ءبىز ۇلتجاندىلىقتى تىلىندەگى سوزىمەن عانا ولشەيتىن بولىپ الدىق
ومىردە مەن تۇسىنبەيتىن نارسەلەر وتە كوپ. بىلمەيتىنىم ودان دا كوپ. تۇسىنبەيتىنىمنىڭ ءبىرى ۇلتجاندىلىق تاقىرىبى. ويىمدى جازايىن. سىرلاسىپ كورەيىك.
ءار ادام وزىنشە ۇلتجاندى. ەشكىمدى سەن ۇلتجاندى ەمەسسىڭ دەپ ايىپتاي المايمىز. ءتىپتى ايىپتاۋعا دا قۇقىمىز جوق.
وسى ءبىزدىڭ قوعامدا قازىر ۇلتجاندىلىق تەك بىرنەشە قالىپقا سالىنىپ قويعان تۇسىنىك سياقتى. ۇلتجاندى ادام كىم دەسە ءتىل دەپ سويلەپ اتى شىققان، جەر دەپ سويلەپ ماسەلە كوتەرگەن، قىتاي قاۋىپ دەپ پوست جازعان، ورىس دۇشپان دەپ پىكىر قالدىرعان ادامداردى كورسەتەمىز قازىر. كورسەتپەسەك دە سولار دەپ ويلايمىز. ىسىنە ەمەس، سوزىنە قاراپ، ءسوزى الگى قالىپتارعا ساي كەلسە بولدى، ۇلتجاندى دەپ اتايتىن قۇبىلىس قالىپتاسىپ قالدى. استىن سىزىپ ايتايىن، مۇنى قاتە دەپ تۇرعانىم جوق. بىراق وسى قۇبىلىس قانشالىقتى دۇرىس؟ ۇلتجاندىلىق تەك وسى ماسەلەنىڭ اينالاسىندا عانا ما؟
كوشەگە قوقىس تاستامايتىن ادامدى نەگە ۇلتجاندى دەپ ايتا المايسىز؟ ءبىزدىڭ قوعامدا ۇلتجاندى بولۋ ءۇشىن مىندەتتى تۇردە ەل نازارىنداعى تاقىرىپتاردى قوزعاۋ كەرەك پە؟ ءتىل دەپ ۇرانداعان ادام مەن كوشەگە قوقىس تاستامايتىن ادامنىڭ قايسىسى ۇلتجاندى دەسە، كوپ ادام ءتىل دەپ ۇرانداعان دەپ جاۋاپ بەرەدى؟ نەگە؟ مۇنداي تۇسىنىكتى بىزگە كىم ءسىڭىردى؟
ۇيدە وتىرىپ، بالاسىنا تاربيە بەرىپ وتىرعان انا، نەمەرەسىن ارقالاپ جۇرگەن اتا، جاس كەلىنگە يبالىلىقتى ۇيرەتىپ جۇرگەن اجەنىڭ ءىسى شە؟ ۇلتجاندىلىق ەمەس پە؟ نەگە وسى ىستەردى ۇلتجاندىلىق دەپ ايتا المايمىز؟
تىلدە بار دا دىلدە جوق دەگەندەي، وكىنىشكە قاراي ءبىز ۇلتجاندىلىقتى تىلىندەگى سوزىمەن عانا ولشەيتىن بولىپ الدىق. ەل الدىندا ۇلت ءسوزىن سويلەپ، ەكراننان[الەۋمەتتىك جەلىدەن] تىس ومىردە اراق ءىشىپ، قىزعا بارىپ، كوشەگە تۇكىرىپ، تۋىستارىمەن ۇرىسىپ، بالاسىنا بوقتاۋ ۇيرەتىپ، دوسىن ساتىپ، باۋىرىن وسەكتەيتىن بولسا دا ول ءتىلىم دەپ جىلاپ، ەلىم دەپ ەڭىرەگەنى ءۇشىن ۇلتجاندى دەر قۇرمەتتەپ تورگە وتىرعىزامىز. بۇل بارىمىزگە تانىس. اسىرەسە جۋرناليستەر جاقسى تۇسىنەدى.
قازاقشا دۇرىس سويلەي المايتىن قازاق دوسىم بار. ۇنەمى بالالار ۇيىنە بارايىق دەپ ماعان تىنىشتىق بەرمەيدى. قىمبات ويىنشىقتار الادى. جەتىمدەردى قۋانتادى. قازاقشا ناشار سويلەگەن ءۇشىن ونى ۇلتجاندى دەپ ايتا المايمىز با سوندا؟ بالالار ۇيىنە بارعانى ۇلتجاندىلىق ەمەس پە؟ قازاق دالاسىنداعى جەتىمدەرگە قامقورلىق تانىتىپ، كوڭىلىن كوتەرىپ باسىنان سيپاپ ءجۇر. ەگەر بۇل ءىسىن ۇلتجاندىلىق دەي الماساق ونىڭ بۇل ءىسى قالاي اتالادى؟ ادامدىق، مەيىرىمدىلىك، قامقورلىق دەپ اتالسا... نەگە ۇلتجاندىلىق دە اتاۋعا كەلمەيدى؟ ءتىلىم دەمەگەنى ءۇشىن، جەرىم دەمەگەنى ءۇشىن بە؟
سونىمەن جوعارىدا تۇسىنبەيتىن نارسەم دەدىم عوي. تۇسىنبەيتىنىم وسى. قىزىق. مۇمكىن 40-قا تولعاندا تۇسىنەرمىن. ازىرگە ىزدەنە بەرەيىن.
بەرىك سۇلتاننىڭ facebook پاراقشاسىنان
Abai.kz
