بەيسەنبى كۇنى ساۋد ارابيانىڭ مەملەكەتتىك ارناسى ءجۋرناليستىڭ ولىمىنە بايلانىستى حابار تاراتتى دەپ جازادى Reuters. مەملەكەتتىك ايىپتاۋشى حاشوگگيدىڭ ولىمىنە بايلانىستى ساۋد ارابيا جانە تۇركيا تەرگەۋشىلەرىنەن قۇرىلعان توپ كۇدىكتىلەردەن جاۋاپ الا باستادى دەپ مالىمدەگەن. "تۇرىك تارابىنىڭ حاشوگگيدىڭ ءولىمى الدىن الا ۇيىمداستىرىلعان دەگەن اقپاراتتى راستادى",- دەلىنگەن مالىمدەمەدە.

وپپوزيتسيالىق جۋرناليست جامال حاشوگگي 2 قازاندا ساۋد ارابيانىڭ ستامبۇلداعى كونسۋلدىعىنا كىرگەننەن كەيىن، ءىزىم-عايىپ جوعالىپ كەتكەن. تۇركيا بيلىگىندە ونىڭ ولىمىنە قاتىستى اۋديوجازبا بار بولىپ شىقتى. ستامبۇلعا ساۋد ارابيادان بىرەر كۇن بۇرىن كەلگەن ادامدار كونسۋلدىق اۋماعىندا حاشوگگيدى تەرگەپ، كەيىن ونى ءولىمشى ەتىپ قيناپ، دەنەسىن ءبولىپ تاستاعان.

وتكەن اپتادا ساۋد ارابيا بيلىگى حاشوگگي كونسۋلدىقتا اياقاستى توبەلەستەن قازا تاپتى دەپ مالىمدەگەن. كورول سالماننىڭ قاراماعىنداعى 18 ادام قىلمىسقا قاتىسى بار دەگەن كۇدىكپەن ۇستالىپ، حانزادانىڭ بەس كەڭەسشىسى قىزمەتىنەن الىنعان.

تۇركيا ساۋد ارابيانىڭ جۋرناليست ءولىمى كەزدەيسوقتىق دەگەنىن سىنعا الدى. سەيسەنبى كۇنى تۇركيا پرەزيدەنتى رەجەپ ەردوعان وپپوزيتسيالىق جۋرناليست جامال حاشوگگيدىڭ ءولىمى قاساقانا، الدىن الا ۇيىمداستىرىلعان دەپ مالىمدەدى.

بىرەر كۇن بۇرىن ساۋد ارابيانىڭ مۇراگەر حانزاداسى مۇحاممەد بين سالمان حاشوگگيدىڭ قازاسىن "ادام شوشىرلىق قىلمىس" ءارى "بارلىق ساۋديالىقتار ءۇشىن وتە اۋىر وقيعا" دەپ مالىمدەدى. سول كۇنى اقش پرەزيدەنتى دونالد ترامپ The Washington Post گازەتىنە بەرگەن سۇقباتىندا ساۋديالىق ارنايى قىزمەتتىڭ جاساعان ءجۋرناليستى ءولتىرۋ وپەراتسياسىنا مۇراگەر حانزادا جاۋاپتى دەپ مالىمدەدى.

Abai.kz