تاۋەلسىزدىك – قاسيەتتى ۇعىم. ەلدىڭ ەڭ ۇلكەن مەرەكەسى. جەلتوقسان – قازاقستاندىقتار ءۇشىن قاسيەتتى دە قاستەرلى مەرەكەنى اتاپ وتەتىن اي. ح.ا.ياسساۋي اتىنداعى حالىقارالىق قازاق-تۇرىك ۋنيۆەرسيتەتى ەۋرازيا عىلىمي-زەرتتەۋ ينستيتۋتى قابىرعاسىندا قازاقستان تاۋەلسىزدىگىنىڭ 27 جىلدىعىنا ارنالعان جيىن ءوتتى.

جيىندا بايانداما جاساعان تۇركيا رەسپۋبليكاسىنىڭ الماتى قالاسىنداعى باس كونسۋلى رىزا قاعان يىلماز: تامىرى ءبىر حالىقتاردىڭ تاۋەلسىزدىگىن ەڭ العاش تانىپ، قۇتتىقتاعان تۇركيا ورتا زياداعى تۇركى مەملەكەتتەرىمەن مادەني-رۋحاني جانە ساياسي-ەكونوميكالىق بايلانىس ورناتۋ ارقىلى قانشاما جىلدار جان-جاقتى ءۇزىلىپ قالعان بايلانىستى تاۋەلسىزدىكتەن كەيىن جانداندىرۋ قول جەتكىزدى. الەمدىك ساياساتتاعى جاعدايلار مەن ماسەلەلەردى شەشۋدە تۇركيا مەن قازاقستان ءبىر ۇستانىمدا، كەيدە ءبىرىن-ءبىرى قولداپ  وتىراتىنى ناعىز باۋىرلاستىق ۇلگىسى دەدى – باس كونسۋل ر.ق.يىلماز ءسوزىن ارى قاراي جالعاپ: تاۋەلسىزدىكتەن وسى كۇنگە دەيىنگى قازاقستان جەتىستىگى قر پرەزيدەنتى ن.نازارباەۆپەن تىكەلەي بايلانىستى ەكەنىن اتىپ ءوتىپ: «رۋحاني جاڭعىرۋ» ماقالاسىنىڭ جالعاسى «ۇلى دالانىڭ جەتى قىرى» تۇركى حالىقتارىنىڭ رۋحاني، مادەني جانە عىلىمي بىرىگۋىنە ەرەكشە جول كورسەتكەن ستراتەگيالىق قۇجات ەكەنىن جەتكىزدى.

مىنبەگە شىققان شەت تىلدەرى جانە ىسكەرلىك كارەرا ۋنيۆەرسيتەتىنىڭ رەكتورى پروفەسسور سابري حيزمەتلي: قازاقستان تاۋەلسىزدىك العاننان كەيىن ۇلتتىق ءتالىم-تاربيە، عىلىم-ءبىلىم سالاسىنا ەرەكشە كوڭىل ءبولدى جانە دامىتتى. سونىڭ ارقاسىندا بەيبىتشىلىك سۇيگىش قوعام قالىپتاستىردى. جانە بەيبىتشىلىكتىڭ ارقاسىندا قازىر الەمدە قۇرمەت بيىگىنە شىعىپ وتىر – دەدى.

تاۋەلسىزدىك ارقاسىندا ءوز ەركىندىگىمەن تاڭداعان جولمەن قازاقستان كوپ جەتىستىككە جەتتى. ەڭ ماڭىزدى جولدىڭ ءبىرى رەتىندە عىلىم، ءبىلىم جانە مادەنيەتتى دامىتۋدا اۋقىمدى ەڭبەكتەر اتقارىلدى. سونداي-اق حالىقارالىق بايلانىستا دا وسى سالالاردى العا قويىپ وتىردى. وسى باعىتتا قازاقستان مەن تۇركيا اراسىندا ورناعان رۋحاني بايلانىستىڭ ايقىن ايقىن كورىنىسى 1993 جىلى ىرگەسى قالانعان ح. ا. ياسساۋي اتىنداعى حالىقارالىق قازاق-تۇرىك ۋنيۆەرسيتەتىن اتاپ كورسەتۋگە بولادى. سول ۋنيۆەرسيتەت جانىنان قۇرىلعان ەۋرازيا عىلىمي-زەرتتەۋ ينستيتۋتى رەتىندە تاۋەلسىز قازاقستاننىڭ حالىقارالىق جانە ايماقتىق ماسەلەلەردەگى ورنى مەن رولىنە قاتىستى زەرتتەۋلەر جۇرگىزىپ، وسى ۋاقىتقا دەيىن اتقارىلعان ءىس-شارالار مەن بولاشاقتا زەرتتەلەتىن تاقىرىپتارعا قاتىستى جوسپارلارىمەن بولىسكەن ينستيتۋت ديرەكتورى دوتسەنت، دوكتور ۆاكۋر سۇمەر، قازاقستاننىڭ دامۋىنا ۇلەس قوسۋدى جالعاستىرا بەرەتىنىن جەتكىزدى.

ءسوز سوڭىندا ۆاكۋر سۋمەر، كەلگەن قوناقتار مەن بارشا قاتىسۋشىلاردى رەسپۋبليكانىڭ 27 جىلدىق تاۋەلسىزدىك مەرەكەسىمەن قۇتتىقتاپ، اتاجۇرت قازاقستاننىڭ بۇدان دا بيىك جەتىستىكتەرگە جەتەتىنىنە سەنىم ءبىلدىردى.

وتكەن تاريحتان دا بەلگىلى التاي تاۋلارىنان باستالعان تۇركى حالىقتارىنىڭ تامىرى بۇگىنگە دەيىن ۇزىلمەي كەلە جاتىر. باۋىرمالدىعى مەن تۋىسقاندىق قاسيەتىن ءار كەزەڭدە قۇرمەت بيىگىندە ۇستايتىن تۇركى حالىقتارى  مەرەكە جانە باسقا كۇندەردە دە بىرگە.

Abai.kz