تاۋەلسىزدىگىمىزدى قورعاي الماساق ىستەگەن شارۋانىڭ بارلىعى بەكەر. بۇل تۋرالى بۇگىن «جاس سارباز» بالالار مەن جاسوسپىرىمدەر اسكەري-پاتريوتتىق قوزعالىسى» رەسپۋبليكالىق قوعامدىق بىرلەستىگىنىڭ جانە اسكەري-پاتريوتتىق كلۋبتاردىڭ تاربيەلەنۋشىلەرىمەن كەزدەسكەن ەلباسى - قر قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆ ايتتى، دەپ حابارلايدى قازاقپارات ءتىلشىسى.

«ەرتەڭ قازاقستان ەل بولىپ ءوزىنىڭ تۇڭعىش  پرەزيدەنتىن سايلاعان كۇن. ول كۇندى ءبىزدىڭ پارلامەنت مەرەكە كۇنى دەپ تاعايىندادى. ماسەلە بىرەۋدىڭ اتى-جونىندە ەمەس، ول كۇنى مەن سايلاندىم. بىراق، ول قازاق قازاق بولعالى، ەل بولعالى تۇڭعىش رەت تاريحىندا ءوزىنىڭ ويىمەن، ءوزىنىڭ پىكىرىمەن ءوز پرەزيدەنتىن سايلاعان ەڭ تۇڭعىش قۋانىشتى كۇنى بولاتىن. سونىڭ قارساڭىندا سىزدەرمەن كەزدەسىپ وتىرمىز»، - دەدى ەلباسى.

قر پرەزيدەنت جاقىنداعى بۇكىل حالىققا ارناعان جولداۋىندا جاستارعا پاتريوتتىق تاربيەلەۋ ماسەلەسىنە ايرىقشا نازار اۋدارىلعاندىعىن اتاپ ءوتتى.

«بارلىق ىستەپ جاتقان شارۋانىڭ، 27 جىلدىڭ ىشىندەگى تاۋەلسىزدىكتى نىعايتۋ ءۇشىن، مەملەكەتىمىزدى دۇنيەجۇزىنە پاش ەتۋ ءۇشىن ىستەگەن جۇمىسىمىزدىڭ بارلىعى - وتاندى قورعاۋ. ەگەردە تاۋەلسىزدىگىمىزدى، بۇگىندە الەمگە بەلگىلى بولعان قازاقستانىمىزدى، كوك بايراعىمىزدى قورعاي الماساق ىستەگەن شارۋانىڭ بارلىعى بەكەر بولادى. سوندىقتان بۇگىنگى «جاس سارباز» رەسپۋبليكالىق قوعامدىق بىرلەستىگىنىڭ  قۇرىلۋىمەن بارشاڭىزدى قۇتتىقتايمىن»، - دەدى مەملەكەت باسشىسى.

ەلباسى اسكەري ادام ءۇشىن، اسكەري بولىمشەلەر ءۇشىن تۋ، جالاۋ بارلىق ۋاقىتتا باتىرلىقتىڭ، وتانسۇيگىشتىكتىڭ بەلگىسى بولىپ سانالاتىندىعىن باسا ايتتى.

«ول تۋدى جوعارى ۇستاۋ، ول تۋدى قيسايتپاۋ بارلىعىمىزدىڭ پارىزىمىز.  ءبىز وتانىمىزدى قورعاي الماساق، شەكارامىزدىڭ شەبىندە تۇرا الماساق ەلىمىز ءوسىپ-وركەندەمەيدى. ىستەپ جاتقان شارۋانىڭ بارلىعى جاستار ءۇشىن، بولاشاق ءۇشىن. سەندەردىڭ ومىرلەرىڭ بىزدەن دە جاقسى بولسىن دەپ، ءبىزدىڭ قازاقستانىمىز بولاشاقتا بۇدان دا جوعارى، باي بولسىن دەپ  ىستەپ جاتقان شارۋالارىمىز بار»، - دەدى نۇرسۇلتان نازارباەۆ.

Abai.kz