«اق جول» فراكتسياسى سالىقتىق امنيستيانى ءتيىمدى جۇرگىزۋ ءۇشىن ۇكىمەتكە ءوز ۇسىنىستارىن جولدادى – ءتيىستى دەپۋتاتتىق ساۋالدى ەكاتەرينا نيكيتينسكايا مالىمدەدى.

«قازىرگى ۋاقىتتا پارلامەنتتىڭ جانە قر ۇكىمەتىنىڭ بارلىق كۇش-جىگەرى جولداۋدى جۇزەگە اسىرۋعا باعىتتالعان. بيزنەس جاڭادان قۇرىلىپ، نولدەن جۇمىس ىستەي باستاۋى ءۇشىن پرەزيدەنت شاعىن جانە ورتا كاسىپكەرلىككە ارنالعان سالىقتىق راقىمشىلىق جۇرگىزۋدى تاپسىردى. سالىقتىق امنيستيا كاسىپكەرلەرگە زاڭنامالىق قىزمەتتى جاڭارتۋعا مۇمكىندىك بەرىپ قانا قويماي،  بيزنەستى زاڭعا قايشى اكىمشىلىك قىسىمنان قورعايدى. سالىقتىڭ نەگىزگى سوماسىن تولەگەن كاسىپكەرلەردى ايىپپۇلدار مەن وسىماقىلاردان بوساتۋ – بۇگىندە مەملەكەت باسشىسىنىڭ بيزنەستە قىزۋ تالقىعا تۇسكەن باستامالارىنىڭ ءبىرى بولدى»، - دەپ ايتىلعان دەپساۋالدا.

نيكيتينسكايا قارجى مينيسترلىگىنىڭ دەرەكتەرىن كەلتىرىپ ءوتتى. وعان سۇيەنسەك قازان ايىنىڭ باسىندا ايىپپۇلدار مەن وسىماقىلاردىڭ ۇلەسى شاعىن جانە ورتا كاسىپكەرلەردىڭ سالىقتىق قارىز مولشەرىنىڭ جالپى سوماسىنىڭ 40%-ىن قۇرايدى. سوعان قاراماستان، وسىماقىنىڭ سوماسى (111 ملرد) ايىپپۇلدىڭ سوماسىنان (5,8 ملرد) 20 ەسەگە دەيىن اسىپ كەتكەن. «اق جول» پارتياسى بۇل مۇنداي داۋ-دامايلار بويىنشا تالاپ قويۋ مەرزىمىنىڭ ارتىقتىعىن جانە ولاردىڭ ۋاقىتى ءوتىپ كەتكەننەن كەيىن (بۇرىنعى كۇنمەن) تۋىنداۋىنىڭ ايقىن دالەلى دەپ سانايدى.

بىلايشا ايتقاندا، پرەزيدەنتتىڭ سالىقتىق راقىمشىلىق جاساۋ جونىندەگى بۇل باستاماسى تەز ارادا سالىقتىق مىندەتتەمەلەر بويىنشا تالاپ قويۋ مەرزىمىن 5 جىلدان 3 جىلعا دەيىن قىسقارتۋ قاجەتتىلىگىنىڭ وزەكتىلىگىن ارتتىرا ءتۇستى. «اق جول» فراكتسياسى وسى حاقىندا ءبىر ەمەس بىرنەشە رەت تالاپ ەتكەن بولاتىن.

وزدەرىڭىزگە ءمالىم، 18 قازاندا قارجى مينيسترلىگى راقىمشىلىق جاساۋدىڭ نەگىزگى تاسىلدەرىن جاريالادى جانە بۇگىنگى كۇنى سالىق ورگاندارىنىڭ راقىمشىلىق جاساۋ ءتارتىبىن انىقتايتىن نورماتيۆتىك-قۇقىقتىق قۇجاتتار پاكەتى مەملەكەتتىك ورگاندارمەن كەلىسۋ پروتسەسىنەن وتۋدە. وسى ورايدا، دەپۋتات نيكيتينسكايا بريتاندىق ميللياردەر ريچارد برەنسوننىڭ دايەكسوزىن كەلتىرىپ ءوتتى: «بۇگە-شىگەسىنە دەيىن ءمان بەرۋ كوپ جاعدايدا بيزنەس – يدەيانىڭ تابىستى جۇزەگە اسۋىن انىقتاپ بەرەدى».

دەپۋتات جولداۋدى تالقىلاۋ بارىسىندا «اق جول» دەموكراتيالىق پارتياسىنىڭ اتىنا بيزنەس-قاۋىمداستىق تاراپىنان جوسپارلانعان اكىمشىلىك شارالاردىڭ تيىمدىلىگىن ارتتىرۋعا جانە شاعىن جانە ورتا كاسىپكەرلىكتىڭ قارجى جاعدايىن ساۋىقتىرۋدىڭ كەڭ اۋقىمدىلىعىن قامتاماسىز ەتۋگە مۇمكىندىك بەرەتىن ءبىرشاما ۇسىنىستار كەلىپ تۇسكەنىن اتاپ ءوتتى.

وسىعان بايلانىستى، «اق جول» دەپۋتاتتارى سالىقتىق امنيستيا جۇرگىزۋ كەزىندە كەلەسىدەي ماسەلەلەردىڭ زاڭدى شەشىمىن تابۋدى قامتاماسىز ەتۋ قاجەت ەسەپتەيدى:

- سالىقتىق بەرەشەكتى تىكەلەي اقشالاي قاراجاتتاردىڭ ءتۇسۋى ەسەبىنەن عانا ەمەس، سونداي-اق ەسەپكە الۋ ادىسىمەن تولەۋ كەزىندە ايىپپۇلداردى جانە وسىماقىلاردى ەسەپتەن شىعارۋ ءتارتىبىن قاراستىرۋدى;

- سالىقتىق راقىمشىلىققا ىلىككەن سالىق تولەۋشىلەردىڭ قاتارىنا، كەڭ تارالعان پايدالى قازبا بايلىقتاردى ءوندىرۋشى شاعىن جانە ورتا بيزنەستى قوسۋدى (اقپاراتقا جۇگىنسەك، بۇل توپتان تەك سۋ مەن ەمدىك ساز-بالشىقتاردى پايدالانۋشىلارعا عانا راقىمشىلىق جاساۋ جوسپارلانۋدا. ال، جول قۇرىلىسى جانە قۇرىلىس ماتەريالدارىن ءوندىرۋ سالاسىنداعى كوپتەگەن كاسىپكەرلەر نازاردان تىس قالىپ وتىر);

- ۇستىمىزدەگى جىلدىڭ 10 قازانىنداعى سالىق بەرەشەگىن وتەۋ ەسەبىنە ايىپپۇلدار مەن وسىماقىلار سوماسىن باستاپقى الىپ تاستاۋ جاعدايىندا كەيىن ايىپپۇلدار مەن وسىماقىلاردى تومەندەتۋ ارقىلى ولاردى نەگىزگى قارىزدى وتەۋ ەسەبىنە ەسەپكە الۋ مۇمكىندىگىن قاراستىرۋ;

- اعىمداعى جىلعى 1 قازانعا دەيىن زاڭ بۇزۋشىلىققا جول بەرگەن شوك سۋبەكتىلەرىن ايىپپۇلدار مەن وسىماقىنى تولەۋدەن بوساتۋ. الايدا ءوز ەركىمەن تولەۋ مەرزىمى ءوتىپ كەتپەگەن بولۋى كەرەك جانە اتالعان سالىق تولەۋشىلەر سالىقتىڭ نەگىزگى سوماسىن وتەۋگە ءتيىس;

- سالىقتىق تەكسەرىس جۇرگىزۋ ناتيجەسىندە ەسەپكە الىنعان جانە
1 قازانداعى جاعداي بويىنشا شاعىم ءتۇسىرۋ كەزەڭىندەگى ايىپپۇلدار مەن وسىماقىلاردى ەسەپتەن شىعارۋ تالاپتارىن بەلگىلەۋ;

- تولەم قابىلەتسىزدىگىن رەتتەۋ يا بولماسا وڭالتۋ راسىمدەرىنەن وتكەن سالىق تولەۋشىلەردىڭ ايىپپۇلدارى مەن وسىماقىسىن ەسەپتەن شىعارۋدىڭ ارنايى تەتىكتەرىن قاراستىرۋ. سەبەبى ولاردىڭ سالىقتىق بەرەشەگىنىڭ مەرزىمى ءوتىپ كەتكەندىكتەن سالىقتىق امنيستياعا ىلىككەندەردىڭ تىزىمىنە قوسىلماي قالۋى ىقتيمال.

بۇدان باسقا، نيكيتينسكايا 2001-2002 جىلداردان بەرى اۋماقتىق مەملەكەتتىك كىرىس ورگاندارىندا جەكە تۇلعالاردىڭ ققس، الەۋمەتتىك سالىق، ءوندىرىپ الىنعان جەكە تابىس سالىعى  بويىنشا قارىزدارى ەسەپكە الىنىپ كەلگەنىنە ەكەنىنە نازار اۋداردى. سالىق ورگاندارى ولاردان ءوندىرىپ الا المايدى، سەبەبى سونىڭ نەگىزىندە اتلاعان سومالار ەسەپكە الىنعان قۇجاتتتارى جوق. اتالعان سومانى رەسمي تۇردە ەسەپتەن شىعارۋ شاعىن بيزنەسكە قوسىمشا جەكە تۇلعالار سانىنىڭ كىرۋىنە مۇمكىندىك بەرەدى.

«اق جول» فراكتسياسى سالىقتىق قارىزدار بويىنشا تالاپ قويۋ مەرزىمىن  5 جىلدان 3 جىلعا دەيىن قىسقارتۋدى 2020 جىلدان باستاپ ەمەس، اعىمداعى قارجىلىق جىلدان باستاپ قولعا الۋ ماسەلەسىن تاعى ءبىر مارتە كوتەردى. وسىلايشا مەملەكەت ودان تۋىندايتىن سالدارىنىڭ الدىن الىپ قويماي، شاعىن جانە ورتا بيزنەستى تولەم قابىلەتسىزدىگىنە دۋشار ەتەتىن باستى ءارى ماڭىزدى سەبەپتەردى جويا الادى.

«اقجولدىقتار» جوعارىدا كورسەتىلگەن ۇسىنىستار پرەزيدەنتتىڭ سالىقتىق راقىمشىلىق بويىنشا جۇكتەگەن تاپسىرمالارىن ساپالى ورىنداۋعا مۇمكىندىك بەرەتىنىنە سەنىمدى.

Abai.kz