سارسەنبى, 16 قاڭتار 2019
46 - ءسوز 2071 11 پىكىر 9 قاڭتار, 2019 ساعات 10:48

وركوكىرەك ەسەك

ەرتەدەگى اسسيريالىقتاردان بەرى كەلە جاتقان مىناداي ءبىر ءتامسىل بار.
ءتامسىل دالادا جابايى جۇرگەن ەسەك پەن ءۇيدىڭ باعىمىنداعى ەسەكتىڭ قارىم -قاتىناسىن مىسال ەتەدى.
جابايى ەسەك ءوزىنىڭ ادام اسىراۋىنداعى باۋىرلاسىنا جوعارىدان قاراپ، ءار كەزدەسكەن سايىن وعان جەر-جەبىرىنە جەتە ۇرسىپ، تۇقىرتىپ تۇرۋشى ەدى.
– سەنىڭ ءومىرىڭ ءومىر ەمەس، سەندە ەشقانداي ەرىك جوق، – دەدى ءبىر جولى وركوكىرەك ەسەك قوجايىنىمەن بىرگە دالادا تۇرعان ەسەككە جولىعىپ قالعاندا.
– وسى ءومىرىم مەنىڭ وزىمە ۇنايدى، – دەپ وعان سوندا باتىلسىزداۋ جاۋاپ قايتاردى ءۇيدىڭ ەسەگى.
– ال مەن ەركىندىكتىڭ ۇلانىمىن، – دەدى دالانىڭ ەسەگى مۇرنىن ءشۇيىرىپ سوسىن. – بارام دەگەن جەرىمە بارامىن، كەلەم دەگەن جەرىمە كەلەمىن. مەن بيىك تاۋلاردىڭ توبەسىنە كوتەرىلىپ، ءشوپتىڭ قۇنارلىسىن جەيمىن، سۋدىڭ تۇنىعىن ىشەمىن، اۋانىڭ تازاسىن جۇتامىن. ال سەن ەرتەلى-كەش قوجايىنىنىڭ توقپاعىن جەيسىڭ دە جۇرەسىڭ.
جابايى ەسەكتىڭ وسىنى ايتىپ اۋىز جيعانى سول ەدى، سايتانداي ساپ ەتىپ، ءبىر ارىستان قاستارىنان شىعا كەلدى.
ازۋلى جىرتقىش قوجايىنىنىڭ جانىندا تۇرعان ەسەككە باتىلى جەتىپ بارا قويماي، بىردەن جابايى ەسەككە باس سالىپ، ونى زاماتىندا جايراتىپ سالدى.
...بوستاندىقتىڭ دا كەيدە وسىلاي جاندى ماقۇلىققا زالالى تيەتىن كەزدەرى بار.

سەرىك ءپىرنازاردىڭ facebook پاراقشاسىنان

Abai.kz

11 پىكىر