استاناداعى ۇلتتىق اكادەميالىق كىتاپحانادا قازاقستاننىڭ حالىق جازۋشىسى، مەملەكەت جانە قوعام قايراتكەرى ءابىش كەكىلبايۇلىنىڭ 80 جىلدىق مەرەيتويىنا وراي جاڭا وقۋ زالى اشىلادى.

جاڭا زالدى اشۋداعى ماقسات – قالامگەردىڭ ءومىرى مەن شىعارماشىلىعى جانە ونىڭ ادەبيەت سالاسىنا سىڭىرگەن ەڭبەگىن كەڭىنەن ناسيحاتتاۋ.

قر ۇلتتىق اكادەميالىق كىتاپحانا زامانىمىزدىڭ زاڭعار تۇلعاسى ءابىش كەكىلباەۆتىڭ 80 جىلدىق مەرەيتويىن اتاپ ءوتۋ ءۇشىن كوپتەگەن جۇمىستاردى اتقارۋدا. جاڭا زالدا اۆتوردىڭ قازاق، ورىس، اعىلشىن، نەمىس، بولگار جانە ۋكراين تىلدەرىندەگى كىتاپتارى ۇسىنىلىپ وتىر. سونداي-اق، ءىس-شارا بارىسىندا ءا.كەكىلبايۇلىنىڭ جەكە كىتاپحاناسى قورىنداعى قالامگەرلەردىڭ قولتاڭبا كوللەكتسيالارىنىڭ جيناعىنان ۇلتتىق اكادەميالىق كىتاپحانانىڭ باستاماسىمەن جارىق كورگەن «قالامگەر قولتاڭباسى» كىتابى تانىستىرىلادى.

قر ۇاك قورىندا ءا.كەكىلبايۇلىنىڭ كوپتەگەن شىعارمالارى بار. سونداي-اق، قر ۇلتتىق اكادەميالىق كىتاپحاناسى بازاسىنداعى قازاقستاننىڭ ۇلتتىق ەلەكتروندى كىتاپحاناسىنىڭ ۆەب-پورتالىندا جازۋشىمەن اۆتورلىق كەلىسىم-شارت جاسالىنىپ، كىتاپتارى وقىرماندارعا قولجەتىمدى بولىپ وتىر. ونىڭ بىرنەشە كىتاپتارى تسيفرلىق فورماتقا ءوتتى: «شىڭىراۋ»، «ەلەڭ-الاڭ»، «قۇس قاناتى»، «دالا باللادارى»، «ماحاببات مۇناراسى»، «زامانمەن سۇحبات»، «حانشا داريا حيكاياسى».

اتالمىش زال قر پرەزيدەنتى ن.ءا.نازارباەۆتىڭ «بولاشاققا باعدار:رۋحاني جاڭعىرۋ» اتتى باعدارلامالىق ماقالاسىن ىسكە اسىرۋ اياسىندا قر مادەنيەت جانە سپورت مينيسترلىگىنىڭ قولداۋىمەن اشىلماق.

Abai.kz