا دوللار ءبىر-ەكى تەڭگەگە ءوسىپ وتىردى. سالىستىرا كەتسەك: تامىزدىڭ 1-ءى كۇنگى رەسمي باعام بويىنشا 1 دوللار 346,7 تەڭگە بولسا، تامىزدىڭ 31-ءى كۇنى 363,43 تەڭگەگە جەتتى. قىركۇيەكتە تەڭگە جىلدام قۇلدىراي باستادى. قىركۇيەكتىڭ 12-ءسى كۇنى ۇلتتىق بانك بەكىتكەن رەسمي باعام بويىنشا 1 دوللار 380,93 تەڭگەگە جەتتى.

وتكەن اپتانىڭ سوڭعى جۇمىس كۇنى - 5 قازاندا دوللار باعامى 66,62 رۋبل بولدى. ال ۇلتتىق بانكتىڭ قازاننىڭ 8-ىنە بەلگىلەگەن رەسمي باعامى بويىنشا دوللار 373,71 تەڭگەنى قۇرايدى.

قازاقستان ۇلتتىق بانكى بۇعان دەيىن تەڭگەنى ەركىن اينالىمعا جىبەرگەندىكتەن، ۆاليۋتا باعامىن رەتتەۋگە ارالاسپايتىنىن مالىمدەگەن ەدى. ۇلتتىق بانك ۇستانىمى بويىنشا، بۇل ساياسات ەكونوميكادا "تەڭگەرىمسىزدىك تۋىنداۋىنا" جول بەرمەيدى.

Abai.kz