سەنبى, 25 مامىر 2019
614 0 پىكىر 15 ناۋرىز, 2019 ساعات 12:28

ناۋرىز مەرەكەسى وسكەمەندە ءۇش كۇن بويى تويلانادى

ناۋرىز مەرەكەسى بيىل وسكەمەندە وزگەشە اتاپ وتىلەدى. قالالىق اكىمدىكتىڭ ىشكى ساياسات ءبولىمىنىڭ حابارلاۋىنشا، جىلداعىداي كيىز ۇيلەر تەك مەرەكە كۇنى ەمەس، قالانىڭ ورتالىق الاڭىندا ءۇش كۇن بويى تىگىلىپ تۇرادى. وكەمەندىكتەر كيىز ۇيلەردى ەركىن ارالاپ، ىشىندەگى بۇيىمدارمەن تانىسا الادى. شاعىن قازاق اۋىلىندا التىباقاندار ورناتىلىپ، سالت-داستۇرلەردى دارىپتەۋگە ارنالعان شارالار وتكىزىلەدى.

ءبىرىنشى كۇن «ءداستۇر كۇنى» دەپ اتالاپ، بۇل كۇنى ۇلتتىق سالت-داستۇرلەر مەن ادەت-عۇرىپتاردىڭ كورىنىستەرى بار شارالار ۇيىمداستىرىلادى. ەكىنشى كۇن «كەلىسىم كۇنى» اتالىپ، قازاقستاندى مەكەندەيتىن ەتنوستاردىڭ مادەنيەتىنەن سىر شەرتەتىن شارالار وتەدى. ءۇشىنشى كۇن، ياعني «ۇلىستىڭ ۇلى كۇنى» ناۋرىز مەيرامىنىڭ ءمان-ماعىناسىن بارىنشا اشۋعا ارنالادى.

ءۇش كۇن بويى ورتالىق الاڭدا جەتى قازىنانى قۇرايتىن جىلقى، تازى يت، قىران بۇركىتپەن سۋرەتكە تۇسۋگە بولادى. بالالار مەن جاستار ءۇشىن التىباقاندار قۇرىلادى. وسكەمەن قالاسىنىڭ اكىمى جاقسىلىق ومار ۇلىستىڭ ۇلى كۇنىن اتاپ ءوتۋ بويىنشا ارنايى كەڭەس وتكىزىپ، ءىس-شارالاردى جوعارى دەڭگەيدە ۇيىمداستىرۋدى تاپسىردى. مەيرامنىڭ نەگىزگى كۇنىندە ورتالىق الاڭدا ەلباسىنىڭ ماقالاسىنا ساي، ۇلى دالانىڭ 7 قىرىن اشىپ كورسەتەتىن 7 كيىز ءۇي تىگىلەدى.

اتاپ وتەرلىگى، كيىز ۇيلەردىڭ بارلىعى ەسىكتەرىن ايقارا اشىپ، ەتنوگرافيالىق كورمە فورماتىندا جۇمىس ىستەيتىن بولادى. قالا باسشىسى كەڭەسكە قاتىسقان كاسىپكەرلەردى ءوز نىساندارىنا مەرەكەلىك بەزەندىرۋ جۇرگىزىپ، ناۋرىز مەيرامىنا وراي جەڭىلدىكتەر جاساۋعا شاقىردى. بيزنەس قۇرىلىمدارىن ىنتالاندىرۋ ماقساتىندا قالالىق اكىمدىك ۇزدىك مەرەكەلىك بەزەندىرىلگەن نىسانداردىڭ اراسىندا بايقاۋ جاريالانىپ وتىر.

Abai.kz

0 پىكىر