30 قاراشا كۇنى ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ ماگيسترانتتارى  تەلەۆيدەنيە جانە شوۋ-بيزنەس سالاسىندا ۇلكەن جۇمىستار اتقارىپ كەلە جاتقان مارجان سادۆاكاسوۆامەن "كوشباسشىلىق جول" اتتى كەزدەسۋ، شەبەرلىك ساباعىن وتكىزدى.

كەزدەسۋ بارىسىندا مارجان سادۆاكاسوۆا ءوزىنىڭ مانساپ جولى مەن جۋرناليستىك شەبەرلىگىنە بايلانىستى ءبىراز اڭگىمە ءوربىتتى. سونداي-اق، ستۋدەنتتەر مەن ۇستازدار قاۋىمىنا اقپاراتتىق قوعام مەن شوۋ بيزنەستەگى تۇيىتكىلدى ماسەلەر جايىندا ايتىپ، سىرلى سۇحبات قۇردى.

ادامنىڭ دۇنيەلىك تىرشىلىگىندە تەك باق كەلىپ قونىپ، ءىستىڭ العا باسۋنان بولەك تالماي ەڭبەك ەتىپ، شىنىعىپ، باپتالۋدىڭ دا ماڭىزدى ەكەندىگىن العا تارتىپ، ومىرلىك ۇستانىمىنا اينالدىرعان ەڭبەكقور، ۇنەمى ىزدەنىسپەن جۇرەتىن، تاۋەكەلشىل، وجەت، ءوز ءىسىنىڭ مامانى – مارجان سادۋاقاسوۆا بۇگىنگى تاڭدا ءبىر ەمەس بىرنەشە ءىستىڭ باسىندا ءجۇرىپ، ەڭبەگىنىڭ ناتيجەسىن حالىققا ۇسىنىپ كەلەدى. ستۋدەنت كەزىنەن جۇمىسقا بەل شەشە كىرىسەتىن ەرەكشەلىگىمەن كوزگە ءتۇسىپ، «جىگىتتەر» كۆارتەتىنىڭ، سوسىن پروديۋسسەرلىك ورتالىعىنىڭ PR مەنەدجەرى بولىپ قىزمەت اتقارىپ كەلە جاتقان مارجان حانىم، قازىر «باي پروداكشن» اتتى تەلەۆيزيالىق ۇزدىك جوبالار «ەل اۋزىندا»، «گۋ-گۋلەت»، «توي جىرى» جانە تاعىدا باسقا باعدارلامالاردىڭ نەگىزىن قالاعان ورتالىقتىڭ اۆتورى، جەتەكشىسى. وسىنداي ءوز ىسىندە جەتىستىككە قالاي جەتكەنى مەن نەگىزگى جولدارىن ءبولىسۋ ماقساتىندا كازنۋ جۋرناليستيكا فاكۋلتەتىنىڭ ستۋدەنتتەرىمەن ەركىن تۇردەگى كەزدەسۋگە كەلىسىم بەرىپ، ءوزى تۇلەپ ۇشقان ورداعا قۋانا كەلدى.

مارجان ءوزىنىڭ جەتىستىكتەرىنىڭ بىردەن ءبىر سەبەبى – «قۇدايعا سەنىپ، تاۋەكەل جاساۋ جانە ارتقا شەگىنبەۋ»،- دەپ ءتۇسىندىردى. «سەبەبى نەبىر قاسقىر مىنەز ادامدار جۇمىس اتقاراتىن قازانى قايناعان تەلەارنالار مەن شوۋ-بيزنەستە ومىرشەڭ بولۋ، ۇتىلماۋ ۇلكەن جىگەردى تالاپ ەتەدى»،- دەيدى.

ىسكەر ازاماتشا ءوزىنىڭ جۇمىس ىستەۋدەگى نەگىزگى قۇرىلىس كوزى نەمەسە «فۋندامەنتى» - كازنۋ قابىرعاسىندا شارشاماي-تالماي، ىجداحاتتىلىقپەن العان ءبىلىمى ەكەندىگىن جاسىرمادى. ستۋدەنت كەزىندە ءتۇرلى سۇراقتار مەن قىزىعۋشىلىقتارىن ايتىپ بارلىق وقىتۋشىلارمەن تىعىز بايلانىستا بولعان ەكەن. سوندىقتان ستۋدەنتتەرگە بارلىق ىسكە باستاما – ءبىلىم ەكەندىگىن جەتە ءتۇسىندىرىپ كەتتى. «كىتاپ، تاجىربيە، ىزدەنىس، ناتيجە» دەگەن سوزدەردى بارلىق جاعدايدا ماڭىزدى كىلت سوزدەر رەتىندە پايدالانۋدى قۇلاقتارعا قۇيا ءجۇرۋ ارتىقتىق ەتپەيدى دەپ ءوزىنىڭ پروداكش قۇرۋداعى جۇمىس باسپالداقتارىن تولىقتاي ءتۇسىندىردى. قىزمەتكەر بولعاندا قانداي بولۋ كەرەك، باستىق بولعاندا قانداي بولۋ كەرەك، سونى بىلە ءجۇرۋ دە ابزال دەپ، ءوزىنىڭ «جىگىتتەر» پروديۋسسەرلىك ورتالىعىنداعى جەتىستىكتەرىمەن دە ءبولىستى.

جاقىندا ىسساپارمەن اقش-تا بولىپ قايتقان مارجان حانىم مۇحيتتىڭ ارعى جاعىنداعى جۋرناليستيكانىڭ جاي كۇيىمەن تانىسىپ، ۇيرەنگەندەرىمەن ءبولىستى. كەزدەسۋ بارىسىندا كوپ تاقىرىپتار تالقىلانىپ، ستۋدەنتتەر مارجان

سادۋاقاسوۆانىڭ جىلى شىرايلىلىعىنا قاراي ەركىن، جايدارى بايلانىس ورناتىپ، تاعىلىمدى اڭگىمەلەردى الدارىنداعى داپتەرلەرىنە ءتۇرتىپ جازا وتىردى. مارجان حانىم ءوزىنىڭ جەتىستىگىن عانا ايتۋمەن شەكتەلمەي، كەزدەسۋگە كەلگەن ستۋدەنتتەردىڭ پىكىرلەرىن دە تىڭداپ، ويلارىن ءبىلىپ، قىزىعا پىكىر الماستى.

كەزدەسۋ قيماستىقپەن تامامدالۋعا تۋرا كەلدى. 2 ساعاتقا سوزىلعان تۇشىمدى اڭگىمە الاڭىنان ستۋدەنتتەر دە قوناققا كەلگەن مارجان حانىم دا كەتكىسى كەلمەي كەزدەسۋگە بەرىلگەن ۋاقىتتى بارىنشا سوزا تۇسۋگە تىرىستى. الداعى ۋاقىتتا بايلانىس ۇزبەي، جۇمىس بابىمەن، تاجىربيە الماسۋ ماقساتىندا كەزدەسىپ، بايلانىسىپ تۇرۋعا ۋادەلەستى.

قورىتا ايتقاندا، جۋرناليستيكا مامندىعى تەك كىتاپ پەن عالامتور ارقىلى ءبىلىم الۋمەن قاتار سول ۋاقىتتا تۇراقتى تۇردە ماماندىعى بويىنشا ءىس جۇرگىزىپ جاتقان ازاماتتار مەن ازاماتشالارمەن كەزدەسىپ، پىكىر الماسىپ، تاجىربيە جيناۋدى قاجەت ەتەدى. سول سەبەپتى فاكۋلتەت قابىرعاسىندا وسىنداي تاعىلىمدى كەزدەسۋلەردىڭ كوبىرەك بولۋى ستۋدەنتتەردىڭ ءوز ماماندىعىنا دەگەن سۇيىسپەنشىلىگىن ارتتىرىپ، ىنتالارىن كۇشەيتەدى. ءىز ءىسىنىڭ حاس شەبەرلەرى جاس ءبىلىم الۋشىلاردى وتكەن جولدارى مەن جەتىستىكتەرىن ايتا وتىرىپ موتيۆاتسيا بەرەدى. سوندىقتان الداعى ۋاقىتتا ماگيستراتۋرادا وقىپ جاتقان ماگيسترانتتار باكالاۆر ستۋدەنتتەرى مەن جۋرناليستتەر اراسىندا بارىنشا كوپىر بولىپ، بايلانىس ورناتۋعا مۇمكىندىكتەر تۋدىرۋعا تىرىساتىنىن ايتىپ، ويلارىمەن ءبولىستى.

جۇلدىز ابدۋناسىر

جۋرناليستيكا فاكۋلتەتىنىڭ 2-كۋرس ماگيسترانتى

Abai.kz