قۇرمەتتى وقىرماندارىمىز، جاس تالانتتاردى قولداۋعا باعىتتالعان وتە ماڭىزدى، ءارى ناتيجەلى شارا تۋرالى بىلگىلەرىڭىز كەلە مە؟ ءبىراز ۋاقىت بۇرىن 5-11 سىنىپ وقۋشىلارىنىڭ بەلسەندى ازاماتتىق ۇستانىمى مەن ەرەسەك ادامعا ءتان كوزقاراسىنا تاڭدانعانىمىز بار. بۇل - «بالاعا مەيىرىمدى قازاقستان» رەسپۋبليكالىق بالالار فەستيۆالىندە بولعان ەدى. استانادا وتكەن شارانى ءبىلىم جانە عىلىم مينيسترلىگىنىڭ بالالاردىڭ قۇقىن قورعاۋ كوميتەتى ۇيىمداستىرعان. ءبىر ساتكە ەكسپو  اۋماعىنداعى «Energy Hall» پاۆيلونىندا، مينيسترلىكتەردەن كەلگەن سالماقتى وكىلدەر الدىندا تۇرعان بالالاردىڭ شابىتتى ءجۇزىن ەلەستەتىڭىزدەرشى!

ەلدىڭ بارلىق وڭىرىنەن كوشباسشىلىق قاسيەتىمەن كوزگە تۇسكەن، جاستار قوعامدىق ۇيىمىن قۇرعان، حالىقارالىق جانە رەسپۋبليكالىق وليمپيادادا، شىعارماشىلىق بايقاۋلاردا جەڭىسكە جەتكەن 320-دان استام بالا جينالدى. فەستيۆالعا ەرەسەكتەر جاعىنان مەملەكەتتىك ورگاندار، ۇكىمەتتىك ەمەس ۇيىمدار مەن قوعامدىق ۇيىم وكىلدەرى، پەداگوگتار مەن اتا-انالار كەلدى.

ەكى كۇندىك باعدارلاما بويىنشا بالالار شاراعا وزدەرى قوجالىق ەتىپ، كونفەرەنتسيانى وزدەرى وتكىزدى. قوناقتارعا فەستيۆال قاتىسۋشىلارىنىڭ قولىنان شىققان بۇيىمداردان كورمە ۇسىنىلدى. ەرەسەكتەر بالالاردىڭ شىعارماشىلىق قيالى مەن روبوتوتەحنيكا، قازاق ءتىلىن ۇيرەنۋ بويىنشا ەڭبەكتەرىنىڭ ناتيجەسىنە تاڭداي قاقتى.

كونفەرەنتسيادا قازاقستان ءبىلىم جانە عىلىم ۆيتسە-ءمينيسترى سۋحانبەرديەۆا ەلميرا امانگەلدىقىزى، سەناتور جانە بالا قۇقىعى جونىندەگى توتەنشە وكىل ايتپاەۆا ساۋلە مۋحانبەديانقىزى، بۇۇ قازاقستانداعى بالالار قورىنىڭ وكىلى وكساميتنىي يۋري ۆيكتوروۆيچ، «جاس وتان» جاستار قاناتى توراعاسىنىڭ ورىنباسارى  داۋلەت كارىبەك ءسوز الدى.

كونفەرەنتسيا فورماتى ۇلكەندەر وتكىزەتىن ماڭىزدى فورۋمداردان كەم تۇسپەدى. بالالار سالماقتى تاقىرىپتا بايانداما جاساپ، سپيكەرلەردىڭ  بايانداماسىن رەتتەپ، مودەراتورلىقتى ءوز قولدارىنا الىپ، كەش سوڭىندا تالقىلانعان تاقىرىپتار بويىنشا قارار قابىلدادى.

كونفەرەنتسيا بالالاردىڭ وتباسى، قوعام  ومىرىندە، ءتىپتى بالا مۇددەسى توڭىرەگىندەگى ۇلتتىق ساياسات قالىپتاستىرۋ ماسەلەلەرىندە دە قاتىسۋ قۇقىن ايقىنداپ، مويىنداتىپ بەردى. جاس ۇرپاقتى قوعامنىڭ شەشۋشى ماسەلەلەرىنە ەرتە ارالاستىرۋ بولاشاق كادرلاردى دايارلاپ، ولاردىڭ ازاماتتىق ۇستانىمدارىن قالىپتاستىرۋىن جەدەلدەتەدى.

كونفەرەنتسيا بىرنەشە مىندەتتى العا قويعان. اتاپ ايتقاندا: بالا شاقتان باستاپ ازاماتتىق ۇستانىم قالىپتاستىرۋ; جاسوسپىرىمدەردىڭ بۇۇ كونۆەنتسياسىندا كورسەتىلگەن قۇقى مەن ەركىندىگىن جۇزەگە اسىرۋعا سەپتەسۋ; بالالاردىڭ بويىنا الەۋمەتتىك ماڭىزدى قارىم-قاتىناس داعدىسىنىڭ ءدانىن سەبۋ; مەملەكەتتىك ورگاندار مەن بالالار اراسىندا ءوزارا ارەكەتتەستىك ورناتۋ.

ەندى كونفەرەنتسيا تاقىرىپتارىنا توقتالا كەتسەك.

«قازاقستان – ادامگەرشىلىك اۋماعى» اتتى العاشقى تاقىرىپتىڭ مودەراتورى – سولتۇستىك قازاقستاننان كەلگەن 11 سىنىپ وقۋشىسى  اناستاسيا ماتچەنيا. بالالار ادامگەرشىلىك-رۋحاني تاربيە، ءوز باسى مەن قورشاعان ورتاعا دەگەن جاۋاپكەرشىلىك، زاماننىڭ وزەكتى ماسەلەلەرىن شەشۋگە بەلسەنە ارالاسۋ جايىن ءسوز ەتتى. ءبىرىنشى بولىپ دارىندى بالالارعا ارنالعان جامبىل جاباەۆ (شىعىس-قازاقستان وبلىسى) اتىنداعى وبلىستىق ارنايى مەكتەپتىڭ 10 سىنىپ وقۋشىسى نۇرايىم باگدانوۆا ءسوز الدى. ول «ماڭگىلىك ەل» جالپىۇلتتىق يدەياسىن ىسكە اسىرۋعا ءبىزدىڭ ۇلەسىمىز» تاقىرىبىندا بايانداما جاسادى.  ودان كەيىن №2 ورتا مەكتەپتىڭ (اقمولا وبلىسى) 11 سىنىپ وقۋشىسى جۇلدىزاي وسپانوۆا «تولەرانتتىق ارقىلى رۋحاني كەلىسىمگە» دەگەن تاقىرىپتا ءسوز الدى.

«قاۋىپسىز اقپاراتتىق الاڭ ءۇشىن» دەگەن تاقىرىپتاعى ەكىنشى ءبولىمنىڭ تىزگىنىن ماقسات قۇساينوۆ اتىنداعى اقتوبە وبلىستىق دارىندى بالالارعا ارنالعان مامانداندىرىلعان مەكتەپ-ينتەرناتىنىڭ وقۋشىسى ايتەكە ءتاجىباي الدى. بۇل باعىت بالالاردىڭ قاتىگەزدىككە تولى ينتەرنەت-كونتەنتتىڭ قاۋپىن سەزىنۋ، ينتەرنەت قولدانۋشىلاردىڭ مادەنيەتى مەن جاۋاپكەرشىلىگىن ارتتىرۋ ءۇشىن تاڭدالعان. №37 مەكتەپتىڭ 9  سىنىپ وقۋشىسى  (ورال) الميرا سەيتمۇحانوۆا «اقپارات، قوعام جانە ءبىز» دەگەن تاقىرىپتا ءسوز الدى. ال بەكەجان سۋلەيمەنوۆ اتىنداعى (شالقار اۋدانى، ايشۋاق اۋىلى) مەكتەپتىڭ  5 سىنىپ وقۋشىسى «قازىرگى مەكتەپ وقۋشىلارىنىڭ مۇمكىندىكتەرى مەن قاجەتتىلىكتەرى» دەگەن تاقىرىپقا دايىندالىپ كەلگەن. ۇزىنكول ورتا مەكتەبىنىڭ (قوستاناي وبلىسى) وقۋشىسى ەركىن امانگەلدين «اقپاراتتاندىرىلعان جاستار – اقپاراتتىق قوعامنىڭ ەرتەڭى» دەگەن تاقىرىپتا بايانداما جاسادى. «دارىن» مەكتەپ-ينتەرناتىنىڭ (تۇركىستان وبلىسى، كەنتاۋ قالاسى) وقۋشىسى مەيىرلان باركىنباەۆ اقپاراتتىق قاۋىپسىزدىك تۋرالى سەكتسيانى «اقپاراتتىق قاۋىپسىزدىك – بەيبىت ءومىردىڭ كەپىلى» دەگەن بايانداماسىمەن اياقتادى.

ءۇشىنشى ءبولىم «زورلىق زومبىلىقسىز بالالىق» دەپ اتالدى. بۇل سەكتسيانى تاراز قالاسىنداعى №13 ورتا مەتكەپتىڭ وقۋشىسى يسااك مۋستۋپۋلو جۇرگىزدى. بۇل تاقىرىپ قوعامنىڭ نازارىن بالالارعا جاسالاتىن زورلىق-زومبىلىققا اۋدارۋ ماقساتىندا تاڭدالعان. ءبىز ۇنەمى بالالارعا قامقورلىق كورسەتۋگە ۇندەۋىمىز كەرەك. الماتىداعى №51 مەكتەپ گيمنازيانىڭ 10 سىنىپ وقۋشىسى ەكاتەرينا تسۋريكوۆا «جاسوسپىرىمدەر قاتىگەزدىگى: شەشۋ جولى بالانىڭ قولىندا» اتتى بايانداما جاساسا،  ورال قالاسىنداعى №22 مەكتەپتىڭ 10 سىنىپ وقۋشىسى مالىك ادىلبەك «بىزگە قامقورلىق – بولاشاققا قامقورلىق» تاقىرىبىنا دايىندالىپ كەلگەن. قىزىلورداداعى №3 مەكتەپ-ليتسەيدىڭ 11 سىنىپ وقۋشىسى ماعجان بەكەتوۆ ءۇشىنشى سەكتسيانى «جاستار زورلىق–زومبىلىقسىز ءومىردى قالايدى» تاقىرىبىمەن جاپتى.

فورۋم ادەتتەگى ماڭىزدى كاسىبي شارالار سەكىلدى ناتيجە قورىتىندىلانىپ، قارار قابىلدانىپ اياقتالدى. سوڭىندا گالا-كونتسەرت بولدى. باقىتتان جۇزدەرى بال-بۇل جانعان بالالارعا سەرتيفيكات، سىيلىقتار تابىستالدى. سونىمەن قاتار ەلوردانىڭ كورىكتى جەرلەرىنە ساياحات ۇيىمداستىرىلدى.

Abai.kz