كەشە ەلورداداعى “نۇر-الەم” پاۆيلونىندا پرەزيدەنت ن.نازارباەۆتىڭ قاتىسۋىمەن جاستار جىلىنىڭ سالتاناتتى اشىلۋ ءراسىمى ءوتتى. وعان ءار سالادا جەتىستىككە جەتىپ، ەڭبەك پەن تالانتتى ۇشتاستىرا بىلگەن ۇزدىكتەر قاتىستى. سولاردىڭ ىشىندە 7 بالانى ومىرگە اكەلگەن باتىر انا جازيرا تۇرعىنوۆا دا بار.

ول كىسى مىنبەرگە شىققاننان پرەزيدەنتكە العىس ايتىپ، ءتىپتى، جاڭادان قۇرىلعان تۇركىستان وبلىسىنداعى قۇرىلىستىڭ قارقىندى ءجۇرىپ جاتقانىنان حاباردار ەتتى. الايدا، كوپ بالالى انانىڭ وسى كۇنگە دەيىن پاتەر جالداپ، كۇيەۋىنىڭ وسى ۋاقىتقا دەيىن جۇمىسسىز ەكەنى اقپارات قۇرالدارىندا جاريالانعان بولاتىن. ماسەلەن، جازيرا وسىدان ءبىر اپتا بۇرىن كتك ارناسىنا بەرگەن سۇحباتىندا:

- تۇرمىسقا شىققان سوڭ، ۇزىنارىق اۋىلىنا كەلىن بولىپ ءتۇستىم. سول اۋىلدا 11 جىل بويى تۇردىق. اۋىلدى جەر بولعانىمەن، كۇيەۋىمە ول جاقتا جۇمىس بولمادى. كۇيەۋىمە جۇمىس تابىلار دەگەن نيەتپەن شىمكەنتتىڭ ماڭىنداعى جۇلدىز ەلدىمەكەنىنە كوشىپ كەلدىك. قازىر پاتەر جالداپ تۇرىپ جاتىرمىز. 

ءوزىم بولسام جەتى بالانى قاراپ، ۇيدە وتىرمىن. سەبەبى، ولاردىڭ تاماعى، مەكتەپكە باراتىنى بار. قازىردىڭ وزىندە 4-ەۋى مەكتەپكە بارادى. ولاردى اپارىپ، الىپ كەلۋ كەرەك. ءۇش پەرزەنتىم ءالى كىشكەنتاي. كۇندەلىكتى تاماق پەن كيىم-كەشەكتەرىنە قاراجاتىمىز جەتپەي قالىپ جاتادى. كەيدە قارىز بولىپ قالامىز.  كۇيەۋىمنىڭ كۇندەلىكتى تاپقان ازىن-اۋلاق اقشاسىن جەتكىزۋگە تىرىسامىن. ارا-اراسىندا تۋىستارىمىز بەن كورشىلەرىمىز قاراسىپ تۇرادى. بالالارىم تاماقتى تويىپ ىشپەسە دە امالداۋعا ءماجبۇرمىز. ەندى كىشكەنتايىم ءبىر جاسقا تولسا، ونداي جاعدايىمىز قالاي بولاتىنىن بىلمەدىم. سەبەبى وعان تولەنەتىن جاردەماقى قازىر جانۇيامىزدىڭ نەگىزگى قاراجاتى، - دەگەن بولاتىن.

شىن مانىندە، انالارعا بەرىلەتىن جاردەماقى كوڭىل كونشىتپەيتىنى اقيقات. ماسەلەن، وتكەن جىلدىڭ سوڭىندا الماتى وبلىسىندا كوپ بالالى انالار التىن القالارىنان باس تارتتى. سەبەبى، 15 جىلدان بەرى ءۇي كەزەگى جىلجىمايدى، تۇرمىس جاعدايلارى تومەن. ال، كۇندەلىكتى بۇقارالىق اقپارات قۇرالدارى مەن الەۋمەتتىك جەلىدە، كومەك سۇراپ، اۋىرعان بالالارىنىڭ ەمىنە قارجى تابا الماي شارق ۇرعان شاراسىز انالاردان كوز سۇرىنەدى. الايدا، ونى ابىلقاسىموۆا حانىم كورمەيتىن سياقتى. سەبەبى، جۋىردا عانا ول انالارعا تولەنەتىن 16 مىڭ تەڭگە جاردەماقىنىڭ تىم كوپ ەكەنىن ايتقان ەدى. ابىلقاسىموۆانىڭ سوزىنە سەنسەك، مۇنداي جۇماق جاعداي الەمنىڭ ەشبىر ەلىندە جوق ەكەن. ال، كۇن سايىن قىمباتشىلىق قىسقان قوعامدا 16 مىڭ تەڭگەگە بالانىڭ ءبىر سومكەسى عانا كەلەتىنىن مينيستر حانىم نەگە بىلمەيدى؟

ال، اۋىلداعى انالاردىڭ حال-جاعدايى نەشىك؟ ونى كورگەن ابىلقاسىموۆا بار ما؟ ارينە جوق. كەرىسىنشە، اۋىلداردى بولاشاعى جوق دەپ تانىپ، “بيۋدجەتتىك شىعىنداردى ۇنەمدەۋ ءۇشىن”  سولتۇستىكتەگى 40 -قا جۋىق اۋىلدىڭ جويىلاتىنىن مالىمدەگەن دە وسى مينيستر ەدى.

ءتۇيىن.

حالىقتىڭ اراسىنان شىققان قاراپايىم ادامنىڭ بيىك مىنبەرلەردە ەل جايىن ايتا المايتىنى وكىنىشتى. ەگەر، كەشەگى جيىندا جازيراعا جاتتاندى سوزدەردى وقىتپاي، ءوزىنىڭ باسىنداعى قيىندىقتى ءھام جالپى انالاردىڭ ماسەلەلەرىن ايتۋعا مۇمكىندىك بەرگەندە، پرەزيدەنت تە ءبىرشاما ماسەلەدەن حاباردار بولعان بولار ەدى. بىراق، ورتاداعى “سۇزگىنىڭ” مىقتىلىعىنان ءالى دە حالىقتىڭ جايى جوعارىعا جەتپەي جاتىر...

نۇربيكە بەكسۇلتانقىزى

Abai.kz