جۇما, 23 تامىز 2019
1540 0 پىكىر 17 قاڭتار, 2019 ساعات 14:44

«قازترانسگاز» اق 2018 جىلعى قىزمەتىنىڭ الدىن الا قورىتىندىسى شىعارىلدى

ۇلتتىق وپەراتور «قازترانسگاز» اق 2018 جىلدىڭ قورىتىندىسى بويىنشا نەگىزگى قىزمەت تۇرلەرىنىڭ كورسەتكىشتەرىن ەلەۋلى ۇلعايتتى.

جەدەل دەرەكتەرگە سايكەس، «قازترانسگاز» اق 2018 جىلعى شوعىرلاندىرىلعان تابىسى 1 ترلن. 061 ملرد. تەڭگەنى قۇرادى، بۇل 2017 جىلعا قاراعاندا، 398,9 ملرد. تەڭگەگە نەمەسە 60 % ارتىق. ۇلتتىق وپەراتور قۇرامىنداعى كومپانيالار توبىنىڭ سالىق سالىنعانعا دەيىنگى شوعىرلاندىرىلعان پايداسى 201 ملرد. تەڭگەنى قۇرادى، ول 2017 جىلعى كورسەتكىشتەن 102 ملرد. تەڭگەگە نەمەسە 103% ارتىق.

الىنعان پايدا  ۇلتتىق وپەراتورعا ىشكى نارىقتاعى گاز باعاسىنىڭ ءوسىپ كەتپەۋىن تەجەپ تۇرۋعا جانە قازاقستاندىق گاز تۇتىنۋشىلارىن سۋبسيديالاۋعا (ىشكى نارىققا گاز ساتۋدان كەلگەن شىعىن 2018 جىلى 36 ملرد. تەڭگەنى قۇرادى), سونداي-اق 573 ملرد. تەڭگە مولشەرىندەگى كرەديتتىك پورتفەلگە قىزمەت كورسەتۋگە مۇمكىندىك بەرەدى.

2018 جىلى «قازترانسگاز» اق بيۋدجەتكە تولەنەتىن سالىقتار مەن باسقا دا تولەمدەر ءۇشىن  99,5 ملرد. تەڭگەدەن استام سوما تولەدى، وسىلايشا ەلىمىزدەگى ەڭ ءىرى سالىق تولەۋشى كومپانيالار قاتارىنان تابىلىپ وتىر.

ەسەپتى كەزەڭدە گاز وتكىزۋ كولەمى 22,9 ملرد. تەكشە مەتردى قۇرادى. بۇل 2017 جىلمەن سالىستىرعاندا 5,2 ملرد. تەكشە مەترگە نەمەسە  29% ارتىق. بۇل رەتتە، 2018 جىلى قىتاي حالىق رەسپۋبليكاسىنا گازدى ەكسپورتقا جەتكىزۋ تۋرالى جاسالعان شارت، مەرزىمىنەن بۇرىن جانە تولىق كولەمدە ورىندالدى.

ماگيسترالدىق تاسىمالداۋ كولەمى 111,9 ملرد. تەكشە مەتردى قۇرايدى، ول 2017 جىلدىڭ كورسەتكىشىنە قاراعاندا، 11 ملرد. تەكشە مەترگە نەمەسە 11% ارتىق.

"قازترانسگاز" اق - قازاقستاننىڭ گاز جانە گازبەن جابدىقتاۋ سالاسىنداعى ۇلتتىق وپەراتور.  «قازترانسگاز" اق كومپانيالار توبىنىڭ قۇرامىنا گاز ءوندىرۋشى، تاسىمالداۋشى جانە وتكىزۋشى جانە ونىڭ ونىمدەرىن قايتا وڭدەۋشى كاسىپورىندار مەن ۇيىمدار كىرەدى.

«قازترانسگاز» اق ءباسپاسوز قىزمەتى

Abai.kz

0 پىكىر