الماتى وبلىسىنا جۇمىس ساپارى اياسىندا قر پرەمەر-ءمينيسترى اسقار مامين قازاقستاننىڭ ەلورداسى - استانا قالاسىنىڭ نۇر-سۇلتان بولىپ قايتا اتالۋىنا قاتىستى پىكىر ءبىلدىردى.

پرەمەر-مينيستر قالانىڭ تۇڭعىش پرەزيدەنت - ەلباسىنىڭ قۇرمەتىنە وراي قايتا اتالۋى ايتۋلى تاريحي وقيعا بولىپ تابىلاتىنىن اتاپ كورسەتتى.

«قازىرگى تاڭدا ءبىزدىڭ كوز الدىمىزدا تاۋەلسىز قازاقستاننىڭ تاريحي جىلناماسىنىڭ جاڭا بەتتەرى جازىلۋدا. سوندىقتان مەملەكەتىمىزدىڭ جانە ونىڭ جاڭا ەلورداسىنىڭ نەگىزىن قالاۋشى، ۇلى دالانىڭ تورىندە دامىعان مەملەكەت قۇرعان ەلباسىمىز نۇرسۇلتان ءابىشۇلى نازارباەۆتىڭ ۇلى تۇلعاسىن وسىلاي تاريحي تۇردە دارىپتەۋ - بۇل ءبىزدىڭ كەلەشەك وسكەلەڭ ۇرپاق الدىنداعى پارىزىمىز»، - دەدى اسقار مامين.

ونىڭ ايتۋىنشا نۇر-سۇلتان قالاسى ەلباسى ن. نازارباەۆتىڭ جاڭا ەكونوميكالىق مودەلىنىڭ نەگىزگى قوزعاۋشى كۇشىنە اينالدى.

«جاڭا استانامىزدىڭ قالىپتاسۋىنىڭ العاشقى جىلدارىندا ەلباسىمىزدىڭ «استانانىڭ گۇلدەنۋى - قازاقستاننىڭ گۇلدەنۋى» باعدارلاماسى استانانىڭ عانا ەمەس، ەلىمىزدىڭ بارلىق وڭىرلەرىنىڭ دامۋىنا قۋاتتى سەرپىن بەردى. الەمدىك ارەنادا قازاقستاننىڭ ىقپالى مەن ءرولى جىل وتكەن سايىن ارتىپ كەلەدى. بۇل - ءسوزسىز ءبىزدىڭ ەلباسىمىزدىڭ ەرەن ەڭبەگى. استانانىڭ تۇڭعىش پرەزيدەنت ەسىمىمەن اتالۋى - ادىلەتتى ءارى دەر كەزىندە جاسالعان شەشىم. جاڭا اتاۋعا يە بولعان استانانىڭ الدىندا بۇدان دا بيىك، ۇلى ماقساتتار تۇر. سونىمەن قاتار، بۇل - جاڭا مۇمكىندىكتەر ءارى ۇلكەن جاۋاپكەرشىلىك»،- دەدى پرەمەر-مينيستر.

ول «ءبىز ءبارىمىز دە استانالىقتار بولىپ قالامىز، ويتكەنى نۇر-سۇلتان - قازاقستاننىڭ استاناسى!» ەكەنىن اتاپ ءوتتى. ەستەرىڭىزگە سالا كەتەيىك، بۇگىن مەملەكەت باسشىسى قاسىم-جومارت توقاەۆ قازاقستان رەسپۋبليكاسىنىڭ استاناسى - استانا قالاسىن قازاقستان رەسپۋبليكاسىنىڭ استاناسى - نۇر-سۇلتان قالاسى دەپ قايتا اتاۋ تۋرالى جارلىققا قول قويدى.

دەرەككوز: قازاقپارات

Abai.kz