جۇما, 30 قازان 2020
COVID-19 قازاقستاندا. جۇقتىرعاندار — 111492. جازىلعاندار — 106187. قايتىس بولعاندار — 1825
ساڭلاق 2079 5 پىكىر 20 اقپان, 2019 ساعات 11:08

قازاقستان قۇراماسىنىڭ جاڭا باپكەرى ميحال بيلەك كىمدەرگە سەنىم ارتادى؟

بيىل قاڭتار ايىندا قازاقستان فۋتبول فەدەراتسياسى ۇلكەن وزگەرىستەر جاسادى. ۇلتتىق قۇرامانى ءبىر جىلعا جۋىق ۋاقىت باپتاعان بولگاريالىق مامان ستانيمير ستويلوۆتى راقمەت ايتىپ شىعارىپ سالدى دا، چەحيادان ميحال بيلەك دەگەن باپكەردى الدىردى.

ميلليونداپ اقشا قۇيىپ، ەلدەگى باسقا سپورت تۇرلەرىنە جاسالماعان جاعدايدى جاساسا دا قازاق فۋتبولى تۇساۋلى اتتاي تاپىراقتاپ ءجۇر ءالى. بۇنى بىرەۋلەر اقشاعا قۇنىققان فۋتبولشىلاردان كورسە، ەندى ءبىرى باپكەرلەردى كىنالايدى. ماسەلەنىڭ مانىنە تەرەڭىرەك ۇڭىلگىسى كەلەتىن تاعى ءبىر توپ "فۋتبولداعى ساياساتتى دۇرىستاماي دامۋ جايلى ايتۋ بەكەر" دەيدى. قىسقاسى، قازاقستان فۋتبول فەدەراتسياسىنىڭ جۇمىسى سىن كوتەرمەيدى.

ايتپەسە "استانا" فۋتبول كلۋبىمەن تولاعاي تابىستارعا جەتكەن ستانيمير ستويلوۆ بىلىكسىز باپكەر ەمەس ەدى. باس كوماندانىڭ تىزگىنىن بۇل مامان ۇستاعاندا كوپ جانكۇيەر ۇلكەن ءۇمىت كۇتكەن. قازاق فۋتبولىن اياعىنان تۇرعىزار دەپ سەنگەن. الايدا ۇلتتىق قۇرامامەن جاقسى ناتيجە كورسەتە المادى. وسىدان كەيىن كوپشىلىك اراسىندا ء"بىزدىڭ قيسىق اياقتارعا جوزە موۋرنيونى باپكەر ەتسەڭ دە ەشتەڭە وزگەرمەيدى" دەگەن ءسوز تارادى. شىنىمەن دە، مىقتى موتيۆاتور سانالاتىن ستويلوۆتىڭ ءوزى جىگەرىن جاني الماعان ءبىزدىڭ فۋتبولشىلاردىڭ دەڭگەيىن وسىدان بايقاۋعا بولادى.

ەندى جاڭا باپكەر جايلى ءبىر اۋىز ءسوز.

ميحال بيلەك 1965 جىلى 13 ساۋىردە دۇنيەگە كەلگەن. فۋتبولشى كەزىندە چەحوسلوۆاكيا جانە چەحيا قۇرامالارىنىڭ جارتىلاي قورعاۋشىسى بولعان. جاتتىقتىرۋشى قىزمەتىن چەحيالىق «تەپليتسە» كلۋبىندا باستادى. سونىمەن قاتار، «كارتاحينەس» (كوستا-ريكا), «حمەل»، «ۆيكتوريا پلزەن»، «سپارتا پراگا»، «ۆىسوچينا» (بارلىعى - چەحيا), «رۋجومبەروك» («سلوۆاكيا»), «دينامو تبيليسي» (گرۋزيا) فۋتبول كلۋبتارىن جاتتىقتىردى. سوڭعى جۇمىس ورنى - چەحيالىق «فاستاۆ زلين» كومانداسى.

ميحال بيلەكتىڭ جاتتىقتىرۋشىلار شتابىنا ەنگەندەر: كومەكشىلەرى - سلوۆاكيالىق ميحال حيپپ جانە تالعات بايسۋفينوۆ، قاقپاشىلاردىڭ جاتتىقتىرۋشىسى - نيكولاي روديونوۆ.

جاڭا باپكەردى ناۋرىز ايىندا ۇلكەن سىناق كۇتىپ تۇر. 21 ناۋرىزدا 2020 جىلعى ەۋروپا چەمپيوناتىنا ىرىكتەۋ ءتۋرنيرى باستالادى. ءبىزدىڭ قۇرامانىڭ العاشقى قارسىلاستارى شوتلانديا جانە رەسەي فۋتبولشىلارى. ال وعان دەيىن مولدوۆا قۇراماسىمەن جولداستىق ماتچ وتكىزەمىز. بۇل ويىن ەرتەڭ، 21 اقپان استانا ۋاقىتى ساعات 19:00-گە جوسپارلانعان. كەزدەسۋ تۇركيانىڭ انتاليا قالاسىندا وتەدى.

قازاقستان فۋتبول فەدەراتسياسى مەن قازاقستان قۇراماسى جايلى الدا تارقاتىپ جازارمىز. وعان دەيىن قۇرامانىڭ سۋ جاڭا باپكەرى ميحال بيلەك مولدوۆاعا قارسى ويىنعا شاقىرعان فۋتبولشىلاردىڭ تىزىمىمەن تانىسايىق.

قاقپاشىلار: دميترو نەپوگودوۆ («ورداباسى»), مارسەل يسلامقۇلوۆ («قايسار»), يگور شاتسكي («شاحتەر»);

قورعاۋشىلار: دميتري شومكو («استانا»), راۋان ورىنباسار («جەتىسۋ»), رافكات اسلان، رۋسلان ەسىموۆ (ەكەۋى دە - «ەرتىس»), ساعادات تۇرسىنباي، تەمىرلان ەرلانوۆ، ماردان تولەبەك، مارات بىستروۆ، سەرگەي مالىي (ۆسە - «ورداباسى»), بەكزات شادمانوۆ («تاراز»), دميتري ميروشنيچەنكو («توبىل»);

جارتىلاي قورعاۋشىلار: يۋري پەرتسۋح («استانا»), ەركىن تاپالوۆ («جەتىسۋ»), ماكسيم فەدين، ازات نۇرعاليەۆ (ەكەۋى دە - «توبىل»), گەۆورگ نادجاريان («شاحتەر»), دۋمان نارزىلداەۆ («قايسار»);

شابۋىلشىلار: رومان مۇرتازاەۆ («استانا»), الەكسەي ششەتكين («ورداباسى»), باۋىرجان تۇرىسبەك («توبىل»), ورالحان ومىرتاەۆ («شاحتەر»).

باپكەرلەر قۇرامى: ميحال بيلەك - باس باپكەر، ميحال حيپپ - باس باپكەردىڭ كومەكشىسى، تالعات بايسۋفينوۆ - باس باپكەردىڭ كومەكشىسى، نيكولاي روديونوۆ - قاقپاشىلار باپكەرى.

بايقاپ وتىرعاندارىڭىزداي، بۇل تىزىمدە ەلىمىزدەگى ەكى مىقتى كوماندانىڭ ءبىرى - "قايراتتىڭ" بىردە-ءبىر ويىنشىسى جوق. قارجىنى قالا اكىمدىگىنەن ەمەس، ءوز دەمەۋشىلەرىنەن الاتىن الماتىلىق ۇجىم اركەز وسىنداي وزگەشە ارەكەتتەرىمەن كوزگە ءتۇسىپ وتىرادى. FIFA كۇنتىزبەسىندە بەلگىلەنبەگەن بۇنداي جولداستىق كەزدەسۋلەرگە ويىنشىلارىن جىبەرمەي قويۋ ولارعا تاڭسىق ەمەس. وسىدان بۇرىن، 2016 جىلى 7 ماۋسىم كۇنى قىتاي قۇراماسىمەن وتكەن جولداستىق ماتچقا دا ويىنشىلارىن جىبەرمگەن. ايتپاقشى، مەزگىلسىز ۇيىمداستىرىلعان سول كەزدەسۋدە قازاقستان قۇراماسىنىڭ جارتىلاي قورعاۋشىسى ۇلان قونىسباەۆ اۋىر جاراقات العان ەدى. 

قۋانىش قاپپاس

Abai.kz

5 پىكىر