كەشكى 5 كەزىندە باقىتجان دەگەن دوسىم زۆاندادى. ەنتىگىپ تۇر. الدەنەگە اشۋلى.

«التىن وردانىڭ» قاسىنان ءوتىپ بارا جاتقاندا تۋرا كوز الدىندا اۆاريا بولىپتى. ءىشىپ العان بىرەۋلەر قاسى بەتكە شىعىپ كەتىپ، «كيانى» كەپ سوققان. قاتتى سوققانى سونشا، الگىنىڭ سارت ەتە تۇسكەن داۋىسىنان قۇلاعىم بىتەلىپ قالا جازدادى دەيدى. ماشينەنىڭ موتورى ءبىر جاققا ۇشىپ كەتكەن. ماڭايدىڭ ءبارى ۋ-شۋ. ماشينەسىن قويا سالىپ كومەكتەسەيىن دەپ جۇگىرىپ بارسا، جاڭا عانا اۆاريا بولعان جەرگە ەداۋىر ادام جينالىپ قالىپتى. كەيبىرەۋى نە ىستەرىن بىلمەي ماڭگىرىپ تۇر. قالعاندارى تۇك كورمەگەندەي سوتكاسىنا ءتۇسىرىپ جاتىر. تاعى بىرەۋلەرى مەرسەدەستەگىلەر كىنالى دەپ، قاتتى قينالىپ جاتقان ادامعا قاراپ كۇلىپ تۇر دەيدى. ءوزى ارەڭ دەگەندە جەدەل جاردەمگە قوڭىراۋ شالىپ، ماشينەدەگى قىسىلىپ قالعان جىگىتكە كومەكتەسكىسى كەلگەنىمەن، الىپ شىعا الماپتى ونى.

ءۇي ورتەنىپ جاتسا، بىرەۋ سۋعا باتىپ بارا جاتسا، كومەكتەسۋدىڭ ورنىنا سونى قىزىق كورىپ، سوتكاسىنا ءتۇسىرىپ تۇراتىن مىسكىندەرگە كۇلۋشى ەدىك، تۋرا سونداي ادەت بىزگە دە كەلىپتى.

مۇنداي كەزدە قاراپ تۇرماي، جۇگىرىپ بارىپ كومەكتەس. وندايعا جۇرەگىڭ شىدامايدى ەكەن، جەدەل جاردەم شاقىرا بەر. ءبىر جاعىنا شىعۋىڭ كەرەك. ەرتەڭ سول جاعداي سەنىڭ باسىڭا دا كەلۋى مۇمكىن. ادامنىڭ كۇنى اداممەن دەگەن عوي. سەن ءسويتىپ اۆارياعا ءتۇسىپ قالعاندا بىرەۋ سەنى ءدال سولاي سوتكاسىنا ءتۇسىرىپ تۇرسا، ۇناي ما ساعان؟ تۇك كورمەگەندەر عانا سويتەدى.

وسىنداي جاعدايدا ادامعا قالاي كومەكتەسۋگە بولادى، قايتىپ قۇتقارىپ قالۋعا بولادى – وسىندايدى مەكتەپتەن باستاپ ۇيرەتۋ كەرەك سياقتى.

وقۋشى كەزىنەن باستاپ ءبارىن وقىتىپ، ۇيرەتىپ جىبەرمەسەڭ، قىزىقتاپ قاراپ تۇرعاننان باسقا تۇك تە بىلمەيتىن ماقۇلىقتار كوبەيىپ بارا جاتىر!

جولىمبەت ماكىشتىڭ facebook پاراقشاسىنان

Abai.kz