وڭدەلگەن تاۋارلاردىڭ ەكسپورتىن ۇلعايتۋ جانە قولدانىستاعى كاسىپورىنداردىڭ سانىن ارتتىرۋ شارالارى تۋرالى قر ۇكىمەتىنىڭ ءباسپاسوز ورتالىعىندا وتكەن ءباسپاسوز ءماسليحاتىندا قر ينۆەستيتسيالار جانە دامۋ ۆيتسە-ءمينيسترى تيمۋر توقتاباەۆ پەن قر ينۆەستيتسيالار جانە دامۋ مينيسترلىگىنىڭ يندۋستريالدى دامۋ جانە ونەركاسىپتىك قاۋىپسىزدىك كوميتەتىنىڭ توراعاسى الماس باتانوۆ ايتىپ بەردى. بۇل تۋرالى پرەمەر-ءمينيستردىڭ رەسمي سايتى حابارلاپ ايتتى.

ينۆەستيتسيالار جانە دامۋ ۆيتسە-ءمينيسترى ت. توقتاباەۆ قازاقستان وڭدەۋ ونەركاسىبىنە باستى نازار اۋداراتىندىعىن اتاپ ءوتتى.

«ءبىز قازىر ەرەكشە ۋاقىتتا جۇمىس ىستەپ جاتىرمىز، ەكى بەسجىلدىق زاڭنامالىق جانە ينفراقۇرىلىمدىق نەگىزدى قالادى. ونەركاسىپتى دامىتۋ ءۇشىن قاجەتتى ينستيتۋتتار قۇرىلدى. مۇنىڭ بارلىعى مەملەكەتتىك قولداۋ شارالارىن قامتاماسىز ەتۋ ءۇشىن جاسالدى. بىزدە بىرىڭعاي ەكونوميكالىق كەڭىستىك، ۇلكەن نارىق بار، ەندى ءبىزدىڭ ونىمدەرىمىز ەركىن قوزعالىپ، جاڭا شىڭداردى باعىندىرىپ، قوسىمشا پايدا تابا الادى»، — دەدى ت. توقتاباەۆ.

ۆيتسە-ءمينيستردىڭ ايتۋىنشا، بۇل ءۇشىن بارلىق قوسىمشا جاعداي جاسالاتىن بولادى. ەكسپورتتىق ونىمدەر شىعاراتىن جۇمىس ىستەپ تۇرعان كاسىپورىندار ءۇشىن جان-جاقتى كومەك كورسەتىلمەك.

قر ينۆەستيتسيالار جانە دامۋ مينيسترلىگىنىڭ يندۋستريالدى دامۋ جانە ونەركاسىپتىك قاۋىپسىزدىك كوميتەتىنىڭ توراعاسى الماس باتانوۆتىڭ ايتۋىنشا، قازاقستان وڭدەۋشى ونەركاسىپتى دامىتۋدا الدىنا ۇلكەن ماقساتتار قويىپ وتىر. 2025 جىلعا قاراي ەڭبەك ونىمدىلىگى 1,7 ەسە ارتىپ، نەگىزگى كاپيتالعا سالىناتىن ينۆەستيتسيا كولەمى ەكى ەسە كوبەيەدى دەپ كۇتىلۋدە.

«وڭدەلگەن تاۋارلار ەكسپورتى مەن جۇمىس ىستەپ تۇرعان كاسىپورىندار سانى 2,3 ەسەگە ارتادى. بۇدان باسقا، گارۆاردتىڭ ەكونوميكالىق كۇردەلىلىگى يندەكسى بويىنشا ءبىز 84-ءشى ورىندامىز. الدا 55-ءشى ورىنعا كوتەرىلۋدى جوسپارلاپ وتىرمىز»، — دەدى ا. باتانوۆ.

Abai.kz