بەرليندە قازاقستان-گەرمانيا ىسكەرلىك كەڭەسىنىڭ ستراتەگيالىق ىنتىماقتاستىق جونىندەگى 11-وتىرىسى وتكەن ەدى. بۇل تۋرالى Abai.kz اقپاراتتىق پورتالى atameken.kz سايتىنا سىلتەمە جاساي وتىرىپ حابارلايدى. 

قازاقستاندىق دەلەگاتسيا قۇرامىندا قازاقستان-گەرمانيانىڭ ىسكەرلىك كەڭەسىنىڭ تەڭ توراعاسى جانە «اتامەكەن» قر ۇكپ تورالقا توراعاسى تيمۋر قۇلىباەۆ، قازاقستان رەسپۋبليكاسىنىڭ گەرمانياداعى ەلشىسى بولات ءنۇسىپوۆ، سونىمەن قاتار ۇلتتىق كومپانيالار مەن بيزنەس-قوعامداستىق وكىلدەرى قاتىستى.

تالقىلاۋدىڭ نەگىزى تاقىرىبى – ينۆەستيتسيالىق جوبالار مەن ەكى ەل اراسىنداعى ىسكەرلىك قارىم-قاتىناستى نىعايتۋعا ارنالدى.

كەزدەسۋدە تيمۋر قۇلىباەۆ، سوڭعى ءتورت جىل ىشىندە قازاقستان مەن گەرمانيا كاسىپورىندارى جالپى سوماسى 2 ملرد ەۋرو كولەمىندە جيىرمادان استام كەلىسىمشارتقا قول قويىلعانىن ايتتى. سپيكەر بارلىق جوسپارلانعان جوبالار، اسىرەسە، مەملەكەت باسشىسىنىڭ ەكونوميكانى ءارتاراپتاندىرۋ جونىندەگى مىندەتتەرىنىڭ اياسىندا  ىسكە اسىرىلاتىنىنا سەنىم ءبىلدىردى.

«گەرمانيا بيزنەسى شيكىزاتتى ەمەس سەكتورعا 90%-دان استام ينۆەستيتسيا سالۋدا. ءبىز مۇنداي سەرىكتەستىكتى  قولدايمىز»، – دەدى تيمۋر قۇلىباەۆ.

تورالقا توراعاسى «اتامەكەن» قر ۇلتتىق كاسىپكەرلەر پالاتاسى جانە ۇكىمەتتىڭ كاسىپكەرلىك احۋالدى جاقسارتۋ جانە شەتەلدىك ينۆەستيتسيالاردى تارتۋدا جاساپ وتىرعان شارالارى تۋرالى ايتتى.

«اتامەكەن» بيزنەس-قوعامداستىقپەن، ونىڭ ىشىندە شەتەلدىك كاسىپورىندارمەن بەلسەندى جۇمىس ىستەپ كەلەدى. ولار مەملەكەتتىڭ باقىلاۋ فۋنكتسياسىن اكىمشىلىكتەندىرۋدە قانداي ماسەلەلەر بارىن بىزگە تىكەلەي ايتادى. ينۆەستورلارىمىز قازاقستاندا زاڭنامانى جەتىلدىرۋ جانە جۇمىس ىستەۋگە بارىنشا قولايلى جاعداي جاساۋعا بەلسەندى ۇدەرىس ءجۇرىپ جاتقانىن ايتۋدا», – دەدى «اتامەكەن» قر ۇكپ تورالقا توراعاسى.

تيمۋر قۇلىباەۆ اگروونەركاسىپ كەشەنى سەكتورىن دامىتۋدا ءوزارا ىنتىماقتاستىقتىڭ كەلەشەگى زور ەكەندىگىن اتاپ ءوتتى.

«قازاقستان ۇلكەن تەرريتورياعا يە مەملەكەت، بىراق بىزگە اۋىل شارۋاشىلىعى ونىمدەرىن تەرەڭ وڭدەۋدە جاڭا تەحنولوگيالار جانە ەۋرازيالىق ەكونوميكالىق وداق، قىتاي، ورتا ازيانىڭ وتكىزۋ نارىقتارى قاجەت. بارلىق جەردە ءونىمىمىزدى جەتكىزۋگە مۇمكىندىك بار، بىراق وعان اناعۇرلىم ءتيىمدى اۋىل شارۋاشىلىعى ءوندىرىسى قاجەت. گەرمانيادا مۇنداي تاجىريبە بار. اۋىل شارۋاشىلىعى ونىمدەرىنىڭ ەكسپورتىمەن اينالىسا الاتىن حالىقارالىق كومپانيالاردىڭ بارى تۇسىنىكتى. بۇل باعىتتا دا ىنتىماقتاستىق ءۇشىن الەۋەت جەتكىلىكتى»، – دەدى تيمۋر قۇلىباەۆ.

ۇلتتىق كاسىپكەرلەر پالاتاسىنىڭ باسشىسى قازاقستاندا ءدۋالدى ءبىلىم بەرۋ جۇيەسىن ەنگىزۋدە حالىقارالىق ىنتىماقتاستىق باعىتىندا گەرمانيا قوعامىمەن (GIZ) ءوزارا بايلانىستىڭ ماڭىزدىلىعىن ايتتى.

«قازىرگى تاڭدا بىزدە 280 كوللەدج جانە 3 مىڭ كاسىپورىن ءدۋالدى ءبىلىم بەرۋ ادىسىمەن جۇمىس ىستەپ جاتىر، بۇل ءادىستى كەزىندە نەمىس ارىپتەستەرىمىز ۇسىنعان بولاتىن. اتالعان ۇدەرىس ادامي كاپيتالدى ءتيىمدى دامىتۋعا كومەكتەسىپ كەلەدى. سىزدەردىڭ تاجىريبەلەرىڭىز قازاقستان ءۇشىن ماڭىزدى، بۇگىندە ءدۋالدى ءبىلىم بەرۋدىڭ ناقتى ناتيجەسىن كورىپ وتىرمىز»، – دەپ مالىمدەدى تيمۋر قۇلىباەۆ.

جالپى، قازاقستان-گەرمانيا ىسكەرلىك كەڭەسى اياسىندا بيزنەس-قوعامداستىقتىڭ بارلىق ماسەلەلەرىن شەشۋ كوزدەلگەن.

ەسكە سالا كەتەيىك، 2017 جىل 11 شىلدەدە استانادا قازاقستان-گەرمانيا ىسكەرلىك كەڭەسىنىڭ ستراتەگيالىق ىنتىماقتاستىق جونىندەگى مەرەيتويلىق 10-وتىرىسى وتكەن. كەڭەس گەرمانيانىڭ فەدەرالدى پرەزيدەنتى  فرانك-ۆالتەر شتاينمايەردىڭ استاناعا كەلگەن رەسمي ساپارىنا جانە گەرمانيانىڭ  ەكسپو-2017 كورمەسىندە ۇلتتىق كۇنى شەڭبەرىندە نەمىس پاۆيلونىنىڭ اشىلۋىنا وراي ۇيىمداستىرىلدى.

Abai.kz