قازاقتار شىنىمەن قويداي جۋاس با!؟ نەگە ورىس ءتىلدى اقپارات قازاقتى جۇندەي بەرۋگە ءتيىس...

ءبىر قاراعان جانعا قازاقتار قوي ەمەس، تۇندە باردا كۇندىز جوق جاپالاق كەيپىندە ەلەستەيدى. سوندىقتان، «تاسپەن جاپالاقتى ۇرساڭ دا، جاپالاقپەن تاستى ۇرساڭدا جاپالاق ولەدى» دەگەن  شىعىس ناقىلى اقپارات كەڭەستىگىندەگى ۇلتتىق بەينەمىزگە قاراتا ءسوز ەتىلگەندەي.

ورىس ءتىلدى اقپارات قۇرالدارى قازاقتى قويدان جۋاس "تولەرانتى" جاساپ كەسىپ ءپىشىپ قويدى. ەلدىڭ ءسوزىن سويلەپ، ۇلتتىڭ مۇڭىن ايتاتىنداردى "ديۆاننىي باتىرعا" اينالدىردى. ەندى بۇل از بولعانداي "كازاحستان – دليا كازاحوۆ؟" دەگەن قۇيتىرقى تاقىرىپتى 2018 سوڭىنان باستاپ كوتەرىپ كەلەدى.

بۇرىنعى فرانتسۋز، اعىلشىن وتارلارىندا اعىلشىن جانە فرانتسۋز ءتىلدى ءباسپاسوز بار. بىراق ولار ەشقاشان جەرگىلىكتى ۇلتتىڭ شامىنا ءتيىپ، شابىنا شي جۇگىرتپەيدى. بىزدە ءبارى كەرىسىنشە. وسىعان توقتاۋ قوياتىن كەز كەلگەن سەكىلدى. ورىس ءتىلدى اقپارات الەمگە قازاقتىڭ كوزىمەن عانا قارايتىن اقپارات تاراتۋعا ءتيىس. وسىنى ەل ۇكىمەتىنەن تالاپ ەتەتىن ۋاقىت جەتتى. ءارى وبلىستىق، اۋداندىق، قالالىق ىشكى ساياسات ءبولىمى باق اقشا بولگەندە وسىنى ەسكەرسە ءبىراز دۇنيە تۇگەلدەنەر ەدى.

ورىس ءتىلدى اقپارات قازاقتىڭ جىرتىسىن جىرىپ، مۇڭىن مۇڭداۋعا ءتيىس.

ءابىل-سەرىك الياكپار

Abai.kz