قازاقستان پرەزيدەنتى اقش-تىڭ ساۋدا ءمينيسترى ۋيلبۋر روسسپەن كەزدەستى، دەپ حابارلايدى اباي-اقپارات اقوردانىڭ سايتىنا سىلتەمە جاساپ.

كەزدەسۋ بارىسىندا تاراپتار ەكى ەلدىڭ ساۋدا-ەكونوميكا جانە ينۆەستيتسيا سالالارىنداعى قارىم-قاتىناستارىنىڭ قازىرگى جاعدايى مەن دامۋ پەرسپەكتيۆالارىن تالقىلادى.

مەملەكەت باسشىسى ساۋدا ءمينيسترىنىڭ بۇل ساپارى اقش-تىڭ ورتالىق ازيا وڭىرىمەن ىنتىماقتاستىقتى دامىتۋعا مۇددەلى ەكەنىن ايقىن اڭعارتاتىنىن، سونداي-اق ءوزارا ەكونوميكالىق بايلانىستاردى نىعايتۋعا سەپتىگىن تيگىزەتىنىن ايتتى.

نۇرسۇلتان نازارباەۆ بيىلعى قاڭتار ايىنداعى اقش-قا رەسمي ساپارى بارىسىندا جوعارى دەڭگەيدە وتكەن كەزدەسۋلەردىڭ ناتيجەلەرىنە توقتالدى.

– كەزدەسۋدە پرەزيدەنت دونالد ترامپپەن ءوزارا تۇسىنىستىككە قول جەتكىزدىك. قازاقستان مەن امەريكا اراسىنداعى قارىم-قاتىناستار كەڭەيتىلگەن سەرىكتەستىك دەڭگەيىنە كوتەرىلدى. بۇل تۋرالى ءتيىستى مالىمدەمەگە قول قويىلدى. مەن رەسمي ساپار بارىسىندا اقش-تىڭ «بيزنەس كاپيتاندارىنىڭ» ۇلكەن توبىمەن كەزدەستىم. بىرلەسكەن بيزنەس-فورۋمدا جالپى قۇنى 7 ميلليارد اقش دوللارى بولاتىن ءتۇرلى 27 كوممەرتسيالىق قۇجاتقا قول قويىلدى. بۇگىندە ەلدەرىمىز اراسىنداعى ساۋدا كولەمى 2 ميلليارد اقش دوللارىنا جەتتى. بيىل بۇل كورسەتكىش 30 پايىزعا ءوستى، – دەدى قازاقستان پرەزيدەنتى.

سونىمەن قاتار، مەملەكەت باسشىسى ەكى ەل اراسىنداعى ىنتىماقتاستىقتىڭ دامۋ تاريحىنا توقتالىپ، قازاقستان تاۋەلسىزدىگىنىڭ العاشقى جىلدارىندا قول قويىلعان كەلىسىمدەر جونىندە ايتتى.

– قازاقستان يادرولىق قارۋدان باس تارتىپ، الەمدەگى ءىرى يادرولىق پوليگوندى جاپقان سوڭ، ءبىز پرەزيدەنت ۇلكەن دجوردج بۋشپەن ىنتىماقتاستىق جونىندە ءبىرىنشى كەلىسىمشارتقا قول قويدىق. سول كەزدە «شەۆرون» كومپانياسى ءبىزدىڭ ەلدە جۇمىس ىستەۋگە نيەت ءبىلدىردى. بۇل كومپانيا جۇمىسىنىڭ تاريحى قازاقستاندا بيزنەس جۇرگىزۋدىڭ قانشالىقتى تابىستى بولاتىنىن ايقىن كورسەتەدى، – دەدى قازاقستان پرەزيدەنتى.

مەملەكەت باسشىسى بۇگىندە قازاقستاننىڭ كوپۆەكتورلى ساياسات جۇرگىزىپ وتىرعانىن جانە سەرىكتەس ەلدەردىڭ بارىمەن تاتۋ قارىم-قاتىناس ورناتقانىن اتاپ ءوتتى.

ۋيلبۋر روسس نۇرسۇلتان نازارباەۆقا كەزدەسۋگە مۇمكىندىك تۋعىزعانى ءۇشىن ريزاشىلىق ءبىلدىرىپ، استانانى كورگەن كەزدەگى اسەرى جونىندە اڭگىمەلەدى.

– مەن قازاقستانعا ءبىرىنشى رەت كەلىپ وتىرمىن. اۋەجايدان كەلە جاتىپ، استانانىڭ ساۋلەتىنە تامسانا قارادىم. سىزدەردە قۇرىلىس جۇمىستارى قارقىندى جۇرگىزىلۋدە ءارى ەكونوميكالارىڭىز دا قارىشتاپ دامىپ كەلەدى، – دەدى اقش-تىڭ ساۋدا ءمينيسترى.

سونداي-اق، ۋ.روسس استاناعا وزىمەن بىرگە قازاقستانمەن ساۋدا-ەكونوميكالىق قاتىناستاردى دامىتۋعا نيەت بىلدىرگەن امەريكالىق 16 كومپانيانىڭ دەلەگاتسياسى كەلگەنىن اتاپ ءوتتى.

اقش-تىڭ ساۋدا ءمينيسترى قازاقستان پرەزيدەنتىنە اقش پرەزيدەنتى د.ترامپتىڭ ىزگى تىلەگىن جەتكىزىپ، ەكى مەملەكەت اراسىنداعى ىنتىماقتاستىقتى ودان ءارى نىعايتىپ، كەڭەيتە تۇسۋگە مۇددەلى ەكەنىن ايتتى.

Abai.kz