«تسيفرلىق قازاقستان» باعدارلاماسىن مەملەكەت باسشىسى حالىققا ارناعان جولداۋىندا ەرەكشە اتاپ وتكەن بولاتىن. اقپاراتتىق تەحنولوگيالاردىڭ قارىشتاپ دامىپ بارا جاتقان مىنا زامانىندا IT سالاسىن دامىتپاساق، دامىعان 30 ەلدىڭ قاتارىنان كورىنۋ بىزگە جاي ارمان بوپ قالارى انىق. ويتكەنى، وركەنيەتتى ەلدەردىڭ بارلىعى وسى ساندىق جۇيەگە كوشىپ، ونەركاسىبىنىڭ دامۋىن جانە حالقىنىڭ ءال-اۋقاتىن جىلدان-جىلعا جاقسارتىپ كەلەدى.

تۇركىستان وبلىسىندا تسيفرلاندىرۋ ورتالىعى وتاندىق IT-جۇيەلەرىن ازىرلەۋشىلەرمەن بىرلەسىپ تۇركىستان قالاسىندا بىرنەشە پيلوتتىق جوبالاردى جۇزەگە اسىرۋدا. ماسەلەن، اعىمداعى جىلدىڭ جەلتوقسان ايىندا تۇركىستان قالاسىنىڭ قوعامدىق كولىكتەرىندە ەلەكتروندى بيلەتتەۋ جۇيەسى جۇمىسىن باستايدى.

سونىمەن قاتار، وبلىس ورتالىعىنداعى  وتىرار شاعىن اۋدانىندا كوپ پاتەرلى 10 ءۇيدى قامتيتىن «اقىلدى كۆارتال» جوباسىن جۇزەگە اسىرۋ بويىنشا بەلسەندى جۇمىستار جۇرگىزىلىپ جاتىر. بۇل تۋرالى تۇركىستان وبلىسىنىڭ وڭىرلىك كوممۋنيكاتسيالار قىزمەتىندە وتكەن بريفينگتە تۇركىستان وبلىسىنىڭ تسيفرلاندىرۋ ورتالىعىنىڭ باسشىسى اسىلبەك جانعۇلوۆ مالىمدەدى.

تۇركىستان وبلىسىنىڭ وڭىرلىك كوممۋنيكاتسيالار قىزمەتىنىڭ حابارلاۋىنشا، وبلىستاعى ءىىد-مەن بىرىگىپ قاۋىپسىزدىك پەن بەينەباقىلاۋدى قامتاماسىز ەتۋ بويىنشا بىرنەشە جوبالار جۇزەگە اسىرىلۋدا. اعىمداعى جىلدىڭ سوڭىنا دەيىن وبلىستىق تجد ءۇشىن «112 قىزمەتى» اۆتوماتتاندىرىلعان جۇيەسىن پايدالانۋعا ەنگىزۋ كوزدەلىپ وتىر.

«تسيفرلاندىرۋ جوبالارىن ۇيلەستىرۋدى، ساراپتامالىق قولداۋدى جانە ءوزارا ىقپالداستىرۋدى قامتاماسىز ەتۋ ءۇشىن تۇركىستان وبلىسى اكىمدىگى «تۇركىستان» اكك» اق بازاسىندا 2018 جىلى قازان ايىندا تسيفرلاندىرۋ ورتالىعىن قۇردى. قازىرگى ۋاقىتتا تسيفرلاندىرۋ ورتالىعى تسيفرلىق قازاقستان مەملەكەتتىك باعدارلاماسىن جۇزەگە اسىرۋ شەڭبەرىندە 15-تەن استام حالىقارالىق جانە قازاقستاندىق IT كومپانيالارمەن ىنتىماقتاستىق تۋرالى مەموراندۋمدارعا قول قويدى. اتقارىلعان ءىس-شارالار تۇركىستان وبلىسىنا سالىناتىن ينۆەستيتسيا كولەمىن 30 ملن. اقش دوللارىنا جەتۋىنە جانە IT-ماماندار ءۇشىن قوسىمشا جۇمىس ورىندارىنىڭ اشىلۋىنا سەپتىگىن تيگىزەدى دەپ كۇتىلۋدە»، - دەدى  اسىلبەك اسپانديارۇلى.

تسيفرلاندىرۋ ورتالىعى مەملەكەتتىك ورگانداردىڭ ماماندارىنا، وبلىستىق، اۋداندىق جانە قالالىق اكىمدىكتەرگە تسيفرلاندىرۋ بويىنشا جول كارتالارىن ازىرلەۋدە قولداۋ كورسەتەدى. تۇركىستان وبلىسىنىڭ بارلىق قالالارىنىڭ ىشىندە العاش بولىپ تۇركىستان وبلىسىنداعى تسيفرلاندىرۋ باعدارلاماسىنا سارىاعاش قالاسى قوسىلدى. تسيفرلاندىرۋ ورتالىعىمەن بىرگە اقىلدى قالا – Sary Agash Digital جوباسى ازىرلەندى.

2021 جىلعا دەيىن  ەسەپتەلگەن جوبالار پورتفەلىندە 28 جوبا بار، ولار: قالانى ءتيىمدى باسقارۋ جانە وسى پروتسەسسكە بەلسەندى ازاماتتاردى  تارتۋدى قامتاماسىز ەتپەك. تسيفرلاندىرۋ ورتالىعىنىڭ الداعى جوسپارى – ۇلتتىق گەواقپاراتتىق جۇيەسىنىڭ بولىگى رەتىندە تۇركىستان وبلىسىنىڭ بىرىڭعاي گەوپورتالىن قۇرۋ، سونىمەن بىرگە تۇركىستان وبلىسىن تسيفرلاندىرۋعا نيەتتى وتاندىق IT كومپانيالارعا تسيفرلاندىرۋ جوبالارىن جۇزەگە اسىرۋلارى ءۇشىن بىرىڭعاي سەرۆيستىك مودەل ۇسىنۋ.

Abai.kz