«قازاقستاننىڭ تۇرعىن ءۇي قۇرىلىس جيناق بانكى» اق باسقارما توراعاسى ءلاززات يبراگيموۆا قازاقستاندىقتارعا ارزان نەسيە الۋ جولىن كورسەتتى.

«ءبىز تاياۋدا قولجەتىمدى نەسيە الۋعا بايلانىستى ساراپتاما جۇرگىزدىك. ەڭ الدىمەن وزگە نەسيە جۇكتەمەسى بولماۋى ءتيىس. سوندىقتان يپوتەكا الۋ ءۇشىن بانككە جۇگىنبەس بۇرىن ءوزىڭنىڭ بارلىق تۇتىنۋشىلىق نەسيەڭدى، وزگە بانكتەردەگى نەسيەلىك كارتالارىڭدى جابۋعا تۋرا كەلەدى»، - دەدى ول ۇكىمەت ۇيىندە وتكەن ءباسپاسوز ءماسليحاتى بارىسىندا.

ءلاززات يبراگيموۆانىڭ ايتۋىنشا،  بۇگىندە ەلىمىزدە 6 ملن ادامنىڭ كەپىلسىز الىنعان تۇتىنۋشىلىق نەسيە بار.

«بۇل نەسيە سمارتفونعا، تۇرمىستىق تەحنيكاعا جانە باسقا دا قاجەتتىلىككە الىنعان. اتالعان ادامدار ءتۇرلى نەسيەلىك باعدارلاماعا قاتىسپاس بۇرىن سول قارىزدارىن جاۋىپ العانى ءجون. سەبەبى ەسەپتەۋ تەتىكتەرى مىناداي: وتباسىڭىزدىڭ ورتاشا تابىسى ەسەپتەلىنىپ، ول وتباسىنىڭ ءاربىر مۇشەسىنە بولىنەدى. ءبىز ونىڭ نەسيەنى تولەي الاتىندىعىن قارايمىز. بارلىق بانكتەردىڭ نورماتيۆتەرىنە سايكەس نەسيە تولەنگەننەن كەيىن ءسىزدىڭ تابىسىڭىزدىڭ 50 پايىزى ءومىر سۇرۋىڭىزگە، بالالارىڭىزدى مەكتەپ اپارۋعا، كيىندىرۋگە، تاماقتاندىرۋعا جەتۋى كەرەك»، - دەدى بانك باسشىسى.

ونىڭ ايتۋىنشا، «قازاقستاننىڭ تۇرعىن ءۇي قۇرىلىس جيناق بانكىنىڭ» كليەنتتەردىڭ تولەم قابىلەتىن  باعالاۋى بارىنشا قولايلى. ويتكەنى، بانككە جۇگىنەتىن ازاماتتار ءبىرىنشى رەت باسپانا ساتىپ الۋعا نيەتتى جانە ولار قالاي بولعاندا دا نەسيەسىن جابادى. سونىمەن قاتار ول ەلىمىزدى بالا تۋ كورسەتكىشىنىڭ ارتۋىنا بايلانىستى باسپانانى نەسيەگە الۋشىلاردىڭ دا لەگى ۇلعايىپ وتىرعانىن باسا ايتتى. بانك تاراپىنان سالىمشىلارعا تولەنەتىن مەملەكەتتىك سىياقىنىڭ جىل سايىن ۇلعايىپ كەلە جاتقانىن اتاپ ءوتتى.

«اعىمداعى جىلى 300 مىڭنان استام ادام مەملەكەتتىك سىياقى الادى. ول 96 مىڭ تەڭگەدەن اسادى. زاڭناماعا سايكەس مەملەكەتتىك سىياقى 200 اەك كولەمىندە اۋدارىلادى. ال 2019 جىلى مەملەكەتتىك سىياقى العاش رەت 100 مىڭنان اسىپ تۇسەتىن بولادى. 2019 جىلدىڭ قورىتىندىسىندا 101 مىڭ تەڭگەنى قۇرايدى»، - دەدى ول.

دەرەككوز: قازاقپارات

Abai.kz