جۇما, 20 قىركۇيەك 2019
46 - ءسوز 1810 4 پىكىر 6 جەلتوقسان, 2018 ساعات 07:34

جاپونداردىڭ ۇيدەگى ايەلىنە دەيىن ۇلكەن ءۇيدىڭ قامىن ويلايدى...

ءبىزدىڭ الاشوردالىقتار جاپونيانى ۇلگى ەتتى دەگەندە، يمپەراتور مەيدزيدىڭ تۇسىن ۇلگى ەتكەن. وسى ادام باسشى بولا سالىسىمەن، ءبىر ورىندا قوزعالماعاننان بورسي باستاعان جۇيەنىڭ تالقانىن شىعارىپ، قانشاما رەفورمانى قابىلداپ تاستاعان. جاياۋ اسكەرىن پرۋسسيالىق، تەڭىز كۇشتەرىن بريتاندىق، مەكتەبىن فرانتسۋز ۇلگىسىندە قۇرادى.

حالىق تا مۇنداي تەز وزگەرىستەرگە تەز بەيىمدەلە قويمايدى باسىندا. مىسالى، ەڭ العاش تەلەگراف باعاندارىن سالعان كەزدە، جۇرت ونىڭ پوشتاشىدان جىلدام حابار جەتكىزەتىنىن بىلەدى. سويتىپ، تەلەگرافتىڭ باعانىنا شىعىپ، ونىڭ سىمىنا اناسىنا جىبەرەر حاتىن نە بالاسىنا جىبەرەر سالەمدەمەسىن ءىلىپ قويادى ەكەن) بولماسا، پويىز جۇرە باستاعان كەزدە جاپوندار ۇيگە كىرگەندەگى ادەتىمەن سىرتىنا اياقكيىمدەرىن شەشىپ كەتەدى باسىندا. پويىز ءجۇرىپ، ول باسقا ستانسادان توقتاعاندا، ەشكىم اياق كيىمىن تابا الماي قالادى) ءوستىپ ءجۇرىپ، دامىعان عوي بۇلار..

بىراق، ەڭ باستى ساباقتى بۇلارعا تابيعات بەرگەن سەكىلدى. جەر از. جەر سىلكىنىسى ءجيى. تەڭىزدەن تسۋنامي سوعىپ تۇرادى. ءبىز سەكىلدى كوشىپ كەتەيىن دەسە، جەر جوق تاعى دا. امالدىڭ جوعىنان ويلانادى. ويلانعان سوڭ، بىردەڭە ويلاپ تابادى عوي. مىسالى، مۇندا جەر سىلكىنىسىنىڭ ماگنيتۋداسى 9 بالعا جەتسە دە، بىردە-ءبىر عيماراتى قۇلاي قويمايدى. ساۋلەتىن شىڭداعان. جەر سىلكىنىسى بولاردان 6-10 سەكۋند بۇرىن ۇيالى تەلەفونعا، تەلەديدارعا سيگنال جىبەرىلەدى. سەيسمولوگياسى سۇمدىق دامىعان. 6-10 سەكۋند بۇرىن سۋ، گاز، جارىق - بارلىعى اۆتوماتتى تۇردە وشەدى. سول 6-10 سەكۋند ىشىندە ساعاتىنا 300 شاقىرىم جىلدامدىقپەن كەلە جاتقان پويىز دا توقتاپ ۇلگەرەدى. ايتپاقشى، وسى سوڭعى دەرەكتى جاپونياداعى توحوكۋ ۋنيۆەرسيتەتىنىڭ پروفەسسورى نۇربوسىن جانپەيىسوۆتىڭ جەتى جىل بۇرىن بەرگەن سۇحباتىنان الدىم.

تابيعاتتان قورقۋ ەمەس، ونىمەن ۇيلەسىمدە ءومىر ءسۇرۋ جاعىنان جاپون ۇلگى ەكەنى انىق. مىسالى، جاڭاعى نۇربوسىن ايتقانداي، ۇيدە وتىرعان ايەلدەرىنە دەيىن عالامدىق جىلىنۋعا قارسى قانداي ۇلەس قوسۋ ماسەلەسىن ويلايدى دەيدى. ماسەلەن، ولار مايلى ىدىستىڭ مايىن شۇبەرەكپەن ءسۇرتىپ الىپ بارىپ قانا جۋادى. ويتكەنى مايلى سۋ، بىرىنشىدەن، قۇبىردى كىرلەتەدى. ەكىنشىدەن، مۇحيتقا بارىپ قوسىلسا، قورشاعان ورتاعا زالالىن تيگىزەدى. ۇيدەگى ايەلىنە دەيىن ۇلكەن ءۇيدىڭ قامىن ويلايدى... ال ءبىز نە ىستەپ جاتىرمىز؟

وركەن كەنجەبەكتىڭ facebook پاراقشاسىنان

Abai.kz

4 پىكىر