بۇل تۋرالى «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ ءوزىنىڭ FACEBOOK-تەگى پاراقشاسىندا جاريالادى.

«بۇگىن كوپتەن بەرى ويىمدا جۇرگەن ءىستىڭ ورايى كەلىپ، تولەن ابدىك، الدان سمايىل، ۇلىقبەك ەسداۋلەت اعالارىم باستاعان قازاقستان جازۋشىلار وداعىنىڭ مۇشەلەرىمەن جانە ەلىمىزدىڭ زيالى قاۋىم وكىلدەرىمەن كەزدەستىم. باسقوسۋدا ەلباسى جولداۋىنداعى باسىمدىقتار، ولاردى حالىققا ءتۇسىندىرۋ بويىنشا بىرلەسكەن جۇمىس باعىتتارى، بۇگىنگى ادەبيەتىمىزدىڭ احۋالى، جاس اقىن-جازۋشىلارىمىزعا قولداۋ كورسەتۋ سياقتى ماسەلەلەردى قوزعاپ، پىكىر الماستىق»، – دەلىنگەن جازبادا.

سونداي-اق «نۇر وتان» پارتياسى توراعاسىنىڭ ءبىرىنشى ورىنباسارى جولداۋدا مەملەكەت باسشىسى «رۋحاني جاڭعىرۋ» باعدارلاماسىن ءارى قاراي جالعاستىرىپ، ونىڭ اياسىن جاڭا مازمۇنمەن جانە باعىتتارمەن تولىقتىرۋ قاجەت ەكەنىن ايتقانىنا توقتالعان.

«بۇل – ارينە، ەلىمىزدىڭ رۋحانياتىنا، سونىڭ ىشىندە ادەبيەتى مەن مادەنيەتىنە جاسالعان ۇلكەن قامقورلىق. سول سەبەپتى دە ەلباسىنىڭ ۇسىنىستارىن اقىن-جازۋشىلار قىزۋ قولداپ وتىر. سوندىقتان جولداۋدا كورسەتىلگەن مىندەتتەردىڭ ماڭىزىن حالىققا ءتۇسىندىرۋ جۇمىستارىنان ولار دا تىس قالمايدى دەپ سەنەمىز»، – دەيدى ماۋلەن اشىمباەۆ ءوز جازباسىندا.

ودان بولەك، جازبادا سوڭعى ايلاردا «نۇر وتان» پارتياسى ءوز قىزمەتىن جاڭعىرتۋ اياسىندا كوپتەگەن جاڭا جوبالاردى قولعا الىپ، جۇزەگە اسىرۋ جۇمىستارىن جۇيەلى تۇردە جۇرگىزىپ كەلە جاتقانى، سونىڭ ىشىندە ەلباسىنىڭ «رۋحاني جاڭعىرۋ» باعدارلاماسى بويىنشا دا بىرقاتار باستامالاردىڭ بارى ايتىلعان.

«ەندى سول جۇمىستارىمىزعا اقىن-جازۋشىلاردى قولداۋعا باعىتتالعان ءتورت بىردەي جوبا قوسىلىپ وتىر. اتاپ ايتقاندا، پارتيا جاس اقىن-جازۋشىلارىمىزدى ىنتالاندىرۋ ماقساتىندا «رۋحاني جاڭعىرۋ» باعدارلاماسى اياسىندا ادەبي بايقاۋ وتكىزبەك. سونىڭ ناتيجەسىندە 5 نوميناتسيا بويىنشا 15 قاتىسۋشىعا جۇلدە تاپسىرۋدى كوزدەپ وتىرمىز. سونداي-اق جازۋشىلار وداعىمەن بىرلەسىپ «استانا» تەلەارناسىنان كورسەتىلەتىن ارنايى تەلەباعدارلاما دايىنداۋ ءىسىن قولعا الماقپىز. بۇل تەلەجوبا فورماتى مەن مازمۇنى جاعىنان اقىن-جازۋشىلارىمىزدىڭ زامانعا لايىق جاڭا مىنبەرى بولماق. ءۇشىنشى جوبا – YouTube-تە ارنايى كانال اشىپ، كورەرمەندەرگە يدەولوگيالىق، تاربيەلىك سيپاتتاعى كوركەم دۇنيەلەر ۇسىنۋ. ال ءتورتىنشى جوبا پارتيالىق باستامالار اياسىندا قايتا جاڭعىرتىلعان كىتاپحانالاردا اقىن-جازۋشىلارمەن كەزدەسۋلەر، ءتۇرلى شىعارماشىلىق كەشتەر وتكىزەتىن ارنايى كلۋبتار قۇرۋ. مۇنىڭ بارلىعى رۋحاني جاڭعىرۋدىڭ قۇندىلىقتارىن دارىپتەپ، ەلدى ورتاق مۇددەگە ۇيىتۋعا باعىتتالعان باستامالار. ولاردى جۇزەگە اسىرۋ كەزىندە بۇگىنگى باسقوسۋدا ايتىلعان پىكىرلەردىڭ ەسكەرىلەتىنىن اتاپ وتكەن ءجون»، – دەيدى پارتيا توراعاسىنىڭ ءبىرىنشى ورىنباسارى.

بۇگىن وسى جوبالاردى بىرلەسىپ جۇزەگە اسىرۋ ءۇشىن جانە ءارى قاراي دا قويان-قولتىق جۇمىس ىستەۋ ماقساتىندا «نۇر وتان» پارتياسى مەن جازۋشىلار وداعى اراسىنداعى ءوزارا ىنتىماقتاستىق تۋرالى مەموراندۋمعا قول قويىلعانىن اتاپ وتكەن ءجون.

Abai.kz