پارلامەنت سەناتىنىڭ توراعاسى قاسىم-جومارت توقاەۆ كانادانىڭ گەنەرال-گۋبەرناتورى جيۋلي پايەتتپەن كەزدەستى. بۇل تۋرالى Abai.kz اقپاراتتىق پورتالى سەناتتىڭ ءباسپاسوز قىزمەتىنە سىلتەمە جاساي وتىرىپ حابارلايدى.

توراعا ج. پايەتتىڭ قازاقستانعا ساپارى ەكىجاقتى ىنتىماقتاستىققا ەلەۋلى تۇردە سەرپىن بەرەتىن ماڭىزى زور وقيعا ەكەنىن اتاپ ءوتتى. ق.توقاەۆ ءبىزدىڭ ەلدەرىمىزدىڭ كوپتەگەن ورتاق سيپاتتارى بار ەكەنىن، ونىڭ ءوزى ساۋدا-ەكونوميكالىق، مادەني-گۋمانيتارلىق، ەنەرگەتيكا، اۋىل شارۋاشىلىعى، تەحنولوگيالار، ءبىلىم بەرۋ جانە اەروعارىش سالالارىنداعى ىنتىماقتاستىق ءۇشىن مۇمكىندىكتەر اشاتىنىن ايتتى.

ج. پايەتت بورتىندا كانادالىق استروناۆتى بار عارىش كەمەسى ۇشقان بايقوڭىر عارىش ايلاعىنا بارعان ساپارىنان العان اسەرىمەن ءبولىستى جانە كانادا جاعىنىڭ قازعارىش مەكەمەسىمەن ىنتىماقتاستىق تۋرالى مەموراندۋمعا قول قويۋ نيەتى بار ەكەنىن حابارلادى.

پارلامەنت جوعارعى پالاتاسىنىڭ توراعاسى قازاقستاننىڭ ساياسي جۇيەسىندەگى سەناتتىڭ ءرولى جانە مەملەكەت باسشىسى ن.نازارباەۆتىڭ باستاماسىمەن جۇزەگە اسقان ساياسي جانە الەۋمەتتىك-ەكونوميكالىق جاڭعىرۋ باعدارلامالارىن ىسكە اسىرۋداعى دەپۋتاتتاردىڭ جۇمىسى تۋرالى مەيماندى حاباردار ەتتى.

جۇزدەسۋشىلەر قازاقستان مەن كانادا اراسىنداعى پارلامەنتارالىق ۇنقاتىسۋدىڭ كەلەشەگى تۋرالى پىكىر الماستى. ق.توقاەۆ ەكى ەلدىڭ زاڭ شىعارۋ ورگاندارىنىڭ بايلانىستارىن دامىتۋعا سەناتتىڭ مۇددەلى ەكەنىن جانە ەقىۇ پارلامەنتتىك اسسامبلەياسى مەن پارلامەنتارالىق وداقتا كانادا پارلامەنتشىلەرمەن ءوزارا ناتيجەلى ءىس-قيمىلدى اتاپ ءوتتى. سەنات باسشىسى ءوزىنىڭ كانادالىق ارىپتەسىنە استاناعا رەسي ساپارمەن كەلۋگە شاقىرۋىن جولدادى.

ج. پايەتت ءوز كەزەگىندە قازاقستانمەن ەكىجاقتى كۇن تارتىبىندەگى اۋقىمدى ماسەلەلەر بويىنشا، سونداي-اق كوپتاراپتى ىنتىماقتاستىق اياسىنداعى  بايلانىستاردى دامىتۋعا كانادانىڭ مۇددەلى ەكەنىن ناقتىلادى. اتاپ ايتقاندا، بۇۇ قاۋىپسىزدىك كەڭەسىنە تۇراقتى ەمەس مۇشە بولىپ سايلانۋ جونىندەگى وتتاۆا ناۋقانى تۇرعىسىندا گەنەرال-گۋبەرناتور وسى حالىقارالىق ءىرى ۇيىمداعى جوعارى ورگانعا قاتىسۋىن اياقتاپ جاتقان قازاقستاننىڭ تاجىريبەسىنە ىقىلاس ءبىلدىردى.

ق. توقاەۆ استانانىڭ بۇۇ قاۋىپسىزدىك كەڭەسىندەگى باسىمدىقتارى، يادرولىق قارۋدى تاراتپاۋ جانە جاھاندىق قاۋىپسىزدىك جونىندەگى پرەزيدەنت ن. نازارباەۆتىڭ باستامالارى تۋرالى كانادالىق دەلەگاتسيانى حاباردار ەتتى. سەنات توراعاسى ادامزات ومىرىندەگى كوكەيكەستى ماسەلەلەردى شەشۋ ءۇشىن كونفەسسيالار مەن ساياسي كوشباسشىلاردى ءبىر ۇستەل باسىندا بىرىكتىرگەن دۇنيە جۇزىندەگى وكىلدى الاڭ بولىپ تابىلاتىن الەمدىك جانە ءداستۇرلى دىندەر ليدەرلەرىنىڭ VI سەزىنىڭ قورىتىندىلارىمەن ءبولىستى. ق. توقاەۆ فورۋم جۇمىسىنا ءار جىلداردا بۇۇ باس حاتشىسى، مەملەكەتتەر باسشىلارى، دۇنيە جۇزىنە تانىمال ساياساتكەرلەر قاتىسقانىن، ونىڭ ىشىندە كانادانىڭ بۇرىنعى پرەمەر-ءمينيسترى جان كرەتەن دا بولعانىن ايتتى.

Abai.kz