بۇگىن ەلورداداعى «نۇر الەم» پاۆيلونىندا ەلباسى نۇرسۇلتان نازارباەۆتىڭ قاتىسۋىمەن جاستار جىلىنىڭ سالتاناتتى اشىلۋ ءراسىمى ءوتتى، دەپ حابارلايدى اباي-اقپارات.

«تاۋەلسىزدىكتىڭ ۇرپاقتارى»  اتاۋىمەن  وتكەن ءىس-شاراعا ۇكىمەت مۇشەلەرى، پارلامەنت دەپۋتاتتارى،  جەرگىلىكتى اتقارۋشى ورگانداردىڭ باسشىلارى،  قر پرەزيدەنتى جانىنداعى جاستار ساياساتى كەڭەسىنىڭ مۇشەلەرى، «100 جاڭا ەسىم» بايقاۋىنىڭ جەڭىمپازدارى،  «بولاشاق» باعدارلاماسىنىڭ تۇلەكتەرى، جاس عالىمدار، شىعارماشىلىق، ستۋدەنتتىك جانە جۇمىسشى جاستار وكىلدەرى، جاس سپورتشىلار، دارىندى بالالار، زاماناۋي مەديا سالاسىنىڭ وكىلدەرى، بالالار ءۇيىنىڭ تاربيەلەنۋشىلەرى مەن تۇلەكتەرى، ەرەكشە قاجەتتىلىكتەرى بار جاستار، جاس اسكەري قىزمەتكەرلەر قاتىستى.

شارا بارىسىندا جاس قازاقستاندىقتار جۇزەگە اسىرعان تابىستى جوبالار مەن جاڭا ونىمدەردەردىڭ تانىستىرىلىمى ءوتتى. سپيكەرلەر رەتىندە ءتۇرلى سالالاردا جەتىستىكتەرگە جەتكەن جاس قازاقستاندىقتار بايانداما جاسادى.

مەرەي قارت

جاستار فورۋمىندا ءسوز العان مەملەكەتتىك "دارىن" جاستار سىيلىعىنىڭ يەگەرى، قازاقستان جازۋشىلار وداعىنىڭ سەمەي فيليالىنىڭ تورعاسى، اقىن مەرەي قارت ەلىمىزدە "ادەبيەت اكادەمياسىن" اشۋدى ۇسىندى.

«قازاقتىڭ جاس اقىن-جازۋشىلارى مەملەكەت قولداۋىنان كەندە ەمەسپىز. قازاقستاننىڭ جاس اقىن-جازۋشىلارى ۇلتىمىزدىڭ رۋحانياتىنا، ادەبيەتىمىزدىڭ دامۋىنا ۇلەس قوسىپ ءجۇر. مىسالى، مەن وتكەن جىلى ءوزىڭىزدىڭ قولداۋىڭىزبەن قازاقستان جازۋشىلارى قولعا العان جالپى رەسپۋبليكالىق ادەبي ولكەتانۋ جوباسىنا قاتىستىم. ارنايى كەرەكۋ جەرىنە بارىپ، سول جەردىڭ ادەبيەتىمەن، مادەنيەتىمەن تانىسىپ، ءبىر توپ شىعارما جازدىم. تەك قانا مەن ەمەس، رەسپۋبليكامىزدىڭ ءار ايماعىنداعى اعا بۋىن اقىن-جازۋشىلار، جاس قالامگەرلەر وسى جوباعا قاتىستى. ەلىمىز تۋرالى، جەرىمىز تۋرالى شىعارمالار دۇنيەگە كەلدى. وسىنداي مۇمكىندىك بەرگەن سىزگە بارلىق قالامگەرلەردىڭ اتىنان العىسىمدى بىلدىرەم.

ءسوز ورايىندا قازاقستان جازۋشىلار وداعى ۇسىنعان بىرەگەي جوبا تۋرالى ايتقىم كەلەدى. ادەبيەت الەمىندە جاڭا كەڭىستىك اشۋ ماقساتىندا جاس قالامگەرلەرگە ارنالعان "ادەبيەت اكادەمياسىن" اشۋدى ۇسىنامىن. ادەبيەت اكادەمياسى اشىلسا، جاس اقىن-جازۋشىلارىمىز ءبىلىمىن شىڭداپ، الەم فيلوسوفتارىنىڭ، مادەنيەتتانۋشىلارىنىڭ ءىلىمىن بويىنا ءسىڭىرىپ، ادەبيەتىمىزدىڭ الەۋەتى ارتىپ، تىڭ ءورىس الۋىنا سەپتىگىن تيگىزەر ەدى. سول كەزدە جاس قالامگەرلەر جاھاندىق باسەكەگە قابىلەتتى شىعارمالاردى دۇنيەگە اكەلەر ەدى»، - دەدى مەرەي قارت.

تاميلا روزمەتوۆا

فورۋمدا ءسوز سويلەگەن تابىستى جاستاردىڭ ءبىرى - تاميلا روزمەتوۆا. ول 2013 جىلدان باستاپ ەلىمىزدەگى ەڭ ۇلكەن ەشكى فەرماسىن باسقارادى. 20-عا جۋىق ءسۇت ونىمدەرىن ساتىلىمعا شىعارىپ، اۆتورلىق ىرىمشىك دايىنداۋمەن اينالىسادى. اۋىل شارۋاشىلىعىمەن قاتار، قوعامدىق ءىس-شارالارعا دا بەلسەندى ارالاسادى. اتا كاسىپتىڭ شىنايى جاناشىرى تاميلا روزمەتوۆا جاستار جىلىنىڭ اشىلۋ سالتاناتىنداعى سويلەگەن سوزىندە استانادا الما باعىن اشۋدى ۇسىندى.

«المانىڭ وتانى قازاقستان ەكەنىن ەلباسىنىڭ «ۇلى دالانىڭ جەتى قىرى» ماقالاسىنان ءبىلدىم. بۇگىندە اتىراۋ جۇرتى الما ءوندىرىسىن جانداندىرۋ ۇستىندە. وسى جاستار جىلىندا ءبىز، قازاقستان حالقى اسسامبلەياسىنىڭ «جاڭعىرۋ جولى» اتتى رەسپۋبليكالىق جاستار قوزعالىسى، ماقالانى ناقتى جوبامىزبەن قولداعىمىز كەلەدى. وسى كوكتەمدە استانادا الما باعىن اشساق دەيمىز. ول ءۇشىن سۋىققا، جەلگە ءتوزىمدى المانىڭ 4 سۇرپىن تاڭداپ قويدىق. باقتى تامشىلاتىپ سۋارۋ ءادىسىن دە قاراستىردىق. وسى باققا ارنايى جەر بولىنسە، جۇمىسقا كىرىسۋگە دايىنبىز», - دەدى ت.روزمەتوۆا.

ايشولپان نۇرعايىپقىزى

تاعى ءبىر ەرەكشە قوناق - بۇركىتشى قىز ايشولپان نۇرعايىپقىزى. ول ءوزىنىڭ جەتىستىكتەرىن ايتا كەلىپ، استانادا بۇركىتشىلەر مەكتەبى اشىلسا دەگەن ارمانىن ايتتى. ءارى پرەزيدەنت نازارباەۆقا مونعولياداعى قانداستاردىڭ سالەمىن جەتكىزدى.

«مەنى اكەم نۇرعايىپ بۇركىت باپتاپ ۇيرەتتى، انام اركەز قولدادى. 8 جاسىمدا بۇركىتتى قولىما قوندىردىم. بۇركىت باپتاۋ ءۇشىن قايسارلىق قاجەت. وسى استانادا، باسقا قالالاردا قازاقتىڭ سالت-داستۇرلەرىن وقىتاتىن ورتالىقتار، سونىڭ ىشىندە بۇركىتشىلەر مەكتەبى اشىلسا دەگەن ارمانىم بار. ايتپاقشى، ۇمىتپاي تۇرعاندا ايتا كەتسەم، التايداعى از عانا قازاقتىڭ اماناتى بار ەدى، ءسىزدى باي-ولكەگە قوناق بولۋعا شاقىرامىز. اق داستارحاننان ءدام تاتىپ كەتسەڭىز، الىستاعى اعايىننىڭ رۋحى ءبىر جاساپ قالار ەدى»، – دەدى ايشولپان ءوز سوزىندە.

جاستاردى مۇقيات تىڭداعان ەلباسى بۇگىنگى تاڭدا ءومىردىڭ بارلىق سالاسى، ءبىلىم دە، جۇمىس تا، ءوزارا قارىم-قاتىناس تا وزگەرىپ كەلە جاتقانىن اتاپ ءوتتى.

«مەن كورىپ وتىرعان قازاقستاندىقتاردىڭ جاڭا بۋىنى - قازاقستاننىڭ ەڭ وراسان جەتىستىگى، مەملەكەت باشسىسى رەتىندەگى مەنىڭ جۇمىسىمنىڭ ناتيجەسى. سىزدەرمەن كەزدەسىپ وتىرعانىم ءۇشىن وتە باقىتتىمىن. مەن قازاقستاندا جاستار جىلىنىڭ باستالۋىمەن قۇتتىقتايمىن»، - دەدى ەلباسى.

«ءبىزدىڭ كوز الدىمىزدا جاڭا جاھاندىق وركەنيەت كەلە جاتىر. تسيفرلىق قوعامنىڭ، ەكونوميكا مەن ءبىلىمنىڭ ءداۋىرى كەلدى. مەنىڭ بۋىنىم مەكتەپ وقىپ جۇرگەندە، اسىرەسە اۋىلدا تەلەديدار دا جوق ەدى. راديو ەندى عانا شىعا باستاعان ەدى. 100 جىل تاريح ءۇشىن تىم قىسقا ۋاقىت. قازىر ءبارىنىڭ 10 جىلدىڭ ىشىندە قالاي وزگەرىپ جاتقانىن كورە بەرىڭىز. سول ءۇشىن ءبىزدىڭ مەملەكەت ۋاقىت العا تارتىپ وتىرعان تەگەۋرىندەرگە جاۋاپ بەرە الۋى كەرەك»، - دەدى مەملەكەت باسشىسى.

نازارباەۆ جاستار ەلدىڭ باسەكەگە قابىلەتتىلىگىنىڭ باستى فاكتورى ەكەنىن ايتتى.

«اللاعا شۇكىر، ءبىز الەمنىڭ ەڭ دامىعان 50 ەلىنىڭ قاتارىنا كىردىك. بىراق بۇل جەتكىلىكسىز. بۇگىن مەملەكەتتەر اراسىندا عانا ەمەس، ادام مەن ادام اراسىندا باسەكە ءجۇرىپ جاتىر. سوندىقتان عىلىم مەن ءبىلىمدى كوتەرەتىن كرەاتيۆتى جاستارى بار ەل عانا جەڭەدى. مەن بۇگىن سوعان كۋا بولىپ وتىرمىن», - دەدى مەملەكەت باسشىسى.

ءبارىمىز بىلەتىندەي، قر پرەزيدەنتى نۇرسۇلتان نازارباەۆتىڭ جارلىعىمەن 2019 جىل جاستار جىلى دەپ جاريالانعان بولاتىن.

اقبەرەن ەلگەزەك،
قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى:

- سوڭعى 7-8 جىلدا بايقاپ ءجۇرمىز: مۇلدە باسقا ساپاداعى جاستار ءوسىپ جەتىلىپتى. كورسەڭ، كوزىڭ قۋانادى، ءسوزىن تىڭداساڭ، جۇرەگىڭ قۋانادى. شەتىنەن سىمباتتى، شەتىنەن ءبىلىمدى. ءبارىنىڭ دۇنيەتانىمى، كوزقاراستارى بولەك. جانە كوبىسى وتانىن سۇيەدى. البەتتە، كەز كەلگەن بۋىندا "اباي جولىن" كىم جازعانىن بىلمەيتىن، تاريxىنان بەيxابار، قازاقتىڭ وتكەنىنەن گورى باسقا ەلدىڭ وتكەنىن بىلەتىن ءدۇبارالار بولا بەرەدى. دەگەنمەن، جالپى قاراعاندا، قازىرگى جاستار مىقتى! ونى مويىنداۋىمىز كەرەك. الايدا، جاستار قانشا مىقتى، ءبىلىمدى، جان-جاقتى بولسا دا، ولارعا، ولاردىڭ باستامالارىنا مەملەكەت تاراپىنان قولداۋ-قامقورلىق بولماسا، كوزىندەگى جالىنى بىرتىندەپ ءوشىپ، سالى سۋعا كەتە باستايدى. ونى ءبىزدىڭ بۋىن ازداپ كوردى. ايتەۋىر، ىلدەبايلاپ وسى كۇنگە جەتتىك. شىنىن ايتقاندا، تالاي ارماندارىمىزدىڭ كۇللى كوككە ۇشتى. بالكىم ءبىزدىڭ جاستىعىمىز مەملەكەتتىڭ قۇرىلۋ ۋاقىتىنا كەپ قالعاندىقتان بولار...
سوندىقتان، بيىلعى 2019 جىلدى مەملەكەت جاستار جىلى دەپ اتاپ، جاستارعا كوڭىل ءبولىپ جاتقانى قۋانتارلىق جاعداي. بۇگىن جاستار جىلىنىڭ اشىلۋ سالتاناتىندا پرەزيدەنت تاراپىنان دا، جاستار تاراپىنان دا كوپتەگەن جاقسى ۇسىنىستار ايتىلدى. ەندى وسى ۇسىنىستار، ەلباسى ايتقان "جول كارتاسىنداعى" جوبالار ناقتى ىسكە اسسا، ءبىرشاما ناتيجە بولاتىن سياقتى. تەك پايداسىز فلەشموب، جيىن-تويلاردان قاشايىقشى.

Abai.kz