تۇركىمەنستاننىڭ رەسمي اقپارات قۇرالدارىنىڭ حابارلاۋىنشا، ماراپاتتاۋ ءراسىمى گۋربانگۋلى بەردىمۇحامەدوۆتىڭ ABU پرەزيدەنتى جاۆادا موتتاگيمەن، ءۇندىستان مەملەكەتتىك تەلەارناسىنىڭ ديرەكتورى دووردارشان سۋپريۋ ساحۋمەن جانە جاپونيا حابار تاراتۋ كورپوراتسياسىنىڭ پرەزيدەنتى (NHK) ريويچي ۋەدامەن كەزدەسۋدەن كەيىن وتكەن.

وزبەكستان پرەزيدەنتى شاۆكات ميرزياەۆ ارىپتەسىن ماراپاتىمەن قۇتتىقتاعان. "بەدەلدى حالىقارالىق ۇيىمداردىڭ مارتەبەلى سىيلىعى تۇركىمەنستانداعى ىشكى جانە سىرتقى ساياساتتى بەيبىتسۇيگىش شەشىمدەرمەن باسقارىپ وتىرعانىڭىزدى، باق-تىڭ دامۋىندا تۇركىمەنستاننىڭ جەتىستىككە جەتكەنىن بىلدىرەدى" دەگەن وزبەك پرەزيدەنتىنىڭ سوزدەرىن بەرگەن تۇركىمەن باسىلىمدارى.

اتاپ ءوتۋ كەرەك، تۇركىمەنستاندا تاۋەلسىز باق، جۋرناليستەر جوق. ونداعى ازات ەۋروپا / ازاتتىق تىلشىلەرى (ازاتلىك راديوسى) ۇنەمى قۋعىندالادى.

تۇركىمەنستان الەمدەگى جابىق مەملەكەتتەردىڭ ءبىرى. تۇرعىندارىنا ەركىن اقپارات الماسۋعا شەكتەۋ قويىلعان. حالىقارالىق ۇيىمدار جىل سايىن تۇركىمەنستاندا ءسوز بوستاندىعى، ادام قۇقىقتارى شەكتەلەتىنىن ايتىپ، دابىل قاعىپ كەلەدى.

Abai.kz