ءبىز وتار بولعان جۇرتپىز. ەل بولۋ ءۇشىن وتارسىزدانۋىمىز كەرەك. وتارسىزدانۋ ۇدەرىسىن باستايتىن كەز كەلدى. ول ءۇشىن ەشكىمنەن قورىقپاي، ەشكىمگە جالتاقتاماي قازاقستاننىڭ ەڭ جوعارى زاڭ شىعارۋ ورگاندارى - سەنات، ءماجىلىس - "وتارسىزدانۋ" تۋرالى زاڭ اكتىسىن قابىلداپ، بەكىتۋ كەرەك.

ول ءۇشىن قازىردەن باستاپ قازاقستاننىڭ ساياسي ينستيتۋتتارى (مىسالى - "مەملەكەت جانە تاريح ينستيتۋتى") وسى ماسەلەنى زەرتتەۋدى قولعا الۋ كەرەك. ول ءۇشىن الەمنىڭ وتار بولعان مەملەكەتتەرى بۇل ۇدەرىستى قالايشا جۇزەگە اسىردى دەگەن ماسەلەنى تۇبەگەيلى زەرتتەگەن دۇرىس. ەگەر ءبىز قازاق قوعامىنىڭ وسى كەسەلىن ەلەمەي، ەسكەرمەي، جاۋىردى جابا توقي بەرەتىن بولساق، اۋرۋ قوعامنىڭ دەرتى اسقىنعاننىڭ ۇستىنە اسقىنىپ قوعامدىق جاعداي ۋشىعا بەرەدى. ونىڭ ايقىن دالەلى - قاراعاندى وقيعاسى. بۇل - ەسكەرتۋ!

سوسىن، "قازاق تاريحىندا ءبىز ۇيالاتىن ەشتەڭە جوق" دەگەن سىندى نەگىزسىز پىكىرلەردى توقتاتۋ كەرەك. ءبىر تۇتاس حالىقتىڭ ءتىرى ورگانيزم رەتىندە باس بوستاندىعىنان ايىرىلىپ (باسىنان ايىرىلىپ) وزگە مەملەكەتكە (رەسەي يمپەرياسىنا، سوسىن - قىزىل سوۆەت يمپەرياسىنا) وتار بولعانى - قۇل بولعانى ۇيات ەمەس پە؟

تاعى قايتالاپ ايتامىن، ۇلت- مەملەكەت - ءتىرى ورگانيزم رەتىندە ساۋىعۋ ءۇشىن - ەڭ ءبىرىنشى كەسەلدىڭ دياگنوزىن قويۋ كەرەك; دياگنوزىن قويماسا ورگانيزم جازىلمايدى. قازاق قوعامى - اۋرۋ! دياگنوزى - وتارلىق. ەگەر قازىرگى بيلىكتىڭ بۇنى مويىنداۋعا ەرىك-جىگەرى جەتپەسە، ورنىن بوساتسىن، ورنىنا وسى قازاق ۇلتى ءۇشىن اسا ماڭىزدى شارانى جۇزەگە اسىرا الاتىن دەنى ساۋ، وتارلىق-قۇلدىق ەتىنەن ءوتىپ، سۇيەگىنە جەتپەگەن، ىشكى ۇرەيدەن ادا جاڭا ۇرپاق، جاڭا گەنەراتسيا كەلسىن. اققا قۇداي جاق! ءىسىمىز - اق! بىرەۋدى كەمسىتۋ، بىرەۋدىڭ شامىنا تيۋ ويدا جوق، ويىمىز - قازاق قوعامىن ساۋىقتىرۋ. قيسايىپ كەتكەن تۋىمىزدى تىكتەپ، شۇرق تەسىك ەسىمىزدى بۇتىندەۋ! "اۋرۋىن جاسىرعان ولەدى " دەيدى دانا حالقىمىز.

قازاق رەتىندە، ۇلت رەتىندە، مەملەكەت رەتىندە ءولىپ كەتپەۋ ءۇشىن اۋىر بولسا دا وسى شاراعا بارۋىمىز كەرەك. سوندا عانا الاش ارىسى عۇمار قاراش ارمانداعان ءار ىسىمىزدەن قازاقتىڭ ءيسى شىعىپ تۇراتىن بولادى!

سوندا عانا ماڭگىلىك ەل بولامىز!

ومار جالەلۇلىنىڭ facebook پاراقشاسىنان

Abai.kz