الماتىدا بىرىككەن ۇلتتار ۇيىمى ءۇيىنىڭ تۇساۋكەسەرى ءوتتى. جوعارى حالىقارالىق ستاندارتتارعا جانە قاۋىپسىزدىك تالاپتارىنا ساي جاسالعان ءوفيستىڭ اشىلۋىنا ەلشىلىك كورپۋستارىنىڭ جانە بۇۇ-نىڭ 14 وڭىرلىك وفيستەرىنىڭ وكىلدەرى قاتىستى.

مەگاپوليس اكىمى باۋىرجان بايبەك الماتىنىڭ تۇراقتى دامۋدى ۇستاناتىنىن اتاپ ءوتتى. «قالا ادامدار ءۇشىن» كونتسەپتسياسى اياسىندا قوعامدىق كەڭىستىك مودەرنيزاتسيالانۋدا، ونىڭ ىشىندە مۇمكىندىگى شەكتەۋلى جاندارعا بارلىق جاعدايلار جاسالۋدا. بۇۇ-نىڭ دامۋ باعدارلاماسىنا ساي «تۇراقتى كولىك» جوباسى جۇزەگە اسۋدا.

«الماتىدا 29 كونسۋلدىق پەن ساۋدا وكىلدىكتەرى بار، سونىمەن قاتار ءىرى ترانسۇلتتىق كومپانيالاردىڭ 60-تان استام وفيستەرى ورنالاسقان. قازاقستان – بەيبىتشىلىكتى سۇيەتىن ءارى قاۋىپسىز ەل. مەملەكەت باسشىسىنىڭ ينستيتۋتسيونالدى رەفورمالارىنىڭ ارقاسىندا تۇراقتى ەكونوميكالىق ءوسىم قامتاماسىز ەتىلگەن. ءبىز قالانى حالىقارالىق ۇيىمداردىڭ وڭىرلىك حابىنا اينالدىرۋ ءۇشىن جۇيەلى جۇمىستار جۇرگىزۋدەمىز. بۇگىن ددۇ الماتى دەكلاراتسياسىنا قول قويىلعانىنا 40 جىل تولۋىنا ارنالعان «مەرلەر ءسامميتىنىڭ» وتۋىنە ورايلاستىرىلعان بۇۇ-ى جاڭا ءۇيىنىڭ تۇساۋكەسەرى ءبىزدىڭ ورتاق ىنتىماعىمىزدىڭ تاريحىنا التىن ارىپتەرمەن جازىلاتىنىنا سەنىمدىمىن»، - دەدى باۋىرجان بايبەك.

ءوز كەزەگىندە يۋنيسەف-ءتىڭ ەۋروپا جانە ورتا ازيا ەلدەرى بويىنشا وڭىرلىك ديرەكتورى افشان حان الماتىداعى جاڭا ءوفيستىڭ وڭىرلىك وكىلدىكتەر قىزمەتىنە تىڭ سەرپىلىس بەرەتىنىن جانە قازاقستاننىڭ وركەندەۋىنە ۇلەس قوساتىنىن، ال قازاقستاننىڭ ببۇ ودان ءارى دامۋىنا بارىنشا ىقپال ەتەتىنىن اتاپ ءوتتى.

«بۇۇ باس حاتشىسىنىڭ اتىنان قازاقستانعا، سىرتقى ىستەر مينيسترلىگىنە، قالا اكىمشىلىگىنە وسىنداي يگى شارالاردى جۇزەگە اسىرعاندارى جانە بارلىق وڭىرلەردە تۇراقتى دامۋدى ماقسات ەتكەندەرى ءۇشىن العىس ايتامىن. بۇل جاڭا وفيس حالىقارالىق ۇيىمدارمەن عانا ەمەس، سونىمەن قاتار ەلدىڭ دارىندى جاستارىمەن ىنتىماقتاستىقتى ودان ءارى نىعايتۋعا جاڭا مۇمكىندىكتەر بەرەدى»، - دەپ اتاپ ءوتتى افشان حان.

بۇۇ ءۇيى قالانىڭ ىسكەر اۋدانىندا، بوتانيكا باعى مەن «اتاكەنت» كورمە ورتالىعىنا جانە نەگىزگى ماگيسترالدارعا جاقىن جەرگە ورنالاسقان. ببۇ-نىڭ وكىلدىگى جاڭا وفيسكە بيىلعى جىلدىڭ اياعىندا كوشەدى دەپ كۇتىلۋدە.

Abai.kz