دۇيسەنبى, 25 ناۋرىز 2019
ءبىزدىڭ شەنەۋنىك 14005 11 پىكىر 13 ناۋرىز, 2019 ساعات 17:22

پان گي مۋننان ساداعا كەت، ءمادينا!

كۇنى كەشە عانا سۋ جاڭا قىزمەتكە تاعايىندالعان ابىلقاسىموۆا دەيتىن ايدىك ايەل تۋرالى از كەم ءسوز شىعارماقپىز. ءمادينا عوي، ءيا، سول ءمادينا. مينيستر شەكپەنىن كيىپ-اپ، اۋزىنا كەلگەندى كوكىگەن، ءسويتىپ ءجۇرىپ-اق، ابىرويى ايرانداي توگىلگەن ءمادينا قىز.

بۇكىل جۇرتتىڭ اشۋىن كەلتىرەمىن دەپ، مينيستر كرەسلوسىنان ايىرىلىپ قالعان ماكەڭ كەشە عانا جاڭا جاساقتالعان، اتەشتەن بۇرىن ويانىپ، قىتاي ءتىلىن ۇيرەنىپ جۇرگەن اسقار مامين دەيتىن پوليگلوت پوليتيك باسقاراتىن ۇكىمەتتىڭ قۇرامىنا كىردى. ءسويتىپ ۇلتتىق ەكونوميكا ءمينيسترىنىڭ ورىنباسارى بولىپ تاعايىندالدى.

ماكەڭنىڭ وسى جولعى ورالۋى تۋرالى اقپارعا كوز جۇگىرتەيىكشى، اۋەلى. «ءمادينا قىز مينيسترلىككە كەلدى» دەگەندى ەستىگەن جۇرت ەكىۇشتى پىكىردە بولدى. يتپەن قۋالاسا كەتپەيتىن ماكەڭنىڭ قانداي قۇدىرەتى بارىن بىلمەي ەسەڭگىرەگەن كۇي كەشتى. «ءاي-اي كيىمى مەن اشەكەيى كوپ ابىلقاسىموۆاسىز قازاقستان ۇكىمەتىنىڭ تاڭى اتپاي، كۇنى باتپاي قالاتىن با ەدى» دەدى كەي جۇرت. «ءمادينا قىزعا سول جولى وبال بولدى» دەگەندەر دە تابىلدى. ەندى وسى پىكىرلەردى ساراپتاي وتىرىپ، ءبىز دە ءوز پايىم-پاراساتىمىزشا وي قۇرايىق...

ابىلقاسىموۆانىڭ قايتا ورالاۋى

ابىلقاسىموۆا قر ۇلتتىق ەكونوميكا مينيسترلىگىنە قايتىپ ورالدى. ءمينيستردىڭ ورىنباسارى، كىشى مينيستر بولىپ تاعايىندالدى.

كەزىندە ماكەڭنىڭ قولاستىندا قىزمەت ەتكەن قازىرگى ەڭبەك جانە الەۋمەتتىك قورعاۋ ۆيتسە-ءمينيسترى سۆەتلانا جاقىپوۆا دەيتىن اتى ءماشھۇر ايەل بار ەدى عوي. سىعىر كوزدى، سازارعان ءوڭدى سۆەتا حانىم ابىلقاسىموۆانىڭ ۇكىمەتكە قايتا ورالعانى تۋرالى ەكى اۋىز پىكىر ايتىپتى.

جاقىپوۆانىڭ پىكىرى:

- مەنىڭ جەكە پىكىرىمشە، مەنىڭ بۇرىنعى باستىعىم كەز كەلگەن تاپسىرمانى ورىنداي الاتىن ادام. ول وتە-موتە كاسىبي ادام. مەن ونىڭ جۇمىسى رەتتەلىپ كەتكەنىن، بارلىعى جاقسى بولعانىن تىلەيمىن، - دەپتى جاقىپوۆا. ايتپاقشى، سۆەتا حانىم دا انالار كوتەرىلگەندە باستىعى ابىلقاسىموۆا سەكىلدى سوزدەن سۇرىنگەن ەدى.

جاڭا ۇكىمەتتىڭ ەسكى كادرلارىمەن بىرگە ءۇش-ءتورت جاڭا مينيستر تاعايىندالعانىن ايتقان ەدىك. مىنە، سول جاڭالاردىڭ ءبىرى بولىپ ەكونوميكانىڭ تىزگىنىن ۇستاعان رۋسلان دالەنوۆ دەيتىن مينيستر دە ءمادينانىڭ ءوز قاراماعىنا كەلگەنى تۋرالى پىكىر بىلدىرگەن.

دالەنوۆتىڭ پىكىرى:

- جالاقى ارنايى جۇيەمەن رەتتەلەدى. ۆيتسە-ءمينيستردىڭ جالاقىسى مينيسترگە قاراعاندا تومەن. بۇل قىزمەتىنىڭ تومەندەۋىن بىلدىرەدى، - دەپتى دالەنوۆ.

ءيا، ابىلقاسىموۆادان گورى ايلىعىم جوعارى دەگەن رۋسلان مىرزا ماكەڭنىڭ قارىم-قابىلەتى تۋرالى ايتقىسى كەلمەگەن سەكىلدى.

- ۆيتسە-مينيسترلەر ۇكىمەت شەشىمىمەن تاعايىندالادى. ابىلقاسىموۆا حانىم بۇرىن ەكونوميكا مينيسترلىگىندە جۇمىس جاسادى. حالىقارالىق بلوكتى باسقاردى. ءبىزدىڭ مينيسترلىكتە دە ول حالىقارالىق بلوكپەن جۇمىس جاسايتىن بولادى. تۇسىنەسىز بە، مەن ارىپتەستەرىمنىڭ قىزمەتى تۋرالى پىكىر ايتا الامىن. الايدا قاراماعىمداعىلار تۋرالى ايتا المايمىن. مەن ولاردان تاپسىرمانىڭ ورىندالۋىن تالاپ ەتەمىن. ءبىتتى، -دەپ تۇيىندەپتى.

ەستەرىڭىزگە سالا كەتەيىك، 2018 جىلدىڭ اقپانىندا ماكەڭ ەڭبەك مينيسترلىگىنە تاعايىندالعان ەدى. سول كەزدە ءدال وسى دالەنوۆ ونىڭ جاڭا قىزمەتى تۋرالى پىكىر ايتقان ەكەن. نە دەپتى دەيسىزدەر عوي. مىنەكەي، كورىڭىزدەر...

2018 جىل. دالەنوۆ ابىلقاسىموۆا تۋرالى:

- مەنىڭشە، ول جاقسى مينيستر بولادى. ونىڭ پايداسى كوپ. ونىڭ باتىستىق ءبىلىمى بار. ەگەر بىرەۋ-مىرەۋ ونىڭ جاۋىنگەرلىك تاجىربيەسى جەتىسپەيدى دەيتىن بولسا، مەن ەسەسىنە ونىڭ جاۋىنگەرلىك مىنەزى بار دەر ەدىم. ءبىز وعان ساۋاتتى، ساپالى قىزمەتكەر، ەكونوميست، باسشى جانە قاراپايىم ادام دەگەن مىنەزدەمە بەرەمىز»، - دەگەن ەكەن.

ابىلقاسىموۆا تۋرالى قازىرگى باستىعى بىلتىر اياماي ماقتاپ سويلەسە، وسى جولى سوزايارلىق جاساپتى. ءالىپتىڭ ارتىن باعايىن دەدى مە ەكەن، الدە ابىلقاسىموۆاعا سەنىمسىزدىك تانىتقانى ما، ايتەۋىر وسىمەن شەكتەلگەن.

بىلتىر تامارا اپاي دۇيسەنوۆادان تىزگىندى الار تۇستا دالەنوۆ جەر-كوككە سىيعىزباي ماقتاعان ماكەڭنىڭ شىنىندا ءبىلىمى جوعارى. سول تۋرالى جازايىقشى...

ابىلقاسىموۆا تۋرالى نە بىلەسىز؟

ءمادينا ەراسىلقىزى ابىلقاسىموۆا 1978 جىلى الماتىدا تۋعان. بيىل 1-تامىزدا 41 جاسقا تولادى. اكەسى ەكس-دەپۋتات ەراسىل ابىلقاسىموۆ. دارىگەر. ماجىلىستە دەپۋتات بولدى. 2005 جىلى پرەزيدەنت بولماققا بەكىنىپ، سايلاۋعا دا ءتۇسىپ، 0,34 پايىز داۋىس جيناعان. ماكەڭنىڭ مينيستر بولۋىنا اكەسى ىقپال ەتتى دەيتىندەر دە بار. كىم ءبىلسىن... تەگىن ادام تاز بولمايدى دەگەنگە سالساق، ءبارى مۇمكىن. دەگەنمەن ماكەڭ تۋرالى بىلەتىنىمىز ءبىر توعىز بولسا، بىلمەيتىنىمىز توقسان توعىز ەكەنى تاعى راس.

ءمادينا قىزدىڭ وقىعان-توقىعانىنا قاراساق، قارا جاياۋلاردىڭ سورتىنان ەمەس سەكىلدى...

1999 جىلى قازاق مەملەكەتتىك باسقارۋ اكادەمياسىن «حالىقارالىق ەكونوميكالىق قاتىناستار» ماماندىعى بويىنشا وقىعان.

2003 جىلى كولۋمبيا ۋنيۆەرسيتەتىنىڭ ماگيستراتۋراسىن «ەكونوميكالىق ساياساتتى باسقارۋ» ماماندىعى بويىنشا تامامداعان.

2011 جىلى گارۆارد ۋنيۆەرسيتەتىنىڭ كەننەدي اتىنداعى مەملەكەتتىك باسقارۋ مەكتەبىن مەملەكەتتىك باسقارۋ ماگيسترى بولىپ اياقتاعان.

باسقاسىن ايتپاساق تا، اناۋ گارۆارد ۋنيۆەرسيتەتىن الايىقشى. نوبەل سىيلىعىنىڭ 157 يەگەرىن وقىتىپ شىعارعان ۋنيۆەرسيتەت. ءبىزدىڭ ماكەڭ وقىعان كەننەدي اتىنداعى باسقارۋ مەكتەبىنەن دە وڭاي ادامدار شىقپاعان. قاراڭىزشى، مەكسيكانىڭ پرەزيدەنتى بولعان فيليپپە كالدەرون مەن بۇۇ-نىڭ سەگىزىنشى باس حاتشىسى بولعان پان گي مۋن وقىعان.

ياعني، ءمادينا قىز وقىعان-توقىعانىنا قاراساڭ سۇمدىق ءبىلىمدى ادام. وعان تەڭى جوق، ءتىپتى. ال ەندى سونداي اتاقتى جەردىڭ تۇلەگى تەگى جەكسۇرىن اتانۋىن قالاي تۇسىنەمىز؟

ءاي بىراق، ءبىزدىڭ ماكەڭ «قازعا ەرەمىن دەپ قارعانىڭ شاتى ايىرىلىپتىنىڭ» كەرىن كەلتىردى. پان گي مۋن سەكىلدىلەر شىققان جەردەن ءمادينا سەكىلدىلەر دە شىعادى دەيمىز دە قويامىز... جوق، الدە "پان گي مۋننان ساداعا كەت، ءمادينا!" دەيمىز بە؟  ءجا، ءارى قاراي جازايىق...

ماكەڭنىڭ ەڭبەك جولى

ماكەڭنىڭ مىقتىلىعى سول – ول مەملەكەتتىك قىزمەتتىڭ بارلىق ساتىسىنان وتكەن ادام دەيدى ءبىراز جۇرت. قاراپ وتىرساق، ءبىراز شارۋانىڭ باسىن شالىپتى، راس. تىندىرعانى شامالى بولسا دا اقپار ءۇشىن جازايىق، ال.

*  1999-2001 جىلدارى – ستراتەگيالىق جوسپارلاۋ اگەنتتىگىنىڭ باس مامانى;

*  2003-2004 جىلدارى – ەكونوميكا جانە بيۋدجەتتىك جوسپارلاۋ مينيسترلىگى ستراتەگيالىق جوسپارلاۋ باسقارماسىنىڭ باسشىسى;

*  2004-2006 جىلدارى – «ماركەتينگتىك-تالدامالى زەرتتەۋلەر ورتالىعى» اق مەملەكەتتىك ساياساتتى تالداۋ دەپارتامەنتىنىڭ ديرەكتورى;

*  2006-2008 جىلدارى – قر پرەمەر-ءمينيسترى كەڭسەسى الەۋمەتتىك-ەكونوميكالىق ءبولىمى مەڭگەرۋشىسىنىڭ ورىنباسارى;

*  2008-2011 جىلدارى – پرەزيدەنت اكىمشىلىگى ستراتەگيالىق ازىرلەمەلەر جانە تالداۋ ورتالىعى مەڭگەرۋشىسىنىڭ ورىنباسارى;

*  2011-2013 جىلدارى – ەكونوميكالىق دامۋ جانە ساۋدا ۆيتسە-ءمينيسترى;

*  2012 جىلدان باستاپ دۇنيجۇزىلىك بانكتىڭ قازاقستانداعى باسقارۋشىسىنىڭ ورىنباسارى;

*  2013-2014 جىلدارى – ەكونوميكا جانە بيۋدجەتتىك جوسپارلاۋ ۆيتسە-ءمينيسترى;

*  2014 جىلدىڭ تامىزىنان 2018 جىلدىڭ اقپانىنا دەيىن – ۇلتتىق ەكونوميكا ۆيتسە-ءمينيسترى;

*  2018 جىلدىڭ 9 اقپانىنان 2019 جىلدىڭ 25 اقپانىنا دەيىن ەڭبەك جانە حالىقتى الەۋمەتتىك قورعاۋ ءمينيسترى قىزمەتىن اتقاردى.

ەڭبەك جولىنا قاراپ وتىرساڭىز، ماكەڭ ءار كرەسلودا 1-2 جىلدان عانا وتىرعان. ەڭ ۇزاق ىستەگەن جۇمىسى – ۇلتتىق ەكونوميكا ۆيتسە-ءمينيسترى بولعان جىلدار.  باقانداي 4 جىل كىشى مينيستر بولعان.

ماكەڭ قازىر ەكونوميكا مينيسترلىگىنە قايتا كەلدى دەدىك قوي. ول 2014 جىلى دا ەكونوميكا مينيسترلىگىنىڭ ۆيتسە-ءمينيسترى بولدى. سول كەزدەگى ەلدىڭ ەكونوميكالىق الەۋەتى كەرەمەت بولدى دەي المايمىز. ماكەڭ مەن ونىڭ باستىقتارى ەكونوميكانى تىزگىندەگەن جىلدارى بولعان داعدارىستى ەسكە تۇسىرەيىكشى...

2014 جىلعى داعدارىس:

2014 جىل ەل ەكونوميكاسى ءۇشىن سوڭعى ونجىلدىقتاعى ەڭ اۋىر جىل بولدى. پرەزيدەنتتىڭ ءوزى سول كەزدە بىزدە عانا ەمەس، الەمدەگى احۋال اۋمالى-توكپەلى دەپ اقتاعانداي سويلەگەنىمەن، الەۋمەتتىك-ەكونوميكالىق جاعداي تومەندەدى. ول فاكت. راس، سول جىلى ەكى دەرجاۆانىڭ سانكتسيا سوعىسى ءورشىدى. الەمدىك داعدارىس باستالدى. نارىقتا مۇناي باعاسى تومەندەدى.

قازىرگە دەيىن سالقىنى سەزىلەتىن ەلدەگى ەكونوميكالىق داعدارىس سول جىلى باستالدى. الەمدىك نارىقتا قارا التىن باعاسى كۇرت تومەندەدى. قازاقستان ەكونوميكاسى مۇنداي جاعدايعا مۇلدە دايىن بولماي شىقتى.

2014 جىلى ءجىو كولەمى دوللارعا شاققاندا 227,44 دوللار بولسا، ءجىو ءوسىمى -6,7 پايىز بولدى. قازاقستاننىڭ سىرتقى قارىزى 149,13 ميلليارد دوللارعا جەتتى. بۇل جان باسىنا شاققاندا ءار ادامعا 8761 دوللاردان اينالاتىن ەدى. ينفلياتسيا كومەلى 7,4 پايىزدى قۇرادى.

ەڭ تومەنگى جالاقى – 19 966 تەڭگە بولدى. مەملەكەت بەرەتىن بازالىق زەينەتاقى كولەمى – 9 983 تەڭگەنى عانا قۇرادى. ەڭ تومەنگى زەينەتاقى – 20 782 تەڭگە بولدى.

2014 جىلى ۇلتتىق ۆاليۋتا دەۆالۆاتسيالاندى. ەلدە دەۆالۆاتسيا بولدى. تەڭگەنىڭ دوللارعا شاققانداعى باعامى 155 تەڭگەدەن 188 تەڭگەگە ءبىر-اق سەكىردى.

ەلدەگى ساۋدا دۇكەندەرى مەن سۋپەرماركەتتەر ءبىر-اق كۇندە تاۋار باعاسىن كوتەردى. ەلدە ازىق-تۇلىك، ءدارى-دارمەك، جانارماي، كولىك جانە قۇرىلىس ماتەريالدارى باعاسى ءوستى.

2014 جىلعى دەۆالۆاتسيا ارقىلى جۇرتتىڭ ايلىق تابىسىنىڭ 20 پايىزىن تونادى. جوعارىدا ايتقانداي-اق، ءبىزدىڭ ەلدىڭ ەكونوميكاسى مۇنايعا تاۋەلدى ەكەنىن سول كەزدە جانە ءبىر مارتە تۇسىندىرگەندەي بولدى.

2014 جىلى مەملەكەتتىڭ جالپى بيۋدجەتى 31 ميلليارد بولدى. سول جىلدارى ءبىز مۇناي باعاسىنىڭ قۇلدىراۋىنان 60 ميلليارد ۇتىلدىق. اينالدىرعان 1,5 جىلدا مەملەكەتتىڭ 2 جىلدىق بيۋدجەتىنەن ايىرىلدىق.

2014 جىلى 78,2 ميلليارد دوللارعا شيكىزات ساتىپ، 41,2 ميلليارد دوللارعا تاۋار ساتىپ الدىق.

2013 جىلى قازاقستاننىڭ ەكسپورتى 84,7 ميلليارد بولسا، 2014 جىلى ەكسپورت كولەمى ازايىپ، 79,5 ميلليارد دوللاردى قۇرادى. 2014 جىلى يمپورت 30,6 ميلليارد دوللاردى قۇرادى.

2015 جىلعى داعدارىس:

2015 جىل دا قازاقستان ەكونوميكاسى ءۇشىن داعدارىس جىلى بولدى. ول تۋرالى پرەزيدەنتتىڭ ءوزى دە ايتتى.

تاعى دا كىنالى الەمدىك داعدارىس. تاعى دا مۇناي باعاسىنىڭ تومەندەۋى. تاعى دا سىرتقى فاكتور. ايتپاقشى، سول جىلى مۇنايدىڭ نارىقتاعى باعاسى 50 دوللارعا دەيىن ءتۇستى.

ەلدە ازىق-تۇلىك باعاسى ءوستى. جۇمىسسىزدار سانى ارتتى. حالىقارالىق رەزەرۆ 1 ميلليارد دوللارعا دەيىن قىسقاردى. ۇلتتىق ۆاليۋتانىڭ دوللارعا شاققانداعى باعامى 51,9%-عا، ەۋروعا شاققاندا - 42%-عا، رۋبلگە شاققاندا - 42%-عا قۇلادى.

جۇمىسسىزدىق دەڭگەيى 4,9%-عا جەتتى.

ۆاليۋتالىق كىرىستىڭ ەكسپورت بويىنشا وسى كەزەڭدەگى قىسقارۋى 1,74 ەسە بولىپ، 2014 جىلعى 80,3 ملرد. دوللاردان 2015 جىلعى 46,2 ملرد. دوللارعا دەيىن ءتۇستى. ال ساۋدا بالانسىنىڭ سالدوسى 2015 جىلى مينۋسقا ءتۇسىپ، 5,3 ملرد. دوللار بولدى.

2015 جىلى دوللار باعامى 183,7 تەڭگە بولسا، 2016 جىلى بۇل كورسەتكىش 365,83 تەڭگەگە دەيىن كوتەرىلدى. تەڭگە 195 پايىزعا دەۆالۆاتسيالاندى.

2015 جىلى ەۋروينتەگراتسيا قازاق تەڭگەسىن ەڭ قۇنسىز ۆاليۋتا دەپ باعالادى.

تەڭگەنىڭ وسىنشاما كۇشتى دەۆالۆاتسياسى – ۇكىمەت پەن ۇلتتىق بانكتىڭ ءتيىمسىز ەكونوميكالىق ساياساتىنىڭ سالدارى ەكەنى داۋسىز.

ءبىز عانا ەمەس، ەكونوميست ساراپشىلاردىڭ ءوزى وسى ەكى داعدارىستى قازاقستان ۇكىمەتىنىڭ، ونىڭ ىشىندە دە ەكونوميكا مينيسترلىگىنىڭ قاتەلىگى دەپ تانىدى. ال جاڭاعى پان گي مۋنمەن ساباقتاس ءبىزدىڭ ماكەڭ ءدال وسى جىلدارى ۇلتتىق ەكونوميكا ءمينيسترىنىڭ ورىنباسارى بولىپ قىزمەت جاساعان.

ابىلقاسىموۆا حالىققا نەگە جاقپاي قالدى؟

ءمادينا قىز ەڭبەك مينيسترلىگىنە 2018 جىلدىڭ اقپانىندا كەلدى. 1 جىل 16 كۇن مينيستر بولىپ قىزمەت ەتتى. پرەزيدەنتتەن سوگىس الىپ، ءابىرجىپ جۇرگەن تامارا اپاي دۇيسەنوۆانىڭ ورنىنا مينيستر بولىپ تاعايىندالعان ماكەڭ بار بولعانى 1 جىل مينيستر بولدى.

جۇرت بيىل ونىڭ وتستاۆكاسىن تالاپ ەتتى دەدىك قوي. انىعىندا ەڭبەك مينيسترلىگىنىڭ ماكەڭە دەيىن مىلجا-مىلجاسى شىعىپ، جۇمىسى جۇيەسىزدىككە ۇشىراپ جاتقان-تىن. ول مينيسترلىك باسىندا دەنساۋلىق ساقتاۋ مينيسترلىگىنىڭ قۇرامىندا بولدى. كەيىن ودان ءبولىنىپ شىقتى.

اقپاندا بولعان استاناداعى ايتۋعا اۋىر، ءتىل كۇرمەلەتىن، جازۋعا قول جۇرمەيتىن شەتىن وقيعادان كەيىن-اق،  ابىلقاسىموۆاعا جۇرت قارعىس جاۋدىرا باستادى. جەر-جەرلەردە الاڭعا شىققان، اكىمدەردى، اكىمدىكتەردى تىكەسىنەن تۇرعىزعان انالار دا ءمادينانىڭ مەمقىزمەتتەن قۋىلۋىن تالاپ ەتىپ قويدى. وعان دا ءوزى كىنالى ەدى. «كوپ بالالى انالارعا 16 مىڭ بەرىلەدى. بۇنداي الەمنىڭ ەشبىر ەلىندە جوق» دەپ جاڭادان امەريكانى اشقانداي سويلەپ، ايدى اسپاننان ءبىر-اق شىعاردى. ونسىز دا زىعىردانى قايناعان قالىڭ ەلدى بۇل ءسوز اشىندىردى. ءسويتىپ ماكەڭ ءوز ورىن ءوزى قازدى.

2019 جىلدىڭ قاڭتارىندا كوپبالالى انالارعا تولەنەتىن جاردەماقىنىڭ 15,4 مىڭنان 16,1 مىڭ تەڭگەگە دەيىن كوتەرىلگەنىن ماقتانىشپەن ايتقان ابىلقاسىموۆا جۇرتتىڭ اشۋىنا ءتيدى.

«رەسەيدە انا كاپيتالى دەگەن بار. بىراق، بىزدە بارلىق جىلدى ەسەپكە الساق، انالار بىرنەشە ميلليون تەڭگە الادى، ال جاردەماقى – ءومىر بويى تولەنەتىن كومەك»، - دەگەن ەدى ول.

كوپبالالى انالاردى «ميلليونەرگە» تەڭەگەن ابىلقاسىموۆانىڭ سوزدەرى الەمجەلىنى شارلاپ كەتتى.

ال الاپات ورتتەن كەيىن ەرتەسىنە ابىلقاسىموۆانىڭ «Forbes Kazakhstan» جۋرنالىنا بەرگەن سۇقباتى مەن مۇقاباعا باسىلعان سۋرەتى جاريالانىپ، جەلى قولدانۋشىلارىنىڭ نارازىلىعىن ودان ءارى كۇشەيتتى.

قايعىلى وقيعادان كەيىن ماكەڭ ۇكىمەت وتىرىسىنا قاتىسپادى. اۋىرىپ قالىپتى. ونى جاڭاعى جاقىپوۆا حابارلاپ ايتتى. ماكەڭ تاعى دا سىنعا ىلىكتى.

بۇدان بولەك ماكەڭنىڭ مينيستر بولىپ تۇرعان تۇستا ەلدە الەۋمەتتىك كومەك الۋشىلار سانى 504 مىڭ ادامعا جەتتى.

ورالمانداردىڭ 70 پايىزىندا جوعارعى ءبىلىم جوق

2014 جىلعا قايتا ورالايىقشى، ەربولات دوساەۆ دەيتىن بادىراق كوز بالا بار ەدى عوي. ەكونوميكا جانە بيۋدجەتتى جوسپارلاۋ مينيسترلىگىندە سونىڭ ورىنباسارى بولىپ تۇرعاندا ءمادينا قىز شەتتەگى قانداستارعا دا ءتىل تيگىزىپ سويلەگەن ەدى.

سول كەزدەگى ماكەڭنىڭ ايتۋىنشا، شەتتەن كەلەتىن ورالمانداردىڭ بار بولعانى 8,6 پايىزى عانا جوعارى ءبىلىمدى.  71 پايىزىنىڭ ورتا ءبىلىمى بار نەمەسە مۇلدە حات تانىمايتىن ساۋاتسىز ەكەن.

«سوندىقتان، ءبىلىمى مەن كاسىبي ماماندىعى جوق، دارەجەسى تومەن ەڭبەك كۇشى قازاقستاننىڭ ەڭبەك كۇشى نارىعىنا قوسىلىپ جاتىر. بۇل ماسەلە ورالمانداردىڭ قوعامعا ءسىڭىسىپ كەتۋىنە كەدەرگى بولۋدا» دەپتى سول كەزدە ءبىزدىڭ ماكەڭ.

مىنە بۇل قانداستارىمىزدى ورالتۋعا اشىق قارسىلىق ەدى. ءبىر جاعىنان قاراعاندا ءمادينا قىز، ورىس ءتىلىن ءبىلىمنىڭ بالاماسى رەتىندە قاراعان بولۋى دا مۇمكىن. ايتەۋىر وسىلاي سويلەگەن.

ماكەڭنىڭ تاققان تەمىر-تەرسەكتەرى مەن وردەن-مەدالدەرى:

«استانانىڭ 10 جىلدىعى» مەدالى (2008 جىل),

«قر تاۋەلسىزدىگىنە 20 جىل» مەدالى (2011 جىل),

«ەرەن ەڭبەگى ءۇشىن» مەدالى (2012 جىل),

«قحا 20 جىل» مەدالى (2015 جىل),

«ەاەو قۇرىلۋىنا قوسقان ۇلەسى ءۇشىن» مەدالى (2015 جىل),

«قر تاۋەلسىزدىگىنە 25 جىل» مەدالى (2016 جىل),

«قۇرمەت» وردەنى (2016 جىل).

ءتۇيىن. ماكەڭ قازاق ءتىلىن بىلمەيتىن مينيسترلەر قاتارىنان. وتكەن جىلى پرەزيدەنت مىندەتتەگەندە عانا ەجىكتەپ سويلەي باستاعان. مينيستر بولىپ كەلگەلى ەستىگەن «بارەكەلدىسى» جوق. سەناتورلار دا شۇيلىكتى. دەپۋتاتتار ونىڭ زاڭىن تۇسىنگەن دە جوق.  نىعماتۋليننەن دە تاياق جەدى، ءسوز ەستىدى. ءماجىلىس ونىڭ حالىقتى جۇمىسپەن قامتۋ جانە كوشى-قون ماسەلەلەرى تۋرالى زاڭ جوباسىن جىلتىر ەسەپ دەپ باعالادى. قىسقارتىپ ايتقاندا شاتا ءتىلدى شالا مينيستر.

ەندى مىنە، وتستاۆكاعا كەتكەن ماكەڭ، جاڭا ۇكىمەتكە كىشى مينيستر بولىپ ورالدى. مۇندايدا نە دەۋشى ەدى، «تەپكىلەسەڭ كەتپەيتىن تەمىر باقىت» باسقاعا ەمەس، ءدال وسى ماكەڭە بۇيىرعان سياقتى. ارتىنىڭ قايىرىن بەرسىن...

نۇرگەلدى ابدىعانيۇلى

Abai.kz

11 پىكىر