سوڭعى جىلداردا قانىشەر سوۆەت زامانىن اڭساۋشىلار كوبەيگەندەي كورىنەدى. ولمەيتىن پولك شەرۋلەرى، كازاكتاردى تايراڭداتىپ قويۋ، ەندى مىنە كومسومولدىڭ مەرەيتويىن جەر-جەردە اتاپ ءوتۋ سوعان كۋا.

الايدا بۇل ءولىپ بارا جاتقان قۇبىجىقتىڭ سوڭعى جانايقايى. ونى ازىرشە ءتىرىلتىپ وتىرعان – پۋتيندىك رەسەي مەن ونىڭ جەرگىلىكتى جانكۇيەرلەرى – بارىن سالۋدا، اقشاسىن اياماۋدا، لاۋازىمدارىن زاڭسىز پايدالانۋدا. ءوشۋ الدىنداعى پۋتيندىك جۇيە وزىمەن قالسىن.

ال، قازاق جەرىندە وندايلار ازار بولعاندا 5 پايىزدان اسپاس. راس، ولار جوعارى مانساپتى، قالتالى، ىقپالدى. تەك الگىلەردىڭ ەڭ باستى قۇدىرەتى - قالعان 95 پايىزدىڭ ءۇنسىز وتىرعانى. ءوز كەزەگىندە ۇنسىزدىكتى كەلىسىپ-قولداۋ دەپ جورىعان ولار ءوز دەگەنىن جۇرگىزۋدە.

دەسە دە، قانشاما باعىنىشتى، الدانعان، ءالسىز ءارى حۇقىعى تاپتالعان بولسا دا، بولاشاق كوپشىلىك قولىندا. ويتكەنى بۇل - نامىسىن جوعالتپاعان، قۇلدىقتان ادا، ارىن ساتپاعان قوعام، ەڭ الدىمەن جاستار. ماسەلە اتالعان كوكجيەكتى مەيلىنشە جاقىنداتۋدا جاتىر.

ەندەشە قۇر سانعا توقمەيىلسىگەن قاتە. سان ساپاعا، ال ارتى حالىقشىل شەشىمدەرگە اينالۋ ءۇشىن بەلسەندىلىك تانىتۋ قاجەت. سوندا عانا وتار زامان جاقتاۋشىلارى ءۇنى ءوشىپ، ازات مەملەكەت ورنايدى.

راسۋل جۇمالىنىڭ faceboobk پاراقشاسىنان

Abai.kz