تۇركىستان وبلىسىنىڭ قازىعۇرت اۋدانىندا باسپانا كەزەگىندە تۇرعان 64 وتباسى قونىس تويىن تويلادى، دەپ حابارلايدى «حابار 24».

«بولاشاق» شاعىن اۋدانىنان بوي كوتەرگەن 16 پاتەرلى 4 تۇرعىن ءۇيدىڭ كىلتىن العانداردىڭ دەنى – از قامتىلعان وتباسىلار، مۇمكىندىگى شەكتەۋلى ازاماتتار مەن جەتىم بالالار. سونىمەن قاتار بۇل باسپانادان مەملەكەتتىك قىزمەتكەرلەر دە تىس قالماعان. كەلەشەكتە اۋداندا «7-20-25» باعدارلاماسىمەن كوپقاباتتى 2 تۇرعىن ءۇي سالىنادى.

باۋىرجان ارتىقباەۆ 20 جىلدان بەرى مەملەكەتتىك قىزمەتپەن بىتە قايناسىپ كەلەدى. ونىڭ باسپانا كەزەگىندە تۇرعانىنا 15 جىلدان اسىپتى. وسى ۋاقىتقا دەيىن اۋدانعا قاقپاق اۋىلىنان قاتىناعان. ول، اسىرەسە، قىستىڭ كۇنى قيىن بولعانىن ايتادى. ەندى باۋىرجاننىڭ وتباسى ءۇش بولمەلى جىلى ءارى جارىق ۇيدە تۇراتىن بولادى. «بۇل كۇندى كوپ كۇتتىك»، – دەيدى ءۇي يەسى.

مۇنداعى تۇرعىن ۇيلەر زامان تالابىنا ساي سالىنعان. اۋىزسۋ، تابيعي گاز بەن جارىق جۇيەلەرى تارتىلعان. بالالار وينايتىن اۋلا مەن تۇرعىندار ءۇشىن كولىك تۇراعى بار. وبلىستىق بيۋدجەت قارجىسىنا تۇرعىزىلعان بۇل باسپانالار قازىعۇرت اۋدانىنىڭ 90 جىلدىعىنا تارتۋ رەتىندە بەرىلىپتى. «كەلەشەكتە «7-20-25» باعدارلاماسىمەن تاعى بىرنەشە كوپقاباتتى تۇرعىن ءۇي سالۋ جوسپاردا بار»، – دەيدى كوممۋنالدىق سالاعا جاۋاپتى ماماندار.

«ءۇي كەزەگىندە 393 وتباسى تۇر. سونىڭ 64 وتباسىنا بەرىلدى. ەندى 317 وتباسى تىزىمدە قالدى. «7-20-25» باعدارلاماسى بويىنشا كەلەسى جىلدارى تۇرعىن ءۇي بەرىلەدى. اۋداندا سالىنىپ جاتىر»، – دەدى قازىعۇرت اۋداندىق تۇكش، جك جانە اج ءبولىمىنىڭ جەتەكشى مامانى  اكىمجان ابدىاكىم.

وبلىستا كوپقاباتتى تۇرعىن ءۇي سالۋعا نيەتتى جەكە ينۆەستورلار قاتارى كوبەيگەن. ەلباسىنىڭ 5 الەۋمەتتىك باستاماسىنىڭ ءبىرىنشى باعىتىنداعى  «7-20-25» باعدارلاماسى اياسىندا وڭىردە جەكە ءۇي سالۋشىلاردىڭ قارجىسىمەن جۇزدەن اسا كوپقاباتتى ءۇيدىڭ قۇرىلىسى باستالعان.

Abai.kz