الماتى اكىمدىگىندە مەكتەپ ديرەكتورلارىمەن كەڭەس ءوتتى، وندا ءبىلىم جۇيەسىندەگى سىبايلاس جەمقورلىققا قارسى ءىس-قيمىل ماسەلەلەرى تالقىلاندى.

كەزدەسۋدى اشقان الماتى قالاسى اكىمىنىڭ ورىنباسارى ارمان قىرىقباەۆ مەملەكەت باسشىسىنىڭ ءبىلىم جۇيەسىنە ايرىقشا نازار اۋداراتىنىن، بۇل ماسەلەنىڭ حالىققا جولداۋىندا ايقىن كورىنىس تاپقانىن اتاپ ءوتتى. ءبىلىم سالاسىن قارجىلاندىرۋ جىل وتكەن سايىن ارتا تۇسۋدە. الماتىدا تەك سوڭعى 5 جىل ىشىندە عانا ءبىلىم سالاسىن قارجىلاندىرۋ 27 ملرد. تەڭگەگە وسكەن.

الماتىدا مەكتەپ جاسىنا دەيىنگى جانە جالپى ورتا ءبىلىم بەرۋدىڭ ساپاسىن كۇشەيتۋ ماقساتىندا جىل اياعىنا دەيىن ءبىلىم جۇيەسى قىزمەتكەرلەرىنىڭ بىلىكتىلىگىن ارتتىرۋعا جانە PIZA, SAT, AST سىندى حالىقارالىق ستاندارتتارعا كوشۋدە بىرىڭعاي كاسىبي تالاپتار ەنگىزۋگە قاتىستى شارالار جوسپارى بەكىتىلەدى. مەملەكەت باسشىسى تاپسىرمالارىن ورىنداۋ اياسىندا ەلدى مەكەندەردى دامىتۋ جوسپارلارى مەكتەپ سالۋ سىزبالارىمەن ۇندەسەدى، سونىڭ ارقاسىندا جەكە ينۆەستيتسيالار ەسەبىنەن مەكتەپ قۇرىلىستارىنىڭ قارقىنى ارتاتىن بولادى.

دەگەنمەن، مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنىڭ ديرەكتورى دانيار تاۋمۇرات ءوزىنىڭ سوزىندە ءبىلىم سالاسىندا سىبايلاس جەمقورلىققا قارسى ءىس-قيمىلدى بەلسەندى تۇردە جۇزەگە اسىرۋ قاجەتتىگىن اتاپ ءوتتى.

«قازىردىڭ وزىندە جۇرتشىلىق مەكتەپتى جوندەۋ، تازالاۋ نەمەسە باسقا دا شارالارعا اقشا جيناۋ فاكتىلەرىنىڭ ورىن الاتىنى تۋرالى حابارلاپ جاتادى. ءبىز مۇنداي ىستەرگە اتا-انالار شىعىندانباۋلارى ءتيىس دەگەن سەنىمدەمىز، ويتكەنى بارلىق قاجەتتىلىكتەر ءۇشىن بيۋدجەتتەن جەتكىلىكتى قارجى بولىنەدى. سىبايلاستىققا قارسى كۇرەستىڭ ۇتىمدى جولى – تسيفرلاندىرۋ، مۇندا مەملەكەتتىك قىزمەت كورسەتۋ پروتسەسسىندە شەشىم قابىلداۋ ءۇشىن ادامي فاكتور جويىلادى. ءبىلىم باسقارماسى مەملەكەتتىك قىزمەتتەردى اۆتوماتتاندىرۋدا، وتكەن جىلدان باستاپ «الماتى مەكتەپ» باعدارلاماسى جۇمىس ىستەي باستادى، بيىلعى جىلى بالا باقشالارعا كەزەككە قويۋ باعدارلاماسى قولعا الىنادى»، - دەدى دانيار تاۋمۇرات.

ول مەكتەپتەردە اقشا جيناۋعا قاتىستى اقپاراتتاردىڭ بارىنشا تەكسەرىلەتىنىن، ەگەر ونداي كەلەڭسىزدىكتەر راستالاتىن بولسا ءتيىستى قۇقىقتىق باعا بەرىلەتىنىن ايتتى. اقشا جيناۋ فاكتىلەرىنە كىنالى جاندارعا قاتاڭ شارالار قولدانىلادى، ءتىپتى سىبايلاستىققا قارسى كۇرەس زاڭناماسىنا ساي قىلمىستىق ءىس قوزعالۋى مۇمكىن.

«پەداگوگتاردىڭ باستى مىندەتى – بالالاردى وقىتۋ مەن تاربيەلەۋ. قازىرگى كەزدە اتا-انالاردان وقۋ ورىندارىن جوندەۋگە، ءتۇرلى زاتتار الۋعا قاتىستى اقشا جيناۋعا ەش نەگىز جوق. وكىنىشتىسى، كەيبىرەۋلەر وزدەرىنىڭ مەملەكەتتىك سەكتوردا قىزمەت ەتەتىنىن ۇمىتىپ كەتەتىن سياقتى. مەملەكەتتىك ءبىلىم مەكەمەلەرىنە تيەسىلىنىڭ بارلىعى – مەملەكەتتىڭ مەنشىگى، ياعني سالىق تولەۋشىلەردىكى»، - دەدى قالانىڭ ءبىلىم باسقارماسىنىڭ باسشىسى گۇلنار قوجابەرگەنوۆا.

ول ءوزىنىڭ سوزىندە جىل سايىن ءبىلىم باسقارماسى اقشا جيناۋعا جول بەرمەۋ ماقساتىندا ءار مەكتەپكە «ءبىلىم مەكەمەلەرىندە اقشا جيناۋعا تيىم سالىنعانى تۋرالى» حات جىبەرىلەتىنىن، ونى ورىنداۋ قالاداعى ءبىلىم ۇيىمدارىنىڭ ءبىرىنشى باسشىلارىنا جۇكتەلەتىنىن ايتتى. تەك 2018 جىلى 7 مەكتەپ ديرەكتورلارى قىزمەتتەرىنەن بوساتىلعان.

Abai.kz