2018 جىلعى 20-21 قازان ارالىعىندا «قازاقستان» ورتالىق كونتسەرت زالىندا قازاقستان رەسپۋبليكاسى مادەنيەت جانە سپورت مينيسترلىگىنىڭ ۇيىمداستىرۋمەن قازاقستان رەسپۋبليكاسىنىڭ ەلورداسى – استانا قالاسىنىڭ 20 جىلدىعىنا ارنالعان «جىر ارقاۋى – استانا» اتتى حالىقارالىق اقىندار ايتىسى ءوتتى.

ايتىس – قازاق رۋحانياتىنىڭ التىن قازىناسى، مادەني مۇراسى. عاسىردان عاسىرعا، اتادان بالاعا جانە زاماننان زامانعا ۇلاسىپ كەلە جاتقان اسىل مۇرا – ايتىس ونەرى – ءوز بويىنا ونەردىڭ بىرنەشە ءتۇرىن قامتىعان جانر رەتىندە جاس اقىن-جىرشىلاردىڭ تاجىريبە مەكتەبى، حالقىمىزدى ءيىسى قازاق ەكەنىن بۇكىل الەمگە تانىتاتىن بيىك شىڭى.

وسى كيەلى مۇرانى كەڭىنەن ناسيحاتتاپ، ۇرپاقتان-ۇرپاققا جەتكىزۋ، تالانتتى جاستارىمىزدى ونەردىڭ كاۋسار بۇلاعىنان ءنار العىزىپ، شەبەرلىگىن شىڭداۋعا ىقپال ەتۋ ماقساتىندا قازاقستان رەسپۋبليكاسى مادەنيەت جانە سپورت مينيسترلىگى «جىر ارقاۋى – استانا» اتتى حالىقارالىق اقىندار ايتىسىن وتكىزدى. قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەديۇلىنىڭ قۇتتىقتاۋ رەتىندە ءوز سوزىندە «وزدەرىڭىزگە بەلگىلى قازاقستاننىڭ دۇنيە جۇزىندەگى ورنى ەرەكشە، وتكەن جىلى قابىلدانعان «رۋحاني جاڭعىرۋ باعدارلاماسى» رۋحاني بايلىعىمىزدى الەمگە پاش ەتۋگە زور مۇمكىندىك بەرەدى. وسى جىلى 1 شىلدەدە العاشقى رەت دومبىرا كۇنىن اتاپ وتسەك، تۇركى ەلدەرىنىڭ بەسىگى اتانعان تۇركىستان قالاسىنىڭ وبلىستىق مارتەبەگە يە بولىپ جاتىر، ەندى مىنە، بۇگىن وسى ۇلتتىق ونەرىمىز – ايتىسىمىزدى حالىقارالىق دەڭگەيدە وتكىزىپ وتىرمىز» - دەپ اتاپ ءوتتى.

قازاقستاننىڭ ەڭبەك سىڭىرگەن قايراتكەرى ءجۇرسىن ەرمان «ايتىس – قازاقتىڭ قانىندا، ۇلتتىق تامىرىندا بار ونەر. قازاقتىڭ ءوز تەگىنە، داستۇرىنە ورالتىپ، حالىقتى ۇيىستىراتىن ونەر. ەكى كۇننەن بەرى تاپجىلماي، اقىندارىمىزدى قولداپ، قولپاشتاپ وتىرعان كورەرمەندەرگە راحمەت، ايتىسقا كومەك قولىن سوزىپ، بەتىن بۇرىپ تۇرعان بيلىككە، ءمينيسترىمىز ارىستانبەك مۇحامەديۇلىنا ۇلكەن راحمەت!» - دەپ زور العىسىن ءبىلدىردى.

ءىس-شاراعا ميناتحان ۇلاربەك، داۋلەتقىزى جاميعا (قىتاي حالىق رەسپۋبليكاسى), راشات ايدوس، قۋانتقان امانجول (موڭعوليا), ماراتوۆ اسىلبەك، ۋسۋپبەك ۋلۋ مۋندۋزبەك (قىرعىز رەسپۋبليكاسى) سىندى شەتەلدىك ساڭلاق اقىندار مەن رەسپۋبليكامىزدىڭ وبلىستىق جانە رەسپۋبليكالىق ماڭىزى بار قالالىق ايتىستاردىڭ جەڭىمپازدارى: زايتوۆ

رينات، قاينازاروۆ ەركەبۇلان، قويشىعۇلوۆ سەرىك، بايتۋوۆ ءبىرجان، جۇماگازينا اسەم، نيازوۆ مۇحتار جانە ت.ب. ەلىمىزدىڭ بەلگىلى ايتىسكەرلەرى قاتىستى.

ايتىس وتە تارتىستى ءوتتى، ەكى كۇنگە سوزىلعان شارا كەزىندە كورەمەندەرگە لىق تولى زال بىرنەشە ساعاتتان استام ۋاقىت بويى اقىندارعا اسا زور ىقىلاس كورسەتتى. ءىس-شارانىڭ ءادىل-قازىلار مۇشەلەرى:

ۇلىقبەك ەسداۋلەت – اقىن، مەملەكەتتىك سىيلىقتىڭ لاۋرەاتى، توراعا (قازاقستان);

ءجۇرسىن ەرمان (قازاقستان) – قازاقستاننىڭ ەڭبەك سىڭىرگەن قايراتكەرى;

ديحان قامزابەكۇلى (قازاقستان) – فيلولوگيا عىلىمدارىنىڭ دوكتورى، پروفەسسور;

شىناي راحمەتۇلى (موڭعوليا) – بەلگىلى اقىن، جازۋشى;

ءاسيا ايىپقىزى بەركەنوۆا (قازاقستان) – ايتىس اقىنى;

ابدىۋاقاپ قارا (تۇركيا) - تۇركياداعى ميمار سينان كوركەم ونەر ۋنيۆەرسيتەتىنىڭ پروفەسسورى، تاريح عىلىمدارىنىڭ دوكتورى;

نۇرتورە ءجۇسىپ – (قازاقستان) - «ايقىن» گازەتىنىڭ رەداكتورى.

ەكى كۇنگە سوزىلعان ايتىستىڭ ناتيجەسى تومەندەگىدەيى:

باس جۇلدە يەگەلەرى – 7 ميلليون تەڭگەدەن رەنات زايىتوۆ پەن مۇحتار نيازوۆ;

ءىى ورىن – 1,5 ميلليون تەڭگەدەن اكىلبەكوۆ رۋستەم، سۇلتانحان مەيىربەك;

ءىىى ورىن – 1 ميلليون تەڭگەدەن احانوۆ ماقسات، كاليەۆ ايبەك،سەريك قويشىعۇلوۆ;

جۇبانىش سىيلىقتارى – 500 000 تەڭگەدەن ايدوس راشات، شۇعايىپ سەزىمحان، اسىلبەك ماراتوۆ، ديدار قاميەۆ پەن اسپانبەك شۇعاتاەۆقا بەرىلدى.

ماراپاتتاۋ راسىمىنەن كەيىن العىس ايتۋ ءۇشىن ءسوز العان باس جۇلدە يەگەرى رەنات زايىتوۆ: «بۇگىنگى باس جۇلدە دە مەنىكى ەمەس، قازاقتىڭ شىندىعىنىڭ باس بايگەسى»، - دەپ ءسوزىن اياقتادى.

Abai.kz