دۇيسەنبى, 27 مامىر 2019
798 10 پىكىر 6 جەلتوقسان, 2018 ساعات 11:02

«التىن توبىلعى» بايقاۋىنىڭ جەڭىمپازدارى انىقتالدى

قر تۇڭعىش پرەزيدەنتى – ۇلت كوشباسشىسى قورى جىل سايىن ۇلتتىق ادەبيەتتە جاڭا ەسىمدەردى قالىپتاستىرۋ جانە جاس قالامگەرلەردىڭ ومىرلىك فيلوسوفياسىن كورسەتەتىن قازىرگى زامانعى ادەبيەتكە قوعامنىڭ قىزىعۋشىلىعىن ارتتىرۋ ماقساتىندا ۇيىمداستىراتىن «التىن توبىلعى» بايقاۋىنىڭ قورىتىندىسى جاريالاندى.

«بايقاۋ اتالىمدارى بەلگىلى ءبىر دارەجەدە ەلباسىنىڭ «ۇلى دالانىڭ جەتى قىرى» ماقالاسىندا ايتىلعان حالقىمىزدىڭ رۋحاني قۇندىلىقتارىن ايشىقتايدى. سول سەبەپتى ۇلتىق مادەنيەتتى، تاريحتى جانە ەل جەتىستىكتەرىنە ارنالعان شىعارماشىلىق جۇمىستاردى بىرىكتىرىپ، جاڭا اتالىمدى قوسۋ مۇمكىندىگى قاراستىرىلۋدا»، — دەدى قانات جۇماباەۆ.

ەلباسى قورى عيماراتىنداعى جەڭىمپازداردى ماراپاتتاۋ كەشىنىڭ قورىتىندىسى مىناداي بولدى:

1) «جىلدىڭ ۇزدىك پروزاسى» – ايزات راقىش «اداسقاندار» شىعارماسىمەن

2) «جىلدىڭ ۇزدىك پوەزياسى» – قايسار قاۋىمبەك («كۇڭىرەنبە، مولالار») جانە ايبول يسلامعاليەۆ («جالعىزدىق كارتيناسى»)

3) «جىلدىڭ ۇزدىك بالالار ادەبيەتى» – الينا گاتينا

«استانانىڭ 20 جىلدىعىنا ارنالعان ۇزدىك شىعارما» اتتى ارنايى تاقىرىپتىق نوميناتسياسى بويىنشا  – شەرحان تالاپ («استانا بوياۋلارى»)

بيىلعى جىلى «جىلدىڭ ۇزدىك دراماتۋرگياسى» اتالىمى بويىنشا ۇسىنىلعان جۇمىستاردىڭ قويىلعان تالاپتارعا ساي كەلمەۋىنە بايلانىستى، جەڭىمپاز انىقتالعان جوق.

سونداي-اق «جىلدىڭ ۇزدىك پروزاسى» اتالىمى بويىنشا تۇرسىنبەك باشاروۆقا («چيريمە») جانە «جىلدىڭ بالالارعا ارنالعان ۇزدىك شىعارماسى» اتالىمىندا اقان مارعۇلانعا («جەتىقاراقشى») كوتەرمەلەۋ سىياقىسى رەتىندە 500 مىڭ تەڭگەدەن بەرىلدى.

ايتا كەتەيىك، بۇل بىرەگەي بايقاۋ پرەزيدەنتتىڭ «بولاشاققا باعدار: رۋحاني جاڭعىرۋ» ستراتەگيالىق ماقالاسىن جۇزەگە اسىرۋعا باعىتتالعان. ءوزىنىڭ باعدارلامالىق ماقالاسىندا نۇرسۇلتان نازارباەۆ دارىندى جانە تابىستى جاستارعا نازار اۋدارۋ جايلى ايتقان. «التىن توبىلعى» بايقاۋى جاس جازۋشىلاردىڭ شىعارماشىلىعىنا قولداۋ كورسەتۋ سياقتى ماقساتتاردى العا قويىپ وتىر. بايقاۋ قۇرىلتايشىسى، قر تۇڭعىش پرەزيدەنتى – ەلباسى قورى جىل سايىن 1,5 ميلليون كولەمىندە ارنايى نوميناتسيا تاعايىندادى. ماسەلەن، 2015 جىلى «ماڭگىلىك ەل» اتالىمىنداعى شىعارما اۆتورى، 2016 جىلى «قازاقستان رەسپۋبليكاسىنىڭ تاۋەلسىزدىگىنە 25 جىل اتالىمى بويىنشا جەڭىمپاز جانە بىلتىر «رۋحاني جاڭعىرۋ» باعدارلاماسىن جۇزەگە اسىرۋ ماقساتىنداعى «تۋعان ەل» تاقىرىپتىق اتالىمدارى ماراپاتتالدى. بيىل بايقاۋ ءتورتىنشى رەت ءوتتى جانە استانانىڭ 20 جىلدىعىنا ارنالدى.

Abai.kz

10 پىكىر