ەلباسى «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆتى قابىلدادى، دەپ حابارلايدى اباي-اقپارات اقوردانىڭ سايتىنا سىلتەمە جاساپ.

كەزدەسۋ بارىسىندا مەملەكەت باسشىسىنا «استانا» حالىقارالىق قارجى ورتالىعىنىڭ قالىپتاسۋ بارىسى جونىندە مالىمدەلدى.

نۇرسۇلتان نازارباەۆ قازىرگى ۋاقىتتا بۇل قارجى قۇرىلىمىنىڭ ءتيىمدى جۇمىسىن قامتاماسىز ەتۋ ءۇشىن قاجەتتى بارلىق قۇقىقتىق جانە ۇيىمداستىرۋشىلىق بازا جاساقتالعانىن اتاپ ءوتتى.

«استانا» حالىقارالىق قارجى ورتالىعىنىڭ باسقارۋشىسى قازاقستان پرەزيدەنتىنىڭ اقش پەن قىتايعا بيىلعى رەسمي ساپارلارى بارىسىندا قول جەتكىزىلگەن ۋاعدالاستىقتاردى ىسكە اسىرۋ جونىندەگى جۇمىستاردىڭ ناتيجەلەرى تۋرالى باياندادى.

ق.كەلىمبەتوۆتىڭ ايتۋى بويىنشا، «استانا» حالىقارالىق قارجى ورتالىعى جۇمىسقا كىرىسكەن كەزدەن بەرى ءوزىن حالىقارالىق ارەنادا تانىتىپ ۇلگەردى. حالىقارالىق رەيتينگ اگەنتتىكتەرىنىڭ مالىمەتتەرىنە سايكەس، بۇل ورتالىق الەمدىك 100 قارجى ورتالىعىنىڭ ىشىندە 61-ورىنعا، شىعىس ەۋروپا مەن ورتالىق ازيا ءوڭىرى بويىنشا 2-ورىنعا يە بولىپ وتىر.

سونداي-اق، كەزدەسۋدە مەملەكەت باسشىسىنا جەكەشەلەندىرۋ جانە قازاقستان كومپانيالارىنىڭ اكتسيالارىن IPO-عا شىعارۋ ۇدەرىسىندە «استانا» حالىقارالىق قارجى ورتالىعى بيرجاسىنىڭ مۇمكىندىكتەرىنىڭ پايدالانىلۋى جونىندە مالىمدەلدى.

ەلباسى كەزدەسۋ قورىتىندىسى بويىنشا بىرقاتار ناقتى تاپسىرما بەردى.

Abai.kz